Elshiler 25 bob
1 Fest u'lkege ha'kimlik wazıypasına kelgennen son' u'sh ku'n o'tkende, ol Kesariyadan Erusalimge bardı.
2 Sonda bas ruwxaniyler menen yahudiylerdin' basshıları og'an Paveldin' u'stinen shag'ım jasadı.
3 Miyrimlilik ko'rsetip, Paveldi Erusalimge jiberiwin onnan jalınıp soradı. Al o'zleri Paveldi jolda o'ltirmekshi bolıp, til biriktirgen edi.
4 Fest olarg'a juwap berip, Paveldin' Kesariyadag'ı qamaqta ekenin ha'm o'zinin' de jaqında sol jerge baratug'ının ayttı da:
5 – Aran'ızda biyligi barlar menin' menen birge barıp, bul adam bir qılmıs islegen bolsa, onı ayıplasın, – dedi.
6 Fest olardın' janında segiz yamasa on ku'nnen artıq qalmay, Kesariyag'a qayttı. Erten'ine ol hu'kim gu'rsisine otırıp, Paveldi alıp keliwdi buyırdı.
7 Pavel kelgende, Erusalimnen barg'an yahudiyler onın' a'tirapın qorshap aldı da, og'an o'zleri da'lillep bere almaytug'ın ko'p awır ayıplar taqtı.
8 Pavel o'zin aqlap: – Men ya yahudiylerdin' nızamına, ya İbadatxanag'a, ya Rim patshasıQaysarg'a qarsı hesh qanday jınayat islegenim joq, – dedi.
9 Biraq yahudiylerge jag'ıng'ısı kelgen Fest Pavelge: – Erusalimge barıp, sol jerde usılar boyınsha menin' aldımda hu'kim etiliwdi qa'leysen' be? – dedi.
10 Pavel bılay dedi: – Men Qaysardın' hu'kim gu'rsisi aldında turman. Men usı jerde hu'kim etiliwim tiyis. Menin' yahudiylerge hesh qanday jamanlıq islemegenimdi o'zin'iz ju'da' jaqsı bilesiz.
11 Eger men ayıplı bolsam ha'm o'limge ılayıqlı bir na'rse islegen bolsam, o'limnen bas tartpas edim. Al eger bulardın' mag'an tag'ıp atırg'an ayıpları tiykarsız bolsa, onda hesh bir adamnın' meni olardın' qolına uslap beriwge haqısı joq. Men Qaysardın' hu'kimin talap etemen.
12 Sonda Fest ken'esgo'yleri menen ma'sla'ha'tleskennen son': – Sen Qaysardın' hu'kimin talap ettin', endi Qaysarg'a barasan', – dep juwap berdi.
13 Bir qansha ku'nnen son', Agrippa patsha menen Vernika Festti qutlıqlaw ushın Kesariyag'a keldi.
14 Olar sol jerde ko'p ku'n qalg'anlıqtan, Fest Paveldin' isin patshag'a bildirip bılay dedi: – Bul jerde Feliks qamaqta qaldırıp ketken bir adam bar.
15 Men Erusalimde bolg'anımda, yahudiylerdin' bas ruwxaniyleri menen aqsaqalları og'an ayıp tag'ıp, onı jazalawımdı talap qılg'an edi.
16 Men olarg'a: «Ayıplanıwshı o'z ayıplawshıları menen ju'zlespey turıp, og'an tag'ılıp atırg'an ayıplardan o'zin qorg'awg'a mu'mkinshilik bermesten, onı uslap beriw – rimlilerdin' a'detine qayshı keledi», – dep juwap berdim.
17 Sonlıqtan olar menin' menen bul jerge kelgende, men waqıttı bosqa jibermey, erten'ine-aq hu'kim gu'rsisine otırdım da, sol adamnın' alıp keliniwin buyırdım.
18 Biraq ayıplawshılar orınlarınan turg'anda, og'an men ku'tken ayıplardın' hesh birin taqpadı.
19 Tek olardın' o'z dini ha'm bir İysa atlı o'lgen, biraq Pavel tiri dep tastıyıqlag'an Adam haqqında ayırım tartısları bar eken.
20 Men bul ma'seleni qalay sheshiwdi bilmey albırap, Pavelden: «Erusalimge barıp, usılar boyınsha sol jerde hu'kim etiliwdi qa'leysen' be?» – dep soradım.
21 Biraq ol o'z isin Qaysardın' qarawın ha'm og'an deyin qamaqta qaldırılıwın talap etti. Sonlıqtan men onı Qaysarg'a jollawıma deyin qamaqta bolıwın buyırdım.
22 Sonda Agrippa Festke: – Bul adamdı men de tın'lag'ım keledi, – dedi. – Onı erten'-aq tın'laysız, – dedi Fest.
23 Erten'ine Agrippa menen Vernika ullı sa'n-saltanat penen kelip, mın'basılar ha'm qalanın' abıraylı adamları menen birlikte ra'smiy zalg'a kirdi. Festtin' buyrıg'ı boyınsha Pavel alıp kelindi.
24 Fest bılay dedi: – Patsha Agrippa ha'm usı jerdegi ha'mme adamlar! Sizler mına adamdı ko'rip tursızlar. Erusalimde de, bul jerde de, pu'tkil yahudiy xalqı onın' u'stinen mag'an shag'ım jasap: «Ol bunnan bılay jasamawı tiyis» – dep baqırısqan edi.
25 Biraq men onın' o'lim jazasına ılayıq hesh qanday is islemegenin anıqladım. Onın' o'zi Qaysardın' hu'kimin talap etkenlikten, onı Qaysarg'a jiberiwge qarar ettim.
26 Al mende bolsa, ol haqqında hu'kimdarg'a jazg'anday, belgili hesh na'rse joq. Sonlıqtan bul tergewdin' na'tiyjesinde mag'an jazıwg'a bir na'rse tabılıp qalar dep, onı sizlerdin' aldın'ızg'a, a'sirese, patsha Agrippa, sizin' aldın'ızg'a shıg'ardım.
27 O'ytkeni tutqındı Qaysarg'a jollap, og'an qoyılg'an ayıplardı bildirmew nadurıs bolar, dep oylayman.
