Luka 9 bob
1 İysa qasına on eki elshisin shaqırıp alıp, olarg'a barlıq jinlerdi quwıp shıg'arıwg'a ha'm awırıwlarg'a shıpa beriwge ku'sh ha'm biylik berdi
2 Quday Patshalıg'ın ja'riyalap, awırıw adamlarg'a shıpa beriw ushın olardı jiberip,
3 İysa bılay dedi: – Jolg'a hesh na'rse: tayaq ta, qalta da, nan da, aqsha da, artıq kiyim de alman'lar.
4 Qaysı u'yge kirsen'ler de, ol jerden ketkenin'izshe, sol u'yde bolın'lar.
5 Eger bir qalada sizlerdi qabıl almasa, sol qaladan shıg'ıp baratırıp, olarg'a eskertiw retinde ayaqların'ızdag'ı shan'dı qag'ıp ketin'ler.
6 Sha'kirtler jolg'a shıqtı. Olar ha'mme jerde Xosh Xabardı ja'riyaladı ha'm awırıwlarg'a shıpa berip, awıllardı aralap ju'rdi.
7 U'lke hu'kimdarı Hirod bolıp atırg'an barlıq waqıyalar haqqında esitip, tınıshsızlanıp qaldı. Sebebi geybirewler: «Yaqıya o'limnen qayta tirilipti» dese,
8 basqalar: «İliyas payda bolıptı» dep, ja'ne birewler: «Burıng'ı payg'ambarlardın' biri tirilipti», – deytug'ın edi.
9 Al Hirod: «Yaqıyanın' basın kestirgen edim-g'o. Endi mınaday islerdi islep atır dep, men esitken Adam kim boldı eken?» – dep İysanı ko'riwdin' jolın izlestirdi.
10 Elshiler qaytıp kelip, islegen ha'mme isleri haqqında İysag'a aytıp berdi. İysa O'zi menen birge tek olardı g'ana alıp, Betsayda dep atalg'an qalag'a ketti.
11 Biraq xalıq bunı bilip, İysanın' izinen keldi. İysa olardı jaqsı qabıl alıp, olarg'a Quday Patshalıg'ı haqqında ayttı ha'm shıpag'a mu'ta'j adamlarg'a shıpa berdi.
12 Ku'n kesh bola baslag'anda, on eki elshisi İysanın' aldına kelip: – Xalıqtı jiber. A'tiraptag'ı awıl-elatlarg'a barıp, tu'neytug'ın jer menen azıq-awqat tapsın. O'ytkeni bizler bir elsiz jerdemiz-g'o, – dedi.
13 Biraq İysa olarg'a: – Olarg'a sizler awqat berin'ler, – dedi. – Bizler barıp, sonsha adamg'a azıq satıp almasaq, bes nan menen eki balıqtan basqa hesh na'rsemiz joq, – dedi sha'kirtleri.
14 Sebebi ol jerde bes mın'g'a shamalas er adam bar edi. İysa sha'kirtlerine: – Olardı eliw-eliwden topqa bo'lip otırg'ızın'lar, – dedi.
15 Sha'kirtleri solay islep, ha'mmesin jerge otırg'ızdı.
16 İysa bes nan menen eki balıqtı aldı da, aspang'a qarap, olar ushın Qudayg'a shu'kirlik etti. Olardı sındırıp, xalıqqa tarqatıw ushın, sha'kirtlerine berdi.
17 Ha'mme jep toydı. Awısqan bo'leklerin jıynap, u'lken on eki sebet toltırdı.
18 Ku'nlerdin' birinde İysa awlaq jerde duwa etip turg'anda, sha'kirtleri de Onın' menen birge edi. İysa olardan: – Xalıq Meni kim dep sanaydı? – dep soradı.
19 Sha'kirtleri juwap berip bılay dedi: – Shomıldırıwshı Yaqıya dep sanaydı, al bazıları İliyas, ja'ne basqaları: «Burıng'ı payg'ambarlardın' biri tirilip kelipti», – desedi.
