Yuxan 17 bob
1 İysa bul so'zlerdi aytıp bolg'annan son', ko'zlerin aspang'a tigip bılay dedi: – A'ke, waqıt keldi. Ulın' Seni ullılawı ushın, Sen de Ulın'dı ullıla.
2 Sebebi Senin' Og'an bergen adamların'nın' ha'mmesine Ol ma'n'gilik o'mir bersin dep, Sen Og'an pu'tkil adamzat u'stinen biylik berdin'.
3 Ma'n'gilik o'mir – bul Seni, jalg'ız haq Qudaydı ha'm Sen jibergen İysa Masixtı biliw.
4 Senin' Mag'an tapsırg'an isin'di tamamlag'anım menen, Seni jer ju'zinde ullıladım.
5 A'ke, du'nya jaratılmastan burın Senin' menen birge bolg'anımda, Mende bolg'an ullılıq penen ha'zir Meni O'zin'nin' aldın'da ullıla.
6 – Senin' Mag'an du'nyadan bergen adamların'a Seni ashıp berdim. Olar Seniki edi, Sen olardı Mag'an berdin' ha'm olar Senin' so'zlerin'di orınladı.
7 Senin' Mag'an bergenlerin'nin' ha'mmesi Sennen ekenin olar endi bilip aldı.
8 O'ytkeni Mag'an bergen so'zlerin'di olarg'a tapsırdım, olar qabıl etti. Olar Menin' Sennen kelgenimdi haqıyqattan bildi ha'm Meni Senin' jibergenin'e isendi.
9 Olar ushın sorayman: du'nya ushın emes, Mag'an bergen adamların' ushın sorayman. Sebebi olar Seniki.
10 Menikinin' ha'mmesi – Seniki ha'm Senikinin' ha'mmesi – Meniki. Men olar arqalı ullılandım.
11 Men endi bul du'nyada emespen, biraq olar bul du'nyada. Men Sag'an baratırman, Muxaddes A'ke, Mag'an bergen O'z atın'nın' ku'shi menen olardı saqla, olar da Biz sıyaqlı bir bolsın.
12 Men olar menen birge bolg'anımda, Senin' Mag'an bergen atın'nın' ku'shi menen olardı qorg'ap saqladım. Nabıt bolıwg'a tiyisli adamnan basqa olardan hesh biri nabıt bolmadı. Solay etip, Muxaddes Jazıw orınlandı.
13 Endi Men Sag'an baratırman. Menin' quwanıshım olarda tolı bolıwı ushın, bul so'zlerdi du'nyada bolg'an waqtımda aytıp atırman.
14 Men olarg'a Senin' so'zin'di tapsırdım, du'nya bolsa olardı jek ko'rdi. O'ytkeni Menin' du'nyag'a tiyisli bolmag'anım sıyaqlı, olar da du'nyag'a tiyisli emes.
15 Olardı du'nyadan alıwın'dı emes, jawızlıqtan, shaytannan saqlawın'dı sorayman.
16 Menin' du'nyag'a tiyisli bolmag'anım sıyaqlı, olar da du'nyag'a tiyisli emes.
17 Olardı haqıyqat penen muxaddes qıl. Senin' so'zin' – haqıyqat.
18 Senin' Meni du'nyag'a jibergenin' sıyaqlı, Men de olardı du'nyag'a jiberdim.
19 Olar da haqıyqat penen muxaddes bolıwları ushın, Men O'zimdi olar ushın bag'ıshlayman.
20 – Men tek olar ushın emes, al olardın' so'zleri arqalı Mag'an isenetug'ınlar ushın da sorayman:
21 olardın' ha'mmesi bir bolsın. A'ke, Meni Senin' jibergenin'e du'nya iseniwi ushın, Senin' Mende ha'm Menin' Sende bolg'anım sıyaqlı, olar da Bizde bolsın.
22 Biz bir bolg'anımız sıyaqlı, olar da bir bolıwı ushın, Senin' Mag'an bergen ullılıg'ın'dı olarg'a berdim.
23 Men olarda, Sen Mendesen'. Meni Senin' jibergenin'di ha'm Senin' Meni su'yetug'ının' sıyaqlı, olardı da su'yetug'ının'dı du'nya biliwi ushın, olar da bir tutas bolsın.
24 A'ke! Senin' Mag'an bergen adamların' Men bolatug'ın jerde Menin' menen birge bolıp, Sen Meni du'nya jaratılmastan burın su'ygenlikten, Senin' Mag'an bergen ullılıg'ın'dı olardın' da ko'riwin qa'leymen.
25 A'dil A'ke! Du'nya Seni bilmeydi, biraq Men Seni bilemen. Bular da Meni Senin' jibergenin'di biledi.
26 Mag'an degen su'yispenshiligin' olarda bolıwı ushın ha'm Men de olarda bolıwım ushın, Senin' atın'dı olarg'a bildirdim ha'm bildiriwdi dawam etemen.
