Yuxan 11 bob
1 Betaniya degen awılda Lazar atlı bir adam awırıp atırg'an edi. Onın' qarındasları Ma'riyam menen Marta da sol awılda jasaytug'ın edi.
2 Keyinirek İyemiz İysag'a a'tir may quyıp, Onın' ayaqların shashı menen su'rtetug'ın hayal, usı Ma'riyam edi.
3 Apalı-sin'lili İysag'a: «İyem, Senin' jaqsı ko'retug'ın adamın' awırıp atır», – dep xabar jiberdi.
4 İysa bunı esitip: – Bul awırıwdın' izi o'lim menen juwmaqlanbaydı, al Qudaydın' ullılanıwı ushın boladı. Solay etip, bul arqalı Qudaydın' Ulı da ullılanadı, – dedi.
5 İysa Martanı, onın' sin'lisin ha'm Lazardı su'yetug'ın edi.
6 İysa Lazardın' awırıp atırg'anın esitse de, O'zi bolıp atırg'an jerde ja'ne eki ku'n qaldı.
7 Son'ınan sha'kirtlerine: – Ja'ne Yahudiyag'a barayıq, – dedi.
8 Sha'kirtleri Og'an: – Ustaz, yahudiyler Seni jaqında g'ana tas penen urmaqshı edi-g'o. Sen ja'ne sol jerge barajaqsan' ba? – dedi.
9 İysa juwap berip: – Ku'ndiz on eki saat bar emes pe? Ku'ndiz ju'rgen adam su'rnigip jıg'ılmaydı, o'ytkeni ol bul du'nyanın' nurın ko'redi.
10 Al tu'nde ju'riwshi su'rnigip jıg'ıladı, sebebi onda nur joq, – dedi.
11 İysa bul so'zlerdi aytqannan son', olarg'a ja'ne bılay dedi: – Dostımız Lazar uyıqlap qaldı. Biraq Men onı oyatıw ushın ketip baratırman.
12 – İyem, uyıqlap qalg'an bolsa, ta'wir boladı, – dedi sha'kirtleri.
13 İysa Lazardın' o'limin na'zerde tutqan edi. Biraq olar İysa qa'dimgi uyqı haqqında ayttı, dep oyladı.
14 Sonda İysa olarg'a ashıq aytıp: – Lazar o'ldi.
15 Sizlerdin' iseniwin'iz ushın, Menin' sol jerde bolmag'anıma sizler ushın quwanıshlıman. Al endi og'an barayıq, – dedi.
16 Sonda Egiz dep atalg'an Tomas sha'kirtlerge: – Ju'rin'ler kettik, bizler de Onın' menen birge o'lemiz, – dedi.
17 İysa Betaniyag'a jaqınlag'anda, Lazardın' qa'birge qoyılg'anına to'rt ku'n bolg'anın bildi.
18 Betaniya Erusalimge jaqın, u'sh shaqırımday jerde bolg'anlıqtan,
19 ko'p yahudiyler Marta menen Ma'riyamg'a a'jag'asının' o'limi sebepli kewil aytıwg'a keldi.
20 Marta İysanın' kiyatırg'anın esitip, Onı qarsı alıwg'a shıqtı. Al Ma'riyam u'yde qaldı.
21 Marta İysag'a: – İyem! Eger Sen usı jerde bolg'anın'da, a'jag'am o'lmes edi.
22 Biraq ha'zir de Sen Qudaydan ne sorasan' da, Qudaydın' Sag'an beretug'ının bilemen, – dedi.
23 İysa og'an: – Senin' a'jag'an' tiriledi, – dedi.
24 – Aqırettegi qayta tiriliwde onın' da qayta tiriletug'ının bilemen, – dedi Marta.
25 İysa og'an: – Men qayta tiriliw ha'm o'mirmen. Mag'an isengen adam o'lse de, jasaydı.
26 Mag'an isenip jasap atırg'an ha'r bir adam hesh qashan o'lmeydi. Usıg'an isenesen' be? – dedi.
27 Marta Og'an: – Awa, İyem. Senin' du'nyag'a keletug'ın Masix, Qudaydın' Ulı ekenin'e isenemen, – dedi.
28 Marta usını aytıp bolıp ketip qaldı ha'm Ma'riyamdı shaqırıp alıp: – Ustaz usı jerde, seni shaqırıp atır, – dep og'an sıbırladı.
29 Ma'riyam bunı esitiwden tez ornınan turdı da, İysanın' janına ketti.
30 İysa ele awılg'a kirmegen bolıp, Ol Marta menen ushırasqan jerde edi.
31 Ma'riyam menen birge u'yde bolg'an ha'm og'an kewil aytıp otırg'an yahudiyler onın' asıg'ıslıq penen ornınan turıp, sırtqa shıqqanın ko'rdi. Olar onı jılaw ushın qa'birge ketti dep oylap, izine erdi.