20 İysa olardan: – Al sizler Meni kim dep sanaysızlar? – dep soradı. Petr Og'an: – Sen – Qudaydın' jibergen Masixısan', – dep juwap berdi.
21 İysa bul tuwralı hesh kimge aytpawların olarg'a qatan' eskertti de:
22 – Adam Ulı ko'p azap shegip, aqsaqallar, bas ruwxaniyler ha'm diniy mug'allimler ta'repinen qabıl alınbay o'ltiriliwi ha'm u'shinshi ku'ni qayta tiriliwi tiyis, – dedi.
23 Sonda İysa ha'mmege bılay dedi: – Kim de kim Mag'an ergisi kelse, o'zinen keshsin ha'm ha'r ku'ni o'z atanaq ag'ashın arqalap, Menin' izime ersin.
24 Kim de kim o'z janın saqlamaqshı bolsa, onı jog'altadı, al kim de kim o'z janın Men ushın jog'altsa, ol onı saqlap qaladı.
25 Eger adam pu'tkil du'nyanı iyelegeni menen, o'z janın joytıp, o'zine zıyan keltirse, bunnan og'an ne payda?
26 Kim de kim Mennen ha'm Menin' so'zlerimnen arlansa, Adam Ulı da O'zinin', A'kesinin' ha'm muxaddes perishtelerdin' saltanatında kelgende, onnan arlanadı.
27 Sizlerge shının aytaman: bul jerde turg'anlardın' geybirewleri Quday Patshalıg'ın ko'rmegenshe, o'lmeydi.
28 Bul so'zlerdi aytqannan son' segiz ku'ndey o'tkende, İysa Petr, Yuxan ha'm Yaqıptı qasına alıp, duwa etiw ushın tawg'a shıqtı.
29 İysa duwa etkende, Onın' tu'r-tu'si o'zgerdi, kiyimleri de appaq tu'ske enip, jarqırap ketti.
30 Sonda eki er adam Onın' menen so'ylesip turg'an edi. Olar: Muwsa menen İliyas edi.
31 Olar ullı saltanat penen ko'rinip, İysanın' jaqında Erusalim qalasında du'nyadan o'tip, Qudaydın' erkin orınlawı tiyis ekeni haqqında so'ylesti.
32 Al Petr menen onın' qasındag'ılardı ku'shli uyqı basqan edi. Olar oyanıp ketip, İysanın' ullılıg'ın ha'm Onın' menen turg'an eki er adamdı ko'rdi.
33 Olar İysanın' janınan kete baslag'anda, Petr İysag'a: – Ustaz, bul jerde bolg'anımız qanday jaqsı! Bizler u'sh qos qurayıq: birewin Sag'an, birewin Muwsag'a, birewin İliyasqa, – dedi. Ol ne aytqanın o'zi bilmedi.
34 Petr usılardı aytıp turg'anda bir bult payda bolıp, olardı qapladı. Sha'kirtler bult ishine kirgende qorqısıp qaldı.
35 Sonda bulttan: – Bul – Menin' tan'lap alg'an Ulım, Onın' aytqanın tın'lan'lar! – degen saza esitildi.
36 Dawıs tınıp qalg'annan son', İysanın' jalg'ız O'zi qaldı. Sha'kirtleri tis jarıp, ko'rgenleri haqqında sol ku'nleri hesh kimge aytpadı.
37 Kelesi ku'ni olar tawdan tu'skende, İysanı ko'p xalıq ku'tip aldı.
38 Ku'tilmegende xalıq arasınan birew baqırıp: – Ustaz, Sennen o'tinip sorayman, menin' balama bir na'zer sala go'r! Ol menin' jalg'ız balam edi.
39 Balamdı jawız ruwx tutqanda, ol birden qıshqırıp jiberedi. Jawız ruwx onı qaltıratıp, awzınan ko'bik ag'ızadı da, azaplap bolg'annan son', zorg'a degende onnan ketedi.
