Yuxan 2 bob
1 Eki ku'n o'tkennen son', Galilanın' Kana qalasında u'yleniw toyı boldı. İysanın' anası sol jerde edi.
2 İysa menen sha'kirtleri de toyg'a mira't etilgen edi.
3 Sharap tawsılg'anda, İysanın' anası Og'an: – Olardın' sharabı tawsıldı, – dedi.
4 İysa og'an: – Apa, bul Menin' jumısım emes. Menin' waqtım ele kelgen joq, – dedi.
5 İysanın' anası xızmetshilerge: – Ol sizlerge ne dese de, sonı islen'ler, – dedi.
6 Sol jerde diniy a'det boyınsha yahudiyler tazalanıw ushın qollanatug'ın, ha'r qaysısı shama menen ju'z litr alatug'ın altı tas gu'ze bar edi.
7 İysa xızmetshilerge: – Gu'zelerdi suwg'a toltırın'lar, – dedi. Olar gu'zelerdi awzına deyin toltırdı.
8 Sonda İysa xızmetshilerge: – Endi bunnan alıp, toy basqarıwshıg'a aparın'lar, – dedi. Olar alıp bardı.
9 Toy basqarıwshı sharapqa aylang'an suwdı tatıp ko'rdi. Onın' qayaqtan kelgenin bilmedi, tek alıp kelgen xızmetshiler g'ana biletug'ın edi. Toy basqarıwshı ku'yewdi shaqırıp:
10 – Ha'r bir adam aldın jaqsı sharaptı, adamlar ma's bolg'annan son' pa'siregin beredi. Biraq sen jaqsı sharaptı ha'zirge deyin saqlapsan'-g'o, – dedi.
11 İysa bul birinshi ka'ramatın Galilanın' Kana qalasında islep, O'z ullılıg'ın ko'rsetti. Sha'kirtleri de Og'an isendi.
12 İysa bul birinshi ka'ramatın* Galilanın' Kana qalasında islep, O'z ullılıg'ın ko'rsetti. Sha'kirtleri de Og'an isendi.
13 Yahudiylerdin' Qutqarılıw bayramı jaqınlasıp qalg'anda, İysa Erusalimge ketti.
14 İbadatxanada iri qara mal, qoy ha'm kepter satıwshılardı, sol jerde otırg'an aqsha almastırıwshılardı ko'rdi.
15 İysa arqannan qamshı islep, qoylar menen iri qara malg'a qosıp ha'mmesin İbadatxanadan quwıp shıg'ardı. Aqsha almastırıwshılardın' aqshaların shashıp, stolların awdarıp tasladı.
16 Ol kepter satıwshılarg'a: – Mınalardı bul jerden joq etin'ler, A'kemnin' u'yin bazarg'a aylandırman'lar! – dedi.
17 Sonda sha'kirtleri: «Senin' u'yin'e bolg'an qızg'anıshım Meni jep jiberdi»*, – dep aytılg'an Muxaddes Jazıwdag'ı ayattı eslerine tu'sirdi.
18 Yahudiy basshıları İysadan: – Bulardı islewge biyligin' bar ekenin bizlerge qanday ka'ramatlı belgi menen da'lilley alasan'? – dep soradı.
19 İysa olarg'a juwap berip: – Bul İbadatxananı buzın'lar, Men onı u'sh ku'nnin' ishinde qayta tikleymen, – dedi.
20 Olar İysag'a: – Bul İbadatxana qırıq altı jılda qurılg'an, Sen onı u'sh ku'nnin' ishinde tiklemekshimisen'? – dedi.
21 Biraq İysanın' İbadatxana dep aytqanı O'z denesi edi.
22 İysa o'limnen qayta tirilgennen son', sha'kirtleri Onın' bul so'zlerin eslerine tu'sirip, Muxaddes Jazıwg'a ha'm İysanın' bul so'zine isendi.
23 İysa Erusalimde, Qutqarılıw bayramında bolg'anda, ko'pler Ol islegen ka'ramatlardı ko'rip, Onın' atına isendi.
24 Biraq İysa ha'mme adamlardın' kewillerin bilgenlikten, olarg'a isenbedi.
25 Og'an adam haqqında hesh kimnin' gu'walıg'ının' ha'jeti joq edi. O'ytkeni adamnın' kewlinde ne bar ekenin Ol biletug'ın edi.
