2 Petr 3 bob
1 Su'yikli tuwısqanlarım, bul menin' sizlerge jazıp atırg'an ekinshi xatım.
2 Men eki xatımda da muxaddes payg'ambarlardın' aldın ala aytqan so'zleri ha'm Qutqarıwshı İyemizdin' elshileri arqalı bergen buyrıg'ın eske tu'siriwin'iz ushın sizlerde pa'k oy-pikirlerdi oyatıwg'a ha'reket ettim.
3 En' aldı menen mınanı bilip qoyın'lar: du'nyanın' aqırg'ı ku'nlerinde o'z jaman qa'lewlerine eretug'ın mazaq etiwshiler payda boladı. Olar sizlerdi mazaq qılıp:
4 «İyen'izdin' qaytıp kelemen degen wa'desi qa'ne? Ata-babalarımız du'nyadan o'tkennen beri, ha'mme na'rse qalay jaratılg'an bolsa, ele solay turıptı-g'o», – deydi.
5 Sebebi olar Qudaydın' so'zi menen aspannın' ju'da' a'yyemgi waqıtlarda bar bolg'anın ha'm jerdin' suw arqalı suwdan jaratılg'anın jortag'a bilmegendey boladı.
6 Sol eski du'nya da usı suw tasqınınan nabıt bolg'an edi.
7 Al ha'zirgi aspan ha'm jer bolsa, otta janıw ushın Qudaydın' sol so'zi menen saqlanıp, qudaysız adamlardın' hu'kim etilip nabıt bolatug'ın ku'nine shekem qorg'alıp turıptı.
8 Su'yikli tuwısqanlarım, biraq tek mınanı esten shıg'arman'lar: İyemizdin' na'zerinde bir ku'n mın' jılday, mın' jıl bir ku'ndey.
9 Ayırımlar keshikti dep esaplag'anday, İyemiz wa'desin orınlawdı keshiktirip atırg'an joq. Kerisinshe, Ol hesh kimnin' nabıt bolıwın qa'lemey, ha'r bir adam ta'wbe etsin dep, sizler ushın sabırlılıq penen ku'tip turıptı.
10 Degen menen, İyemizdin' qaytıp keletug'ın ku'ni urı sıyaqlı ku'tilmegende keledi. Sol ku'ni aspan ullı gu'rsildi menen joq boladı, aspan deneleri janıp ketedi, jer ha'm jer betindegi ha'r bir na'rse janıp ku'lge aylanadı.
11 Ha'mme na'rse usı ta'rizde joq bolıp ketetug'ın bolsa, sizler qanday adamlar bolıwın'ız za'ru'r? Sizler muxaddes bolıp jasap, Qudaydın' jolı menen ju'riwin'iz kerek.
12 Qudaydın' ku'ninin' keliwin sag'ına ku'tip, onın' keliwin tezletiwin'iz lazım. O'ytkeni sol ku'ni aspan janıp joq boladı, aspan deneleri de ku'shli ıssıdan erip ketedi.
13 Biraq bizler Qudaydın' wa'desi boyınsha haqlıq ornag'an jan'a aspan menen jan'a jerdi ku'temiz.
14 Sonlıqtan, ha'y su'yikli tuwısqanlarım, usılardı ku'tip ju'rgen ekensiz, Qudaydın' aldında kemshiliksiz ha'm minsiz bolıwg'a bar ku'shin'iz benen ha'reket etip, tınısh jasan'lar.
15 Su'yikli tuwısqanımız Paveldin' de o'zine berilgen danalıg'ı menen sizlerge jazg'anınday, İyemizdin' sabırlılıg'ın qutqarılıw pursatı dep esaplan'lar.
16 Pavel barlıq xatlarında usı haqqında so'z etedi. Onın' xatlarında tu'siniwge qıyın bolg'an bazı bir jerler bar. Nadan ha'm tıyanaqsız adamlar basqa Muxaddes Jazıwlardı burmalag'anı sıyaqlı, bulardı da burmalaydı. Usı is-ha'reketleri olardı nabıt bolıwg'a alıp keledi.
17 Solay etip, ha'y su'yikli tuwısqanlarım, bulardı aldın ala bilip qoyın'lar, ar-namıssız adamlarg'a erip, o'zlerin'izdin' bekkem negizin'izdi joytıp qoymawın'ız ushın saq bolın'lar.
18 İyemiz ha'm Qutqarıwshımız İysa Masixtın' miyrimine bo'lenip, Onı biliwde o'sip barın'lar. Ha'zir ha'm ma'n'gige Og'an dan'q bolsın! Awmiyin.