40 Men Senin' sha'kirtlerin'nen jawız ruwxtı quwıp shıg'arıwdı o'tingen edim, biraq olardın' qolınan kelmedi, – dedi.
41 İysa juwap berip: – Ha'y, isenbeytug'ın, adasqan a'wlad! Men qashang'a deyin sizler menen birge bolıp, sizlerge shıdayman? Balan'dı bul jerge alıp kel, – dedi.
42 Bala kiyatırg'anda jin onı jerge jıg'ıp, qaltırata basladı. Biraq İysa jawız ruwxqa tıyım salıp, balag'a shıpa berdi ha'm onı a'kesine tapsırdı.
43 Ha'mme Qudaydın' ullılıg'ına tan' qalıstı. Xalıq İysanın' barlıq islerine hayran qalısıp turg'anda, İysa O'z sha'kirtlerine:
44 – Mına so'zlerimdi qulaqların'ızg'a quyıp alın'lar: Adam Ulı adamlardın' qolına uslap beriledi, – dedi.
45 Biraq olar bul so'zdin' ma'nisin tu'sinbedi. Onın' ma'nisi olarg'a jasırın bolg'anlıqtan, olar onı ug'a almadı. Al bul so'z tuwralı İysadan sorawg'a qorqtı.
46 Sha'kirtler o'z ara: – Qaysı birimiz ullımız? – dep tartısa basladı.
47 İysa olardın' kewillerindegi oydı bilip, bir kishkene balanı aldı da, onı janına qoyıp,
48 olarg'a bılay dedi: – Kim de kim bul balanı Menin' atım ushın qabıl etse, onın' Meni qabıl etkeni boladı. Al kim de kim Meni qabıl etse, onın' Meni Jibergendi qabıl etkeni boladı. O'ytkeni aran'ızda kim en' kishkene bolsa, sol en' ullı boladı.
49 Sonda Yuxan: – Ustaz! Senin' atın' menen jinlerdi quwıp shıg'arıp ju'rgen bir adamdı ko'rdik. Biraq ol bizler menen birge Sag'an ermegenlikten, og'an tıyım saldıq, – dedi.
50 İysa Yuxang'a: – Og'an tıyım salman'lar. Sebebi kim de kim sizlerge qarsı bolmasa, ol sizlerdin' ta'repdarın'ız, – dedi.
51 İysanın' bul du'nyadan aspang'a alınatug'ın ku'nleri jaqınlag'anda, Ol Erusalimge barıwg'a qarar etti.
52 Ol aldınan xabarshıların jiberdi. Olar barıp, İysanın' keliwine tayarlıq ko'riw ushın, Samariyanın' bir awılına kirdi.
53 Biraq İysa Erusalimge qaray baratırg'anlıqtan, ol jerde Onı qabıl etpedi.
54 Sha'kirtleri Yaqıp penen Yuxan bunı ko'rip: – İyem! Bulardı joq qılıp jiberiw ushın, aspannan ot tu'siwin buyırıwımızdı qa'leysen' be? – dedi.
55 Biraq İysa burılıp, olarg'a keyidi.
56 Son'ınan olar basqa awılg'a ketti.
57 Olar jolda kiyatırg'anda, birew İysag'a: – Sen qayaqqa barsan' da, men Sag'an eremen, – dedi.
58 İysa og'an: – Tu'lkilerdin' inleri, aspandag'ı quslardın' uyaları bar. Biraq Adam Ulının' bas panalaytug'ın ornı da joq, – dedi.
59 Al basqa birewine: – Menin' izime er, – dedi. Biraq ol: – İyem! Da'slep barıp, a'kemdi jerlewime ruxsat et, – dedi.
60 İysa og'an: – O'z o'lgenlerin jerlewdi o'lilerge qaldır. Al sen barıp, Qudaydın' Patshalıg'ı tuwralı ja'riyala, – dedi.
61 Ja'ne birew İysag'a: – İyem, men Senin' izin'e eremen, biraq da'slep u'y-ishim menen xoshlasıp keliwime ruxsat et, – dedi.
62 Biraq İysa og'an: – Atızdı su'riwdi baslap, artına qaray beretug'ın adam Qudaydın' Patshalıg'ına ılayıqlı emes, – dedi.
