Elshiler 5 bob
1 Al Xananiya atlı adam hayalı Safira menen mal-mu'lkin satıp,
2 aqshanın' bir bo'legin jasırıp qaldı da, qalg'an bo'legin elshilerdin' qolına a'kelip saldı. Bunnan onın' hayalının' da xabarı bar edi.
3 Sonda Petr og'an bılay dedi: – Xananiya, nege shaytang'a ju'regin'nen orın berip, Muxaddes Ruwxtı aldadın' ha'm satılg'an jerdin' aqshasının' bir bo'legin o'zin'e alıp qaldın'?
4 Jer satılmay-aq sag'an tiyisli emes pe edi? Satılg'annan son' da, aqshasın qa'legenin'she jumsawg'a erkli emes pe edin'? Nege bunday is islewge niyet ettin'? Sen adamlardı emes, Qudaydı aldadın'-g'o.
5 Xananiya bul so'zlerdi esitiwden-aq jerge jıg'ılıp, jan tapsırdı. Bunı esitkenlerdin' ha'mmesin ku'shli qorqınısh biyledi.
6 Jas jigitler orınlarınan turıp, onın' denesin kepinledi de, alıp ketip jerledi.
7 Aradan shama menen u'sh saattay o'tkende, bolg'an waqıyadan xabarsız Xananiyanın' hayalı ishke kirip keldi.
8 Petr og'an: – Mag'an aytshı, jerdi usınsha aqshag'a sattın'lar ma? – dedi. – Awa, sog'an, – dedi hayal.
9 Petr og'an bılay dedi: – Nege İyemizdin' Ruwxın sınap ko'riwge kelistin'ler? A'nekey, ku'yewin'di jerlegenler esikten kirip kiyatır. Olar seni de alıp ketedi.
10 Hayal sol waqıtta-aq Petrdin' ayag'ına jıg'ılıp, jan tapsırdı. İshke kirgen jas jigitler onın' o'lip qalg'anın ko'rip, sırtqa alıp ketti de, ku'yewinin' qasına jerledi.
11 Pu'tkil iseniwshiler ja'ma'a'tin ha'm bolg'an waqıyalardı esitkenlerdin' ha'mmesin ku'shli qorqınısh biyledi.
12 Xalıq arasında elshiler arqalı ko'p ka'ramatlı belgiler ko'rsetilip, tan' qalarlıq isler islenetug'ın edi. İseniwshilerdin' ha'mmesi Sulaymannın' aywanında jıynalıp turatug'ın edi.
13 Sırttan olarg'a qosılıwg'a hesh kimnin' batılı barmaytug'ın edi, biraq xalıq olarg'a ko'p alg'ıslar aytatug'ın edi.
14 Ja'ne de, İyemizge isenip, iseniwshilerge qosılg'an er ha'm hayallardın' sanı barg'an sayın arta berdi.
15 Ha'tte, Petr o'tip baratırg'anda, hesh bolmasa onın' sayası awırıwlardın' birinin' u'stine tu'ssin dep, olardı ko'shelerge shıg'arıp, ka'tler ha'm to'seklerdin' u'stilerine jatqızıp qoydı.
16 Erusalimnin' do'geregindegi qalashalardan da ko'p adamlar jıynalıp, awırıwlardı ha'm jawız ruwxlardan azap shekkenlerdi alıp keletug'ın edi. Olardın' ha'mmesi shıpa tabatug'ın edi.
17 Sonda bas ruwxaniy ha'm onın' ta'repdarlarının' ha'mmesi, yag'nıy saddukey toparının' ag'zalarının' qızg'anıshtan ishleri janıp,
18 elshilerdi uslattı da, ma'mleket qamaqxanasına qamatıp tasladı.
19 Biraq tu'nde İyemizdin' bir perishtesi qamaqxananın' qapıların ashıp, olardı sırtqa shıg'ardı da:
20 – Barın'lar, İbadatxanada turıp, bul jan'a o'mir tuwralı so'zlerdin' barlıg'ın xalıqqa aytın'lar, – dedi.
21 Elshiler aytılg'andı tın'lap, tan' sa'ha'rde İbadatxanag'a bardı da, ta'lim bere basladı. Sol waqıtta bas ruwxaniy ha'm onın' ta'repdarları kelip, joqarg'ı ken'estin' adamların, yag'nıy İzrail xalqının' barlıq aqsaqalların jıynalıwg'a shaqırdı ha'm elshilerdi alıp keliw ushın qamaqxanag'a adam jiberdi.
