Elshiler 15 bob
1 Yahudiyadan Antioxiyag'a geybir iseniwshiler kelip, tuwısqanlarg'a: «Eger Muwsanın' u'rp-a'deti boyınsha su'nnet etilmesen'ler, qutqarıla almaysızlar», – dep ta'lim bere basladı.
2 Pavel ha'm Barnaba olar menen aytısıp, qattı tartısıp qaldı. Aqırında Pavel ha'm Barnabag'a, ja'ne de olar menen birge basqa bir neshe tuwısqang'a Erusalimdegi elshiler menen aqsaqallarg'a barıp, usı ma'seleni sheshiw tapsırıldı.
3 Solay etip, olar iseniwshiler ja'ma'a'ti ta'repinen jiberilip, Fenikiya ha'm Samariya u'lkelerinen o'tti. Jol-jo'nekey basqa milletlerdin' İyemizdin' jolına tu'skenin aytıp, sol jerdegi tuwısqanlarg'a u'lken quwanısh bag'ıshladı.
4 Erusalimge kelgende, olar iseniwshiler ja'ma'a'ti, elshiler ha'm aqsaqallar ta'repinen jaqsı qabıl etildi. Qudaydın' o'zleri arqalı islegen ha'mme na'rsesin olarg'a bildirdi.
5 Biraq, pariseyler arasınan shıqqan ayırım iseniwshiler orınlarınan turıp: – İseniwshi bolg'an basqa millet adamları da su'nnet etilip, olarg'a Muwsanın' Nızamın orınlawdı buyırıw tiyis, – dedi.
6 Elshiler menen aqsaqallar bul ma'sele boyınsha ma'sla'ha'tlesiw ushın jıynaldı.
7 Uzaq talqılawdan son' Petr ornınan turıp, olarg'a bılay dedi: – Tuwısqanlar! Basqa milletlerdin' Xosh Xabardı menin' awzımnan esitip iseniwi ushın, Quday ko'p waqıt burın aran'ızdan meni tan'lag'anın bilesizler.
8 Adamnın' kewlin biletug'ın Quday Muxaddes Ruwxtı bizlerge bergeni sıyaqlı, basqa milletlerge de berip, olardı qabıl etkenin ko'rsetti.
9 Quday olardın' kewillerin isenimleri arqalı tazalap, bizler menen olardın' arasına ayırmashılıq qoymadı.
10 Olay bolsa, endi ne ushın atababalarımız da, o'zlerimiz de ko'terip ju're almag'an moyıntırıqtı sha'kirtlerdin' moynına salıp, Qudaydı sınap atırsızlar.
11 Olardın' İyemiz İysanın' miyrimi menen qutqarılatug'ınınday, bizler de o'zlerimizdin' solay qutqarılatug'ınımızg'a isenemiz.
12 Sonda jıynalg'anlardın' ha'mmesi tınıshlanıp, Barnaba menen Paveldi tın'lay basladı. Olar o'zleri arqalı Qudaydın' basqa milletler arasında ko'rsetken ka'ramatlı belgileri menen tan' qalarlıq na'rseleri haqqında aytıp berdi.
13 Olar so'zlerin tawısqannan son', Yaqıp so'z baslap bılay dedi: – Tuwısqanlar, mag'an qulaq salın'lar!
14 Basqa milletlerden O'zine tiyisli bir xalıq shıg'arıw ushın, Quday olarg'a da'slep qalay miyrimlilik ko'rsetkenin Simon Petr bayan etken edi.
15 Payg'ambarlardın' so'zleri de usıg'an tuwrı keledi. Bılay dep jazılg'an:
16 «Bunnan keyin Men qaytıp kelip, Dawıttın' qulap qalg'an u'yin qayta quraman. Qıyralg'anlardı du'zetip, qayta tikleymen.
17 Solay etip, qalg'an adamlar Ha'm Menin' atım menen atalıwshı barlıq milletler İyesin – Meni izlep tapsın.
18 Bulardı a'yyemnen bildirgen İyemiz usılay deydi».
19 Sonlıqtan, menin' pikirimshe, Qudaydın' jolına tu'sken basqa millet adamların qıynamawımız kerek.
20 Biraq, butlarg'a soyılıp haramlang'an qurbanlıq go'shinen, buzıqshılıqtan, buwındırılıp o'ltirilgen haywanlardın' go'shinen ha'm qannan awlaq bolıwların jazıp jiberiwimiz tiyis.
