Elshiler 22 bob
1 – Tuwısqanlarım ha'm ag'alarım! Endi sizlerge aytajaq, o'zimdi aqlawshı so'zlerimdi tın'lan'lar!
2 Paveldin' o'zlerine evreyshe so'ylegenin esitkende, olar burıng'ıdan beter tım-tırıs boldı. Pavel bılay dep dawam etti:
3 – Men yahudiymen. Kilikiyanın' Tarsus qalasında tuwılıp, usı Erusalim qalasında o'stim. Gamalieldin' qolı astında ata-babalarımızdın' nızamı boyınsha muqıyatlı tu'rde ta'rbiyalandım. Ha'zir sizlerdin' ha'mmen'iz sıyaqlı, men de Qudayg'a intalı xızmet ettim.
4 İysanın' jolı menen ju'riwshilerdi o'lgenshe quwdalap, erkek pe, hayal ma demesten, olardı baylap qamaqqa saldım.
5 Bas ruwxaniy menen barlıq aqsaqallar ken'esi de so'zlerimdi tastıyıqlay aladı. Men olardan Damasktag'ı yahudiylerge jazılg'an xat alıp, jolg'a shıqqan edim. Menin' maqsetim İysag'a isenetug'ın sol jerdegi adamlardı da baylap, jazalaw ushın Erusalimge a'keliw edi.
6 Men jolg'a shıg'ıp, Damaskqa jaqınlag'anımda, tu'sler shamasında tosattan aspannan tu'sken bir jarıq nur a'tirapımdı jarqıratıp jiberdi.
7 Men jerge jıg'ıldım ha'm bir dawıstın' mag'an: «Saul, Saul! Sen nege Meni quwdalap atırsan'?» – degenin esittim.
8 «Sen kimsen', İyem?» – dep soradım men. Ol mag'an: «Men – sen quwdalap atırg'an Nasıralı İysaman» – dedi.
9 Menin' janımdag'ılar nurdı ko'rse de, menin' menen So'yleskennin' so'zlerin tu'sinbedi.
10 «İyem, ne islewim kerek?» – dep soradım men. İyemiz mag'an: «Ornın'nan turıp, Damaskqa bar. Sag'an bekitilgen islerdin' ha'mmesi sol jerde aytıladı», – dedi.
11 Jan'ag'ı nurdın' saltanatlı jaqtısınan ko'zlerim ko'rmey qalg'anlıqtan, janımdag'ılar qolımnan uslap, meni Damaskqa jeteklep apardı.
12 Sol jerde Xananiya atlı bir dinshil adam bar edi. Xananiya sol jerdegi barlıq yahudiyler arasında jaqsı atı shıqqan adam bolıp, Muxaddes Nızam boyınsha jasaytug'ın edi.
13 Ol janıma kelip turdı da: «Tuwısqanım, Saul! Ko'zlerin' ko'rip ketsin!» – dedi. Menin' sol waqıtta-aq ko'zlerim ashılıp, onı ko'rdim.
14 Xananiya bılay dedi: «Ata-babalarımızdın' Qudayı O'zinin' erkin biliwin' ushın ha'm haq Adamdı ko'rip, Onın' awzınan shıqqan sesti esitiwin' ushın, seni tan'ladı.
15 Sebebi sen ko'rgenlerin'di ha'm esitkenlerin'di barlıq adamlarg'a ja'riyalap, Onın' gu'wası bolasan'.
16 Endi neni ku'tip otırsan'? Ornın'nan turıp, suwg'a shomıldırıl ha'm Onın' atın aytıp shaqırıp, gu'naların'nan tazalan!»
17 Men Erusalimge qaytıp kelip, İbadatxanada duwa etip otırg'anımda, ayrıqsha jag'dayg'a tu'sip, İyemizdi ko'rdim.
18 Ol mag'an: «Tezirek Erusalimnen ket! O'ytkeni bul jerdegi adamlar senin' Men tuwralı bergen gu'walıg'ın'dı qabıl etpeydi», – dedi.
19 Men Og'an bılay dedim: «İyem! Olar menin' ma'jilisxanamama'jilisxana ju'rip, Sag'an isenetug'ınlardı qamap, sabag'anımdı biledi.
20 Ja'ne de, Senin' gu'wan' Stepannın' qanı to'gilgende, men de sol jerde edim. Men onı o'ltirgenlerdin' kiyimlerin qarawıllap, olardın' isin maqullap turdım».
21 İyemiz mag'an: «Bar! Men seni uzaqqa, basqa milletlerge jiberemen», – dedi.
22 Adamlar Paveldi usı so'zlerine deyin tın'ladı. Biraq son'g'ı so'zlerdi esitkende: – Bunday adamdı jer betinen qurtıw kerek, ol jasawg'a ılayıqlı emes! – dep dawıslarının' barınsha baqıra basladı.
23 Olar usılay baqırısıp, ashıw menen kiyimlerin ılaqtırıp, aspang'a shan'-tozan' ko'terip turg'anda,
24 mın'bası Paveldi a'skeriy bo'limnin' ishine aparıwdı buyırdı. Xalıqtın' Pavelge qarsı ne ushın usılay baqırıp atırg'anın biliw ushın, onı qamshılap, tergewdi tapsırdı.
25 Qolların kerip, qayıs penen baylap atırg'anda, Pavel sol jerde turg'an ju'zbasıg'a: – Rim puqarasın hu'kim etpey turıp qamshılaw nızamg'a tuwrı kele me? – dedi.
26 Ju'zbası bunı esitkende, mın'basıg'a barıp xabar berdi de: – Ne isleyin dep atırsızlar? Bul adam – Rim puqarası eken-g'o, – dedi.
27 Sonda mın'bası Paveldin' janına kelip: – Mag'an aytshı, sen Rim puqarasımısan'? – dep soradı. – Awa, – dedi Pavel.
28 – Men bul puqaralıqqa ko'p aqsha menen eristim, – dedi mın'bası. – Al men Rim puqarası bolıp tuwıldım, – dedi Pavel.
29 Sonda Paveldi tergemekshi bolg'anlar da'rhal janınan shegindi. Paveldi baylatqan mın'bası da onın' Rim puqarası ekenin bilgende qorqıp ketti.
30 Erten'ine mın'bası yahudiylerdin' Paveldi ne ushın ayıplap atırg'anın anıq bilmekshi bolg'anlıqtan, onı kisenlerden bosattı da, bas ruwxaniyler menen pu'tkil joqarg'ı ken'estin' jıynalıwın buyırdı. Son'ınan Paveldi alıp kelip, olardın' aldında turg'ızıp qoydı.
