2 Petr 2 bob
1 Biraq, burın İzrail xalqı arasında jalg'an payg'ambarlardın' bolg'anı sıyaqlı, sizlerdin' aran'ızda da jalg'an ustazlar boladı. Olar aran'ızg'a jasırın tu'rde azg'ın ta'liymatlar kirgizip, ha'tte, o'zlerin O'z qanın to'lep satıp alg'an İyesin de ta'n almaydı. Solay etip, bundaylardın' is-ha'reketi olardı tez arada nabıt bolıwg'a alıp keledi.
2 Ko'p adamlar olardın' buzıqlıg'ına eredi. Olar sebepli haqıyqat jolına til tiyedi.
3 Olar na'psiqawlıq penen, o'zleri oylap tapqan jalg'an so'zler aytıp, sizlerden paydalanadı. Olardın' hu'kimi a'welden-aq tayar turg'an bolıp, olar ko'p keshikpey nabıt etiledi.
4 Sebebi Quday gu'na islegen perishtelerdi de ayamag'an. Olardı hu'kim etiletug'ın ku'nge deyin saqlansın dep, tas tu'nek dozaqqa ılaqtırıp, qaran'g'ılıqqa qamap qoyıptı.
5 Quday qudaysızlardın' du'nyasına suw tasqının jibergende, a'yyemgi du'nyanı da ayamadı. Biraq, haqıyqatlıq jarshısı bolg'an Nuxtı ha'm onnan basqa jeti adamdı aman saqlap qaldı.
6 Sodom ha'm Gomora qalaların da hu'kim etip, ku'lge aylandırdı. Bul arqalı keleshekte qudaysızlardın' basına tu'setug'ınlardı mısal etip ko'rsetti.
7 Al ar-namıssız adamlardın' buzıqlıg'ınan azap shekken haq adam Luttı Quday qutqardı.
8 Olardın' arasında jasag'an bul haq adamnın' olardın' nahaq islerin ko'rip ha'm esitip turıp, pa'k kewli ku'n sayın qıynalatug'ın edi.
9 Solay etip, Quday O'z jolı menen ju'retug'ın adamlardı qıyınshılıqlardan qalay qutqarıwdı ha'm nahaq adamlardı hu'kim shıg'arılatug'ın qıyamet-qayım ku'nine deyin qalay saqlap, jazalawdı biledi.
10 A'sirese o'zinin' gu'nakar ta'biyatının' buzıq qa'lewlerine berilip, Qudaydın' biyligin mensinbeytug'ın nahaq adamlardın' ta'g'diri usılay boladı. Sol sıyaqlı, uyatsız ha'm o'jet adamlar bolg'an jalg'an ustazlar ullılıqqa iye bolg'anlarg'a til tiygiziwden qorqpaydı.
11 Perishtelerdin' ku'sh ha'm qu'direti jalg'an ustazlardan anag'urlım ullıraq bolsa da, perishteler Quday aldında olardı masqaralap ayıplamaydı.
12 Biraq bul jalg'an ustazlar o'zleri tu'sinbeytug'ın zatlarg'a til tiygizedi. Uslap alınıp nabıt qılınıw ushın tuwılg'an sanasız ha'm ta'biyg'ıy sezim boyınsha jasaytug'ın haywanlarday bolg'an olar sol haywanlar sıyaqlı nabıt boladı.
13 Olar islegen jaman islerine ılayıq jaza aladı. Bular ku'ndiz ayshı-a'shiretke beriliwdi o'mirdin' mazmunı dep biledi. Sizlerdin' ju'zin'izdi qara qılıp, daq tu'siretug'ın bul adamlar sizler menen birge zıyapatta otırg'anda, o'z o'tiriginen ra'ha'tlenedi.
14 Olardın' ko'zleri buzıqshılıqqa tolg'an bolıp, olar u'zliksiz gu'na isleydi. İsenimi ha'lsiz adamlardı joldan azg'ıratug'ın bul adamlar – na'psiqaw ha'm g'arg'ıs urg'an adamlar.
15 Tuwrı joldı taslap adasqan olar nahaq jol menen payda ko'riwdi jaqsı ko'rgen Bosor ulı Bilamnın' jolın tuttı.
16 Biraq ol islegen gu'nası ushın a'shkara etilgen edi: tilsiz eshek tilge kirdi, ol adamday bolıp so'ylep, payg'ambardın' aqılsız isine tosqınlıq jasag'an edi.
17 Bul adamlar suwsız bulaqlar, dawıl aydag'an duman. Olar ushın tas tu'nek qaran'g'ılıq tayar tur.
18 O'ytkeni olar nadurıs jol menen ju'retug'ın adamlardan jan'a g'ana qutılg'anlardı bos ha'm lap so'zler menen aldap, gu'nakar ta'biyattın' buzıq qa'lewlerine baslaydı.
19 O'zleri azg'ınlıqtın' qulı bola tura, olarg'a azatlıqtı wa'de etedi. Sebebi adam neden jen'ilse, sonın' qulı boladı-g'o.
20 Adamlar İyemiz ha'm Qutqarıwshımız İysa Masixtı bilip, du'nyanın' napa'kliklerinen qutılg'annan son', ja'ne sol na'rselerdin' duzag'ına tu'sip, olardan jen'ilse, onda keyingi awhalı burıng'ıdan da beter boladı.
21 O'ytkeni haqıyqatlıq jolın bilgennen son', berilgen muxaddes buyrıqtan ju'z burg'annan go're, bul joldı hesh bilmegen olar ushın jaqsıraq bolar edi.
22 Olardın' o'mirinde ushırasatug'ın bunday awhalg'a mına naqıl so'zler tuwrı keledi: «İyt o'z qusıg'ına qaytadı, Shoshqa juwındırılg'annan son', Barıp batpaqqa awnaydı».
