Rimliler 14 bob
1 İsenimi ha'lsiz adamdı onın' pikirleri haqqında tartıspay qabıl etin'ler.
2 Mısalı: birew ha'mme na'rseni jewge boladı dep isenedi. Al isenimi ha'lsiz bolg'an tek palız o'nimlerin g'ana jeydi.
3 Ha'mme na'rseni jeytug'ın adam jemeytug'ın adamdı pa's ko'rmesin. Ayırım na'rselerdi jemeytug'ın adam jeytug'ın adamdı hu'kim etpesin. O'ytkeni Quday ekewin de qabıl etken.
4 Basqanın' xızmetshisin hu'kim etetug'ınday, sen kimsen'? Xızmetshi o'z xojayınının' aldında turadı yamasa jıg'ıladı. Ol ayaqqa turg'ızıladı. Sebebi onı ayaqqa turg'ızıwg'a İyemizdin' qu'direti jetedi.
5 Ja'ne de, birew bir ku'ndi basqa ku'nnen a'hmiyetlirek dep sanaydı, al basqa birew ushın ha'mme ku'n birdey. Ha'r bir adam o'z ko'z qarasında tolıq isenimge iye bolsın.
6 Ku'nlerdi ayrıqsha qılıp belgileytug'ın olardı İyemiz ushın belgileydi. Al ha'mme na'rseni jeytug'ın adam Qudayg'a shu'kirlik etip, olardı İyemiz ushın jeydi. Ayırım na'rselerdi jemeytug'ın adam da İyemiz ushın jemeydi ha'm Qudayg'a shu'kirlik etedi.
7 O'ytkeni hesh birimiz tek o'zimiz ushın jasamaymız ha'm hesh birimiz de tek o'zimiz ushın o'lmeymiz.
8 Jasasaq, İyemiz ushın jasaymız. O'lsek te, İyemiz ushın o'lemiz. Solay etip, jasasaq ta, o'lsek te İyemizge tiyislimiz.
9 Usı maqsette Masix o'lip, o'limnen qayta tirildi. Sonlıqtan Ol o'lilerdin' de, tirilerdin' de İyesi boldı.
10 Olay bolsa, sen nege tuwısqanın'dı hu'kim etesen'? Nege tuwısqanın'dı pa's ko'resen'? Ha'mmemiz de Qudaydın' hu'kim gu'rsisi aldında juwap beremiz-g'o.
11 Muxaddes Jazıwda İyemiz bılay deydi: «Tiriligim haqı ant ishemen: Ha'r bir adam Menin' aldımda dize bu'gedi. Ha'r bir adam Menin' Quday ekenimdi ashıq ta'n aladı».
12 Solay etip, ha'r bir adam o'zi ushın o'zi Quday aldında juwap beredi.
13 Sonlıqtan bunnan bılay, bir-birimizdi hu'kim etpeyik. Kerisinshe, tuwısqanın'ızdı azg'ırıwg'a salmawg'a ha'm onın' isenimine zıyan keltirmewge tırısın'lar.
14 İyemiz İysag'a tiyisli bir adam sıpatında mınanı bilemen ha'm anıq isenemen: hesh bir na'rse o'zliginen haram emes. Biraq, bir na'rseni haram dep esaplag'an adam ushın sol na'rse haram boladı.
15 Eger tuwısqanın' sen jeytug'ın na'rse sebepli qapa bolsa, onda sen su'yispenshilik penen is tutıp atırg'an joqsan'. Jeytug'ın na'rsen' menen onın' isenimin nabıt qılma! Sebebi Masix bul adam ushın da o'lgeng'o.
16 Sizler jaqsı dep esaplag'an na'rsege so'z kelmesin.
17 O'ytkeni Qudaydın' Patshalıg'ı jeytug'ın ha'm ishetug'ın na'rselerden ibarat emes, al haqlıq, tınıshlıq ha'm Muxaddes Ruwx beretug'ın quwanıshtan ibarat.
18 Masixqa usı jol menen xızmet etetug'ın adam Qudayg'a unaydı ha'm ol adamlardın' maqtawına ılayıq.
19 Solay etip, o'zlerimizdi tınıshlıq alıp keletug'ın ha'm o'z ara ruwxıy ku'sh beretug'ın islerge bag'ıshlayıq.
20 Jeytug'ın na'rse sebepli, Qudaydın' islerin buzba! Jeytug'ın ha'mme na'rse hadal. Biraq, jeytug'ın na'rsesi arqalı basqa adamdı azg'ırıwg'a salg'an jaman is qılg'an boladı.
21 Go'sh jewin', araq-sharap ishiwin' yamasa basqa bir na'rse islewin' tuwısqanın'dı azg'ırıwg'a salatug'ın bolsa, onda bunday islerdi islemegenin' durıs.
22 Bular boyınsha isenimin'di o'zin' menen Qudaydın' arasında saqla. O'zi durıs dep esaplaytug'ın isti islegeni ushın, o'zin ayıplamaytug'ın adam qanday baxıtlı!
23 Biraq, ekilenip jeytug'ın adam hu'kim etiledi. Sebebi ol bunı isenim menen islemegen boladı. Al isenim menen islenbegen ha'r bir is – gu'na.