22 Biraq, saqshılar qamaqxanag'a barg'anda elshilerdi tappay, izlerine qaytıp keldi de, mınalardı xabarladı:
23 – Qamaqxananın' bekkem etip jabılg'anın, qapılardın' awzında qarawıllardın' turg'anın ko'rdik. Biraq, qapılardı ashqanımızda, ishten hesh kimdi tappadıq.
24 Bul so'zlerdi esitken İbadatxana saqshılarının' basshısı menen bas ruwxaniyler: «Bul ne bolg'anı» desip, albırasıp qaldı.
25 Sonda olardın' qasına bir adam kelip: – A'ne, sizler qamaqqa salg'an adamlar İbadatxanada ta'lim berip tur, – dep xabarladı.
26 Solay etip, saqshılardın' basshısı saqshılar menen birge ketip, elshilerdi alıp keldi. Biraq xalıqtın' o'zlerin tas penen urıwınan qorqıp, olarg'a zorlıq islemedi.
27 Olar elshilerdi alıp kelip, joqarg'ı ken'estin' aldında turg'ızıp qoydı. Bas ruwxaniy elshilerdi sorawg'a tutıp:
28 – Bul at penen ta'lim bermen', dep qatan' buyırg'an edik-g'o. Biraq sizler o'z ta'liymatın'ızdı pu'tkil Erusalim qalasına jayıpsızlar. Bul Adamnın' qanının' to'giliwine de bizlerdi juwapker qılmaqshısızlar, – dedi.
29 Petr menen basqa elshiler bılay dep juwap berdi: – Adamlarg'a emes, Qudayg'a boysınıw tiyis!
30 Ata-babalarımızdın' Qudayı sizler atanaq ag'ashqa shegelep o'ltirgen İysanı qayta tiriltti.
31 İzraildın' ta'wbe etip, gu'nalarının' keshiriliwi ushın, Quday Onı Ko'sem ha'm Qutqarıwshı qılıp, O'zinin' on' ta'repine ko'terdi.
32 Bizler bul islerdin' gu'wasımız. Sonday-aq, Qudaydın' O'zine boysınatug'ınlarg'a beretug'ın Muxaddes Ruwxı da bularg'a gu'wa.
33 Joqarg'ı ken'es ag'zaları bunı esitkende ashıwg'a minip, elshilerdi o'ltirmekshi boldı.
34 Biraq, pu'tkil xalıqtın' hu'rmetine iye bolg'an nızam mug'allimi Gamaliel atlı bir parisey ken'este ornınan turıp, elshilerdi azmaz waqıtqa sırtqa shıg'arıp turıwdı buyırdı.
35 Son'ınan ol ken'es ag'zalarına bılay dedi: – İzraillılar! Bul adamlarg'a isleyjaq isin'izdi abaylap islen'ler.
36 Sebebi bunnan burın o'zin ullı dep esaplag'an Teudas atlı bir adam shıqqan edi. Og'an to'rt ju'zge shamalas adam qosıldı. Biraq ol o'ltirilip, izine ergenlerdin' ha'mmesi tarqap, joq bolıp ketti.
37 Onnan son', xalıqtın' esabı alıng'an ku'nlerde galilalı Yahuda shıg'ıp, bir topar adamlardı izine ertti. Ol da o'ltirilip, izine ergenlerdin' ha'mmesi tarqap ketti.
38 Sonlıqtan endi sizlerge aytatug'ınım mınaw: bul adamlarg'a tiymen'ler, olardı tınıshına qoyın'lar. O'ytkeni bul is-ha'reket adamlardan bolsa, ol iske aspaydı.
39 Biraq Qudaydan bolsa, bul adamlardı joq qıla almaysızlar. Ja'ne de, Qudayg'a qarsı urısıwshı bolıp qalıwın'ız da mu'mkin.
40 Ken'es ag'zaları Gamalieldin' ma'sla'ha'tin qabıl etti de, elshilerdi ishke shaqırtıp, olardı qamshılattı ha'm İysanın' atı menen waz aytpawdı buyırıp, bosatıp jiberdi.
41 Elshiler İysanın' atı sebepli masqaralanıwg'a miyasar bolg'anı ushın joqarg'ı ken'esten quwanıshlı tu'rde shıg'ıp ketti.
42 Olar ha'r ku'ni İbadatxanada ha'm u'yme-u'y ta'lim beriwin, İysanın' Masix ekeni haqqında Xosh Xabardı ja'riyalawın toqtatqan joq.
