Rimliler 13 bob

Hu'kimetke boysınıw haqqında (1-7),Su'yiw – bul Muxaddes Nızamdı orınlaw (8-14).

¹ Ha'r bir adam basqarıwshı hu'kimetke boysınsın. O'ytkeni Qudaydan bolmag'an hesh qanday hu'kimet joq. Bar bolg'an hu'kimetlerdin' ha'mmesi de Quday ta'repinen ornatılg'an.

² Sonlıqtan hu'kimetke qarsı shıqqan adam Quday ornatqan ta'rtipke qarsı shıqqan boladı. Bunday adamlar jazag'a ushıraydı.

³ Sebebi basshılardan jaqsılıq islewshiler emes, al jamanlıq islewshiler qorqadı. Basshılardan qorqpawdı qa'leysen' be? Onda jaqsılıq isle. Sonda sen basshının' maqtawına erisesen'.

⁴ Basshı – senin' paydan' ushın miynet etetug'ın Qudaydın' xızmetshisi. Biraq, eger sen jamanlıq isleytug'ın bolsan', qorq! O'ytkeni ol qılıshtı biykarg'a ko'terip ju'rgen joq. Ol Qudaydın' xızmetshisi bolıp, jamanlıq islewshini Qudaydın' g'a'zebi menen jazalaydı.

⁵ Sonlıqtan tek Qudaydın' g'a'zebinen qorqqanlıqtan emes, al hu'jdanın' boyınsha da boysınıwın' tiyis.

⁶ Sizlerdin' salıq to'lewin'izdin' sebebi de usı. Sebebi salıq jıynawg'a biyligi bar adamlar da o'z isi menen ba'rqulla ba'nt bolıp, Qudayg'a xızmet etedi.

⁷ Solay etip, ha'r kimge tiyislisin berin'ler: salıq jıynawshıg'a – salıq, bajı jıynawshıg'a – bajı berin'ler ha'm qorqıwg'a ılayıq adamnan qorqıp, hu'rmetke ılayıq adamg'a hu'rmet ko'rsetin'ler.

⁸ Hesh kimge qarızdar bolman'lar. Hesh qashan tolıq o'tep bolmaytug'ın qarız bolg'an, bir-birewdi su'yiwdi toqtatpan'lar. O'ytkeni basqalardı su'ygen adam Muxaddes Nızamdı orınlag'an boladı.

⁹ «Neke hadallıg'ın buzba, adam o'ltirme, urlıq isleme, basqanın' mu'lkin ku'seme» , – degen buyrıqlar ha'm qalg'an barlıq buyrıqlar mına so'zlerde ja'mlengen: «O'zin'di su'ygenin' sıyaqlı, janın'dag'ı adamdı da su'y» .

¹⁰ Janındag'ı adamdı su'yetug'ın og'an jamanlıq islemeydi. Sonlıqtan basqalardı su'yiw – bul Muxaddes Nızamdı orınlaw demek.

¹¹ Ha'zirgi zamannın' qanday ekenin bilip, usını orınlan'lar. Endi sizlerdin' uyqıdan oyanatug'ın waqtın'ız keldi. Sebebi bizlerdin' qutqarılıwımız bizler isengen da'slepki waqıtlarg'a qarag'anda, ha'zir jaqınıraq.

¹² Tu'n o'tip, ku'ndiz jaqınladı. Sonlıqtan qaran'g'ılıqtın' islerin taslap, nurdın' sawıt-quralların tag'ıp alayıq.

¹³ Ayshı-a'shiretke ha'm ma'sku'nemlikke, haramılıqqa ha'm buzıqshılıqqa, ja'njel ha'm ku'nshillikke berilmeyik. Ku'ndizge jarasatug'ın a'depli o'mir su'reyik.

¹⁴ İyemiz İysa Masixtın' sizlerdi basqarıwına jol qoyın'lar ha'm gu'nakar ta'biyatın'ızdın' jaman qa'lewlerine boysınban'lar.