Elshiler 28 bob
1 Aman qalg'anımızdan son', atawdın' atının' Malta ekenin bildik.
2 Jergilikli adamlar bizlerge a'detten tıs adamgershilik ko'rsetti. Jawın jawıp, ku'n suwıq bolg'anlıqtan, olar ot jag'ıp, ha'mmemizdi jaqsı qabıl etti.
3 Pavel bir qushaq otın jıynap, ottın' u'stine saldı. Sonda ottın' ıssısınan qashqan bir uwlı jılan onın' qolına jabıstı.
4 Jergilikli adamlar Paveldin' qolına jılannın' asılıp turg'anın ko'rip, bir-birine: – Bul adam, so'zsiz, adam o'ltirgen qanxor eken. Ten'izden aman qalg'an bolsa da, a'dillik qudayı onın' tiri qalıwına jol qoymadı, – desti.
5 Biraq Pavel qolın silkip, jılandı ottın' ishine ılaqtırıp jiberdi ha'm hesh qanday zıyan ko'rmedi.
6 Olar Paveldin' denesinin' isip ketiwin yamasa birden o'lip qalıp, jerge jıg'ılıwın ku'tip tur edi. Biraq uzaq waqıt ku'tip, og'an hesh qanday zıyan kelmegenin ko'rgende, pikirlerin o'zgertip: «Ol bir quday», – desti.
7 Bizler turg'an jerdin' jaqınında atawdın' basshısı bolg'an Publiy atlı adamnın' jer-mu'lki bar edi. Ol bizlerdi u'yine qabıl etip, u'sh ku'n miyman qıldı.
8 Sol waqıtta Publiydin' a'kesinin' ıssılıg'ı ko'terilip, ishi o'tip awırıp jatırg'an edi. Pavel onın' janına barıp duwa etti de, qolların onın' u'stine qoyıp, shıpa berdi.
9 Usı waqıyadan son', atawdag'ı basqa awırıw adamlar da kelip, shıpa tabatug'ın edi.
10 Olar bizlerge ko'p hu'rmet ko'rsetti ha'm jolg'a shıg'ıp baratırg'anımızda kerekli na'rselerdi kemege ju'kledi.
11 U'sh aydan son', sol atawda qıslap qalg'an «Egiz qudaylar» dep atalatug'ın İskenderiyadan kelgen bir keme menen jolg'a shıqtıq.
12 Sirakuz qalasına barıp, u'sh ku'n qaldıq.
13 Ol jerden jolımızdı dawam etip, Regiumg'a keldik. Erten'ine qubladan ese baslag'an samaldın' ja'rdemi menen eki ku'nde Puteoliyge bardıq.
14 Ol jerden tuwısqanlarımızdı taptıq. Olardın' o'tinishi boyınsha, bizler olar menen birge bir ha'pte qaldıq. Aqırında bizler Rimge keldik.
15 Xabarımızdı esitken Rimdegi tuwısqanlarımız bizlerdi ku'tip alıw ushın Appiy maydanı ha'm «U'sh miymanxana» g'a deyin keldi. Pavel olardı ko'rgende Qudayg'a shu'kirlik etip, jigerlenip qaldı.
16 Rimge kelgenimizde, Pavelge o'zin qarawıllaytug'ın a'sker menen o'z aldına jasawg'a ruxsat etildi.
17 U'sh ku'nnen son', Pavel Rimdegi yahudiy jetekshilerin birge jıynalıwg'a shaqırdı. Olar jıynalg'anda, Pavel bılay dedi: – Tuwısqanlarım! Men xalqımızg'a yamasa ata-babalarımızdın' u'rpa'detlerine qarsı hesh na'rse islemesem de Erusalimde tutqın bolıp, rimlilerdin' qolına tapsırıldım.
18 Olar meni tergep bolg'annan son', bosatıp jibermekshi boldı. O'ytkeni mag'an o'lim jazasın beretug'ınday hesh qanday tiykar joq edi.
19 Biraq, yahudiyler bug'an qarsı shıqqanlıqtan, men Rim patshası-Qaysardın' hu'kimin talap etiwge ma'jbu'r boldım. Degen menen, bunı men o'z xalqımdı ayıplamaqshı bolıp islemedim.
20 Sonlıqtan sizlerdi bul jerge usılar haqqında so'ylesip, ushırasıwg'a shaqırdım. Sebebi men İzraildın' u'miti ushın mına shınjırlar menen baylang'anman.
21 Olar Pavelge: – Sen tuwralı Yahudiyadan xat almadıq, ol jerden kelgen o'zimizdin' adamlardın' hesh biri sen tuwralı jaman xabar da a'kelmedi yamasa jaman na'rse de aytpadı.
22 Biraq bizler senin' pikirin'di o'zin'nen esitiwdi qa'leymiz. O'ytkeni ha'mme jerde sen tiyisli bolg'an bul toparg'a qarsı shıg'ıp atırg'anın bilemiz, – dedi.
23 Olar Pavel menen bir ku'ndi belgilep, sol ku'ni ko'p adamlar menen birge ol bolıp atırg'an jerge keldi. Pavel azannan keshke deyin olarg'a Qudaydın' Patshalıg'ı tuwralı gu'walıq berip, tu'sindirdi. Muwsanın' Nızamına ha'm payg'ambarlardın' Jazıwlarına tiykarlanıp, olardı İysa haqqında aytılg'anlarg'a isendiriwge ha'reket etti.
24 Ayırımları Paveldin' so'zlerine isendi, al bazıları isenbey qaldı.
25 O'z ara bir kelisimge kele almay, Pavel mına son'g'ı so'zlerin aytıp turg'anda olar kete basladı: – Muxaddes Ruwx İyshaya payg'ambar arqalı ata-babaların'ızg'a bılay so'ylep, durıs aytqan:
26 «Bul xalıqqa barıp, mınalardı ayt: Tın'lap esitesizler, biraq hesh tu'sinbeysizler, Qaraysızlar, biraq hesh ko'rmeysizler.
27 Sebebi bul xalıqtın' kewli qaysar bolıp, Qulaqları pitip qalg'an, olar ko'zlerin de jumıp alg'an. Olay bolmag'anda, olardın' ko'zleri ko'rer edi, Qulaqları esiter edi, kewilleri tu'siner edi. Olar Mag'an qaytıp kelse, Men olarg'a shıpa berer edim».
28 Mınanı bilip qoyın'lar:
29 Quday O'zinin' bul qutqarılıwın basqa milletlerge berdi. Olar bunı qabıl aladı.
30 Pavel kireyge alg'an jayında tolıq eki jıl bolıp, o'zin ko'riwge kelgenlerdin' ha'mmesin qabıl etti.
31 Ol batıllıq penen, hesh bir tosqınlıqsız Qudaydın' Patshalıg'ı tuwralı ja'riyalap, İyemiz İysa Masix haqqında ta'lim berdi.