21 O'ytkeni a'yyemgi waqıtlardan beri Muwsanın' Nızamı ha'r bir qalada ja'riyalanıp kiyatır ha'm ha'r dem alıs ku'ni ma'jilisxanalarda oqılmaqta.
22 Solay etip, pu'tkil iseniwshiler ja'ma'a'ti menen elshiler ha'm aqsaqallar o'zlerinin' arasınan adamlardı saylap, olardı Pavel ha'm Barnaba menen birge Antioxiyag'a jiberiwge qarar etti. Saylang'anlar: tuwısqanlar arasında basshılıq etip ju'rgen Barsaba dep atalatug'ın Yahuda menen Sila edi.
23 Olar arqalı mına xattı jazıp jiberdi: «Hu'rmetli tuwısqanlarımız! Tuwısqanların'ız bolg'an biz, elshiler ha'm aqsaqallardan, Antioxiya, Siriya ha'm Kilikiyadag'ı basqa millet adamları bolg'an siz, tuwısqanlarg'a sa'lem!
24 Aramızdag'ı ayırım adamlardın' sizlerge barg'anın ha'm o'z so'zleri menen sizlerdi ta'shiwishke salıp, aqılın'ızdı hayran qılg'anın esittik. Bizler olarg'a hesh qanday jol-jorıq bermegen edik.
25 Sonlıqtan aramızdan bir neshe adamdı saylap, su'yikli tuwısqanlarımız Barnaba ha'm Pavel menen birlikte sizlerge jiberiwdi bir awızdan maqul taptıq.
26 Bular ekewi İyemiz İysa Masixtın' atı ushın o'mirlerin bag'ıshlag'an adamlar.
27 Sizlerge ja'ne de Yahuda menen Silanı jiberip atırmız. Olar bul jazg'anlarımızdı awızsha aytıp beredi.
28 Sebebi Muxaddes Ruwx ha'm bizler a'hmiyetli bolg'an bul qag'ıydalardan tısqarı sizlerge hesh na'rseni ju'klemewdi maqul taptıq:
29 sizler butlarg'a soyılg'an qurbanlıq go'shinen, qannan, buwındırılıp o'ltirilgen haywanlardın' go'shinen ha'm buzıqshılıqtan awlaq bolın'lar. Usılardan saqlansan'lar, jaqsı is qılg'an bolasızlar. Aman bolın'lar!»
30 Solay etip, jiberilgenler jolg'a shıg'ıp, Antioxiyag'a keldi. Ja'ma'a'tti bir jerge jıynap, olarg'a xattı tapsırdı.
31 İseniwshiler xattı oqıp, ondag'ı kewil ko'teriwshi so'zlerge quwandı.
32 Payg'ambarshılıq sıyın alg'an Yahuda menen Sila tuwısqanlarg'a ko'p so'zler menen aqıl-na'siyat aytıp, ruwxıy ku'sh-quwat berdi.
33 Bir qansha waqıt sol jerde bolg'annan son',
34 tuwısqanlar olardı aman-esen shıg'arıp salıp, jollag'anlarg'a qaytardı.
35 Al Pavel menen Barnaba Antioxiyada boldı. Olar ko'plegen adamlar menen birlikte İyemizdin' so'zin u'yretip, ja'riyalap ju'rdi.
36 Bir qansha waqıttan son', Pavel Barnabag'a: – Endi izimizge qaytıp, bizler İyemizdin' so'zin ja'riyalag'an ha'r bir qaladag'ı tuwısqanlarımızg'a barayıq, olardın' hal-jag'dayın ko'reyik, – dedi.
37 Barnaba Mark dep atalatug'ın Yuxandı birge alıp ju'rmekshi boldı
38 Biraq Pavel Pamfiliyada o'zlerin taslap ketip, birlikte baslag'an isti dawam etpegen Marktı o'zleri menen birge alıp ju'riwdi maqul ko'rmedi.
39 Solay etip, olardın' arasında keskin tu'sinbewshilik bolıp, bir-birinen bo'lindi. Barnaba Marktı alıp, keme menen Kiprg'a ketti.
40 Al Pavel Silanı tan'ladı ha'm tuwısqanlar ta'repinen İyemizdin' miyrimine tapsırılg'annan son', jolg'a shıqtı.
41 Ol Siriya ha'm Kilikiya u'lkelerin aralap, iseniwshi ja'ma'a'tlerdi bekkemlep ju'rdi.
