1 Petr 3 bob
1 Ha'y hayallar, Masix Qudayg'a boysıng'anday, sizler de ku'yewlerin'izge boysının'lar.
2 Sonda olardın' geybirewleri Qudaydın' so'zine qulaq aspasa da, sizlerdin' Qudaydan qorqıp, pa'k o'mir su'rip atırg'anın'ızdı ko'rip, so'zlerin'iz arqalı emes, al siz, hayallardın' u'lgili o'mirin'iz arqalı qolg'a kirgizilip, iseniwshi boladı.
3 Sulıwlıg'ın'ız tek sırtqı bezeniwlerden: a'sheko'ylengen shashlar, tag'ılg'an altınlar ha'm sa'nli kiyimlerden g'ana ibarat bolmasın.
4 Al sulıwlıg'ın'ız sırlı bolg'an ishki du'nyan'ızdan, yag'nıy jumsaq ha'm tınısh bolg'an jog'almaytug'ın ruwxıy go'zzallıqtan ibarat bolsın. Bul Quday aldında ju'da' qımbatlı.
5 O'tmishte Qudaydan u'mit etken muxaddes hayallar da o'z ku'yewlerine boysınıp, usılay bezengen.
6 Solardın' biri Sara da o'z ku'yewi İbrayımdı «xojayınım» dep atap, og'an boysındı. Eger sizler de jaqsılıq islep, hesh qanday qorqınıshqa berilmesen'iz, Saranın' qızları bolasızlar.
7 Ha'y ku'yewler, sol sıyaqlı sizler de hayalların'ızdı jaqsı tu'sinip jasan'lar. Olardın' na'zik ekenin ha'm ma'n'gilik o'mirdi sizler menen birge miyras etip alatug'ının bilip, olardı hu'rmet etin'ler. Solay etsen'iz, duwa etkenin'izde tosqınlıq bolmaydı.
8 Juwmaqlastırıp aytqanda, ha'mmen'iz bir niyet penen birlesin'ler. Basqalardın' quwanısh ha'm qayg'ısın bo'lisin'ler. Bir-birin'izdi tuwısqanlarsha su'yin'ler. Qayırqom ha'm kishipeyil bolın'lar.
9 Jamanlıqqa jamanlıq, g'arg'ısqa g'arg'ıs penen juwap qaytarman'lar. Kerisinshe, jaqsılıq penen juwap qaytarın'lar. Sebebi Quday sizlerdi bul ushın shaqırg'an.
10 «Kim de kim o'mirdi su'yip, Jaqsı ku'nler keliwin qa'lese, Tilin jaman so'zden, Awzın o'tirik so'z aytıwdan tıysın.
11 Jamanlıqtan qashıp, Jaqsılıq islesin. Tınıshlıq izlep, Onı ornatıwg'a umtılsın.
12 O'ytkeni Qudaydın' ko'zleri haq adamlarda, Onın' qulag'ı olardın' jalbarınıwların esitedi. Biraq Quday jamanlıq İsleytug'ınlarg'a qarsı turadı».
13 Jaqsılıq islewge intalı bolsan'ız, kim sizlerge jamanlıq isleydi?
14 Haq islerin'iz ushın azap shegip atırg'an bolsan'ız, sizler baxıtlısızlar! Adamlardın' qorqıtqanınan qorqpan'lar ha'm qa'weterlenben'ler.
15 Masixtı «İyemiz» dep, kewillerin'izde ayrıqsha qa'sterlen'ler. Sizlerdegi u'mit haqqında sorag'an ha'r bir adamg'a juwap beriwge ha'mme waqıt tayar bolın'lar.
16 Degen menen, bunı mu'la'yimlilik penen, hu'rmet ko'rsetip islen'ler. Masixqa tiyisli bolg'an sizlerdin' jaqsı ju'ris-turısın'ızdı jamanlap mazaq etetug'ınlar uyalıp qalıwı ushın, hu'jdanın'ızdı taza tutın'lar.
17 Jaqsılıq etip azap shegiw Qudaydın' qa'lewi bolsa, bul jamanlıq islep azap shegiwden jaqsıraq.
18 Masixtın' O'zi de haq bola tura, nahaqlar ushın azap shekti. Ol bizlerdi Qudayg'a alıp keliw ushın, gu'nalarımız ushın bir ma'rtebe qurban boldı. Denesi o'ltirilse de, Ol ruwxta tirildi.
19 Ol, ha'tte, qamaqta bolg'an ruwxlarg'a da barıp, O'z jen'isin ja'riyaladı.
20 A'yyemgi waqıtları Nuxtın' zamanında keme sog'ılg'anda, Quday adamlardın' ta'wbe etiwin* sabırlılıq penen ku'tse de, olar Og'an boysınbag'an edi. Sol kemege az g'ana adam, yag'nıy segiz adam minip, suwdan qutqarıldı.
21 Bul – İysa Masixtın' qayta tiriliwi arqalı ha'zir sizlerdi qutqaratug'ın suwg'a shomıldırılıwdın' tımsalı. Suwg'a shomıldırılıw deneni kirden tazalaw emes, al Qudaydan pa'k hu'jdan soraw degendi bildiredi.
22 Masix aspang'a ko'terilip, Qudaydın' on' jag'ında otır. Og'an perishteler, aspandag'ı biylewshiler ha'm ku'sh iyeleri boysındı.
