Yaqıp 2 bob
1 Ha'y, tuwısqanlarım, ullı İyemiz İysa Masixqa isenimi bar sizler adamlardı alalaman'lar.
2 Eger sizlerdin' jıynalısın'ızg'a altın ju'zikli, sa'nli kiyimler kiygen bir adam menen jupını kiyim kiygen bir jarlı adam kelse,
3 sizler sa'nli kiyim kiygen adamg'a hu'rmet ko'rsetip: «Siz bul jerge, jaqsı jerge otırın'», al jarlı adamg'a bolsa: «Sen ana jerde tur» yamasa: «Ayaq betimde otır» desen'ler,
4 aran'ızda alalıq jasap, jaman niyetli hu'kim shıg'arıwshılar bolıp qalmaysızlar ma?
5 Qulaq salın'lar, su'yikli tuwısqanlarım: Quday bul du'nyada jarlı bolg'anlardı isenimde bay bolıwı ha'm O'zin su'ygenlerge wa'de etken Patshalıg'ının' miyrasxorları bolıwı ushın tan'lamadı ma?
6 Biraq sizler jarlını biyabıray qıldın'ız-g'o. Sizlerge zulımlıq jasap atırg'an baylar emes pe? Sizlerdi hu'kimxanalarg'a su'yrep aparatug'ın da baylar emes pe?
7 Sizlerge berilgen qa'dirli attı mazaq qılıwshılar da olar emes pe?
8 Muxaddes Jazıwdag'ı: «O'zin'di su'ygenin' sıyaqlı, janın'dag'ı adamdı da su'y», – degen baslı nızamdı haqıyqattan orınlasan'lar, jaqsı qılasızlar.
9 Biraq adamlardı alalasan'lar, gu'na islep atırg'an bolasızlar ha'm Muxaddes Nızam aldında jınayatshı sıpatında jazalanasızlar.
10 O'ytkeni kim de kim Muxaddes Nızamdı tolıg'ı menen orınlap, tek bir na'rsede ayıplı bolsa, ol pu'tkil Muxaddes Nızamg'a qarsı gu'nakar boladı.
11 Sebebi «Neke hadallıg'ın buzba», – degen Quday, «Adam o'ltirme», – de degen. Eger sen neke hadallıg'ın buzbasan' da, biraq adam o'ltirsen', Muxaddes Nızamg'a qarsı jınayatshı bolasan'.
12 Azatlıq beriwshi nızam boyınsha hu'kim etiletug'ınlar sıyaqlı so'ylen'ler ha'm is tutın'lar.
13 O'ytkeni hu'kim – rehimsiz adamg'a rehimsiz. Al rehim hu'kimnen u'stin.
14 Tuwısqanlarım, eger kim de kim isenimi barlıg'ın aytıp, jaqsı isler qılmasa, ne paydası bar? Bunday isenim onı qutqara ala ma?
15 Bir er yamasa hayal tuwısqanımız jalan'ash qalıp, ku'ndelik azıg'ına zar bolsa,
16 aran'ızdag'ı birin'iz olarg'a: «Aman-esen barın', jılının' ha'm toyın'» dese, biraq denesine kerekli zatlar bermese, bunnan ne payda?
17 Sol sıyaqlı, islersiz isenim de o'z-o'zinen o'li.
18 Biraq birew: «Senin' isenimin' bar, menin' islerim bar. Mag'an islersiz isenimin'di ko'rset, al men sag'an isenimimdi islerim arqalı ko'rseteyin», – deydi.
19 Sen Qudaydın' jalg'ız ekenine isenesen' be? Jaqsı qılasan'. Jinler de bug'an isenip, qaltırasadı.
20 Ha'y, aqılsız adam, islersiz isenimin'nin' paydasız ekenin biliwdi qa'leysen' be?
21 Babamız İbrayım ulı Isaqtı qurbanlıq shalınatug'ın orıng'a bag'ıshlap, isleri menen aqlanbadı ma?
22 Ko'rip turg'anın'day, isenimi onın' isleri menen ha'reket etti. İsenimi isleri menen ka'mal taptı.
23 Solay etip, «İbrayım Qudayg'a isendi ha'm sol sebepli aqlandı», – dep jazılg'an Muxaddes Jazıw orınlanıp, ol Qudaydın' dostı dep ataldı.
24 Ko'rip tursızlar, adam tek isenimi menen emes, isleri menen aqlanadı.
25 Sol sıyaqlı, jansızlardı qabıl etip, olardı basqa joldan jibergen buzıq hayal Rahab ta o'z isleri menen aqlanbadı ma?
26 Ruwxsız dene o'li bolg'anı sıyaqlı, islersiz isenim de o'li.