32 Ma'riyam İysa turg'an jerge kelgende, Onı ko'rip, ayaqlarına jıg'ıldı da:
33 Ma'riyamnın' ha'm onın' menen kelgen yahudiylerdin' jılag'anın ko'rgende, İysa ruwxıy qıynalıp, janı ashıdı.
34 – Onı qay jerge qoydın'lar? – dep soradı. – İyem, kelip ko'r, – dedi olar.
35 İysa ko'zine jas aldı.
36 Sonda yahudiyler: – Qaran'lar, onı qanshelli su'yer eken! – dedi.
37 Biraq olardın' ayırımları: – Soqırdın' ko'zlerin ashqan bul Adam Lazardı o'limnen aman alıp qalmas pa edi? – dedi.
38 İysa ja'ne ishinen teren' qayg'ırıp, qa'birge bardı. Qa'bir bir u'n'girde bolıp, onın' awzı tas penen jabılg'an edi.
39 İysa: – Tastı alıp qoyın'lar, – dedi. Marhumnın' qarındası Marta İysag'a: – İyem! Endi iyislenip baratır. O'ytkeni onın' qa'birge qoyılg'anına to'rt ku'n boldı, – dedi.
40 İysa og'an: – «Eger Mag'an isensen', Qudaydın' ullılıg'ın ko'resen'», – dep sag'an aytqan joq pa edim? – dedi.
41 Solay etip, olar tastı alıp qoydı. İysa ko'zlerin aspang'a tigip, bılay dedi: – A'ke! Menin' tilegimdi esitkenin' ushın, Sag'an minnetdarshılıq bildiremen.
42 Meni ha'mme waqıt esitetug'ının'dı bilemen. Biraq Men bunı usı jerde turg'an xalıq Meni Senin' jibergenin'e iseniwi ushın ayttım.
43 İysa usılardı aytıp, ba'lent dawıs penen: – Lazar, sırtqa shıq! – dep baqırdı.
44 Sonda ayaq-qolları kepinlik penen oralg'an, beti oramal menen baylang'an o'li tirilip, sırtqa shıqtı. İysa olarg'a: – Onı sheshindirip jiberin'ler, kete bersin, – dedi.
45 Solay etip, Ma'riyamg'a kelip, İysanın' qılg'an islerin ko'rgen yahudiylerdin' ko'bisi İysag'a isendi.
46 Sonda bas ruwxaniyler menen pariseyler joqarg'ı ken'este jıynalıp: – Bizler ne qılıwımız kerek? Bul Adam ko'p ka'ramatlar islemekte.
47 Sonda bas ruwxaniyler menen pariseyler joqarg'ı ken'este jıynalıp: – Bizler ne qılıwımız kerek? Bul Adam ko'p ka'ramatlar islemekte.
48 Eger Onı O'z erkine jibersek, ha'mme Og'an isenip ketedi. Sonda rimliler kelip, İbadatxanamızdı da, elimizdi de joq qıladı, – dedi.
49 Olardın' biri, sol jılı bas ruwxaniy bolg'an Kayafa: – Sizler hesh na'rseni bilmeysizler.
50 Pu'tkil xalıq nabıt bolg'anınan go're, bir adamnın' xalıq ushın o'liwi sizler ushın jaqsıraq ekenin tu'sinbeysizler me? – dedi.
51 Ol bul so'zlerdi o'zliginen aytpag'an edi. Sol jılı ol bas ruwxaniy bolg'anlıqtan,
52 İysanın' yahudiy xalqı ushın, tek yahudiy xalqı ushın g'ana emes, al Qudaydın' tarqalıp ketken balaların jıynap birlestiriw ushın o'letug'ının boljap aytqan edi.
53 Solay etip, sol ku'nnen baslap olar İysanı o'ltiriwge til biriktirdi.
54 Sonlıqtan İysa endi yahudiyler arasında ashıq ju're almaytug'ın boldı. Sonda Ol sho'ldin' jaqınındag'ı Efraim degen qalashag'a ketip, sha'kirtleri menen birge sol jerde qaldı.
55 Yahudiylerdin' Qutqarılıw bayramı jaqınlap qalg'an edi. Diniy ra'sim boyınsha tazalanıw ushın, eldin' ha'mme ta'repinen ko'p adamlar bayramnan burın Erusalimge keldi.
56 Olar İysanı izledi ha'm İbadatxanada turıp: – Qalay oylaysızlar. Ol bayramg'a keler me eken? – dep bir-birinen soradı.
57 Al bas ruwxaniyler menen pariseyler İysanı uslaw ushın, kim de kim Onın' qay jerde ekenin bilse, xabar beriwdi buyırg'an edi.
