Yaqıp 5 bob
1 Tın'lan'lar endi, ha'y baylar, basın'ızg'a tu'setug'ın baxıtsızlıqlar sebepli o'kirip jılan'lar!
2 Baylıg'ın'ız shirip, kiyimlerin'izdi ku'ye jegen.
3 Altın ha'm gu'mislerin'iz tat basqan. Olardın' tatı sizlerge qarsı gu'walıq berip, denen'izdi ot sıyaqlı jeydi. Sizler bul aqırg'ı ku'nlerde de baylıq u'stine baylıq jıynadın'lar.
4 Sizler eginlerin'izdi org'an jumısshılardın' is haqısın jep qoydın'lar. Mine, sol oraqshılardın' dadı Qu'diretli İyemizdin' qulag'ına jetti.
5 Sizler jer ju'zinde molshılıqta jasap, ka'yip-sapa shektin'ler. Bawızlanatug'ın ku'nde o'zlerin'izdi semirttin'ler.
6 Sizler o'zlerin'izge qarsı turmag'an haq adamlardı hu'kim etip o'ltirdin'ler.
7 Solay etip, tuwısqanlarım, İyemiz kelgenshe, sabırlı bolın'lar! A'ne, diyxan sabırlıq etip, birinshi ha'm son'g'ı jawınlar jawg'ansha, jerdin' qımbatlı zu'ra'a'tin ku'tip atır.
8 Sizler de sabırlı bolıp, bekkem turın'lar! O'ytkeni İyemizdin' keletug'ın waqtı jaqın.
9 Tuwısqanlar, hu'kim etilmewin'iz ushın bir-birin'izge qarsı narazılıq bildirmen'ler. Mine, hu'kim etiwshi İyemiz qapı aldında tur.
10 Ha'y, tuwısqanlar, Qudaydın' atınan so'ylegen payg'ambarlardın' qıyınshılıqlarda sabırlıq etkeninen o'rnek alın'lar.
11 Sabırlıq etkenlerdi bizler baxıtlı dep esaplaymız. Sizler Ayuptın' sabırlıg'ı haqqında esittin'ler. Son'ında İyemizdin' ol ushın neler islegenin de bilesizler. İyemiz ju'da' miyrim-sha'pa'a'tli ha'm rehimli.
12 Ha'y, tuwısqanlarım! En' baslısı, ant ishpen'ler. Ya aspan menen, ya jer menen, ya basqa na'rse menen ant ishpen'ler. Tek «awa» n'ız awa, «yag'» ın'ız yaq bolsın. Sonda hu'kim etilmeysizler.
13 Aran'ızda azap shegip atırg'an bar ma? Ol duwa etsin. Ruwxı ko'terin'ki adam bar ma? Ol Qudayg'a alg'ıs-maqtaw qosıg'ın aytsın.
14 Aran'ızda awırıw adam bar ma? Ol iseniwshiler ja'ma'a'tinin' aqsaqalların shaqırsın. Olar İyemiz İysanın' atı menen onı may menen sılap, ol ushın duwa etsin.
15 İsenim menen etilgen duwa awırıwg'a shıpa beredi ha'm İyemiz onı ayaqqa turg'ızadı. Eger ol gu'na islegen bolsa, gu'nası keshiriledi.
16 Solay etip, shıpa tabıwın'ız ushın, bir-birin'izdin' aldın'ızda gu'naların'ızdı moyınlan'lar ha'm bir-birin'iz ushın duwa etin'ler. Haq adamnın' duwası ju'da' ku'shli ta'sirge iye.
17 İliyas ta bizler sıyaqlı bir adam edi. Jawın jawmasın dep, ol ku'shli duwa etkende, jerge u'sh jıl, altı ay jawın jawmadı.
18 Ol ja'ne duwa etti. Sonda aspannan jawın jawıp, jer o'nim berdi.
19 Ha'y, tuwısqanlarım! Aran'ızda bir adam haqıyqat jolınan adassa, birin'iz onı haqıyqatqa qaytarsa,
20 bilsin, bir gu'nakardı nadurıs joldan qaytarg'an adam bir jandı o'limnen qutqarg'an ha'm ko'p gu'nalardı juwg'an boladı.
