1 «Eger de bir adam u'ylenip, keyin ala hayalınan shermendelik bir na tawıp, onı unatpay qalsa, hayalına talaq xat jazıp berip, onı u'yinen shıg'arıp jiberiwi mu'mkin
2 Hayal ku'yewinin' u'yinen ketkennen keyin, basqa birewge turmısqa shıqsa,
3 ekinshi ku'yewi de onı unatpay qalıp, ol da og'an talaq xat jazıp berip, u'yinen shıg'arıp jiberse yamasa sol ekinshi ku'yewi o'lip qalsa,
4 jırasqan birinshi ku'yewi hayalg'a qaytadan u'yleniwine bolmaydı. Sebebi hayal haramlang'an. Eger u'ylense, bunnan Jaratqan İye jerkenedi. Qudayın'ız Jaratqan İye sizlerge mu'lik etip berip atırg'an eldi gu'nag'a batırman'lar.
5 jırasqan birinshi ku'yewi hayalg'a qaytadan u'yleniwine bolmaydı. Sebebi hayal haramlang'an. Eger u'ylense, bunnan Jaratqan İye jerkenedi. Qudayın'ız Jaratqan İye sizlerge mu'lik etip berip atırg'an eldi gu'nag'a batırman'lar.
6 Hesh kim kepillik sıpatında digirmandı yamasa digirmannın' u'stindegi tastı da almasın. Bunday is qılıw adamnın' janın kepillikke alg'an menen barabar boladı.
7 Eger birewdin' izraillı tuwısqanlarınan birin urlap, og'an qul sıpatında qarap, zulımlıq qılg'anı yamasa onı qul qılıp satıp jibergeni ma'lim bolsa, onda bunday urı adam o'ltirilsin. Solay etip, aran'ızdag'ı jawızlıqtı joq qılın'lar.
8 Jaman teri keselligi ma'selesinde, lebiyli ruwxaniylerdin' sizlerge u'yretetug'ınlarının' ha'mmesin muqıyatlı tu'rde orınlan'lar. Menin' lebiylilerge bergen buyrıqlarıma a'mel qılın'lar.
9 Sizler Mısırdan shıqqannan keyin, jolda Qudayın'ız Jaratqan İyenin' Ma'riyamg'a ne qılg'anın esin'izde saqlan'lar.
10 İzraillı tuwısqanın'ızdın' birewine bir na'rseni qarızg'a bergenin'izde, kepillikke zat alıw ushın, onın' u'yine kirmen'ler.
11 Sırtta ku'tip turın'lar. Ol adam kepillikke beretug'ın zatın o'zi sırtqa alıp shıqsın.
12 Eger ol ka'mbag'al adam bolsa, onın' kepillikke bergen kiyimin tu'n boyı o'zin'izde qaldırman'lar.
13 Onnan alg'an kiyimdi quyash batar waqıtta qaytarıp berin'ler. Ol o'z kiyimin kiyip uyıqlasın ha'm sizge aq pa'tiya bersin. Usılay islep, sizler Qudayın'ız Jaratqan İyenin' aldında durıs is qılg'an bolasız.
14 Ka'mbag'al ha'm mu'ta'jlikte jasap atırg'an jallanba jumısshının' is haqısın uslap qalman'lar. Ol izraillı bolsın, qalan'ızdın' birinde jasap atırg'an kelgindi adam bolsın, onday qılman'lar.
15 Onın' is haqısın ha'r ku'ni quyash batpastan aldın berin'ler. Sebebi ol ka'mbag'al bolg'anı ushın, tirishiligi usıdan ibarat. Bolmasa, ol adam sizlerge qarsı Jaratqan İyege nalıydı ha'm o'zin'izge gu'na arttırıp alasız.
16 A'keler balalarının' gu'nası ushın, balalar a'kelerinin' gu'nası ushın o'ltirilmesin. Ha'r bir adam o'z gu'nası ushın o'lim jazasın alsın.
17 Kelgindi adamlardın' ha'm jetimlerdin' huqıqın ayaq astı qılman'lar. Jesir hayaldın' kiyimin kepillikke alman'lar.
18 Mısırda qul bolg'anın'ızdı ha'm Qudayın'ız Jaratqan İyenin' sizlerdi sol jerden azat etkenin esin'izde saqlan'lar. Sonın' ushın da, men sizlerge usı buyrıqtı berip atırman.
19 Atızın'ızdag'ı egindi org'anın'ızda, orılg'an bir bawdı umıtıp qaldırg'an bolsan'ız, onı alıw ushın keynin'izge qaytpan'lar. Onı kelgindilerge ha'm jetim-jesirlerge qaldırın'lar. Sonda Qudayın'ız Jaratqan İye sizlerdin' qol urg'an ha'r bir isin'izge bereket beredi.
20 Za'ytu'n ag'ashların'ızdın' miywelerin qag'ıp alg'anın'ızdan keyin, shaqalarda qalıp qoyg'anlardı ja'ne terip alıw ushın barman'lar. Olardı kelgindilerge ha'm jetim-jesirlerge qaldırın'lar.
21 Ja'ne de, ju'zimzarın'ızdın' miywelerin tergenin'izde de, shaqalarında qalıp ketken ju'zimlerdi qaytadan terip alman'lar. Bulardı kelgindilerge ha'm jetim-jesirlerge qaldırın'lar.
22 Mısırda qul bolg'anın'ızdı esin'izde saqlan'lar. Sonın' ushın da, men sizlerge usı buyrıqtı berip atırman».
