Rimliler 3 bob
1 Olay bolsa, yahudiy bolıwdın' qanday da bir artıqmashılıg'ı bar ma? Ya bolmasa, su'nnetleniwdin' paydası bar ma?
2 A'lbette, bar. Yahudiy bolıw – ha'r ta'repleme artıqmashılıqqa iye. O'ytkeni en' aldı menen Qudaydın' so'zleri olarg'a isenip tapsırılg'an.
3 Eger olardın' ayırımları Qudaydın' so'zlerine sadıqsız bolıp shıqqan bolsa ne bolıptı? Olardın' sadıqsızlıg'ı Qudaydın' sadıqlıg'ın biykarlay ala ma?
4 Hesh qashan! Ha'mme adamlar o'tirikshi bolsa da, Quday haq. Sebebi Muxaddes Jazıwda Quday haqqında bılay delingen: «Haq ekenin'di so'zlerin' menen ko'rsetesen', Seni ayıplag'anda, jen'iske erisesen'» .
5 Biraq, bizlerdin' nahaqlıg'ımız Qudaydın' haqlıg'ın ashıp ko'rsetse, onda ne deymiz? Quday bizlerdi g'a'zep penen jazalasa, a'dilsiz bolg'anı ma? (Men bulardı adamlardın' oyı boyınsha aytıp atırman.)
6 Hesh qashan! Eger Quday a'dilsiz bolsa, Ol du'nyanı hu'kim ete alar ma edi?
7 Degen menen, ayırımlar bılay dep soraw qoyıwı mu'mkin: «Eger menin' nahaqlıg'ım Qudaydın' haqlıg'ının' artıp, Onın' ullılanıwına xızmet etse, sonda nege men gu'nakar bolıp hu'kim etilmektemen?»
8 Solay etip: «Jaqsılıq shıqsın dep, jamanlıq isley bereyik», – deyik pe? Bazı adamlar bizlerge jala jawıp, usınday so'zlerdi ayttı demekte. Bunday adamlar Qudaydın' jazasına ılayıqlı.
9 Endi ne dewge boladı? Biz yahudiyler basqa milletlerden artıqpız ba? A'lbette, yaq! O'ytkeni a'lle qashan da'lillegenimdey, yahudiy de, basqa millet adamı da, yag'nıy ha'r bir adam gu'nanın' biyligi astında+.
10 Muxaddes Jazıwlarda aytılg'anday: «Hesh bir haq adam joq, Birde biri joq.
11 Sanalı hesh biri joq. Qudaydı izleytug'ın hesh kim joq.
12 Ha'mme joldan adasqan, Barlıg'ı jaramsız bolg'an. Jaqsılıq islewshi hesh kim joq. Birde biri joq».
13 «Olar so'zleri menen adamlardı ashıq go'rge tıg'ar» . «Tilleri menen aldaydı, Erinlerinde jılan za'ha'ri».
14 «Awızları tolı na'let-g'arg'ıs so'zlerge».
15 «Ayaqları shaqqan qan to'giwge.
16 Olar qa'dem basqan jerge keler qıyralıw ha'm ba'le.
17 Bilmes olar tınıshlıq jolın».
18 «Qudaydan qorqıw da joq kewillerinde».
19 Muxaddes Nızamda aytılg'anlardın' ha'mmesi Muxaddes Nızam astında bolg'anlarg'a aytılg'anın bilemiz. Solay etip, ha'r bir til baylanıp, pu'tkil du'nya Qudaydın' aldında esap beredi.
20 Sonlıqtan Muxaddes Nızamdı orınlag'anı arqalı hesh bir adam Qudaydın' aldında aqlana almaydı. Kerisinshe, Muxaddes Nızam arqalı adam o'zinin' gu'nakar ekenin bilip aladı.
21 Endi bolsa, Qudaydın' adamdı aqlaytug'ın a'dilligi Muxaddes Nızamg'a baylanıslı bolmay-aq ashıq ko'rsetildi. Tawrat ta, payg'ambarlardın' Jazıwları da bul haqqında gu'walıq beredi.
22 Qudaydın' a'dilligi adamlardı olardın' İysa Masixqa degen isenimi arqalı aqlaydı. Bunı Ol isenetug'ın ha'r bir adam ushın isleydi. Sebebi adamlar arasında hesh qanday ayırmashılıq joq.
23 O'ytkeni ha'mme gu'na islegen ha'm Qudaydın' saltanatınan ayırılg'an.
24 Biraq, adamlar Qudaydın' miyrimi menen, İysa Masixtın' qanı arqalı esheyin aqlanadı
25 Masixqa degen isenim menen, Onın' qanı arqalı gu'naları keshirilsin dep, Quday Masixtı adamlar ushın qurbanlıqqa bag'ıshladı. Quday bul arqalı O'z a'dilligin ko'rsetti. Sebebi Quday sabırlılıq etip, burınnan beri islengen gu'nalardı keshirdi.
26 Ja'ne de, ha'zirgi waqıtta Ol a'dilligin da'lillep, O'zinin' haq ekenin ha'm İysag'a isengen ha'r bir adamdı aqlaytug'ının ko'rsetti.
27 Endi bizler ne menen maqtana alamız? Hesh na'rse menen. Qanday jol menen aqlana alamız? Muxaddes Nızamdı orınlaw jolı menen be? Yaq, isenim menen.
28 O'ytkeni bizler adamnın' Muxaddes Nızamdı orınlag'anı arqalı emes, al isenim menen aqlanatug'ının moyınlaymız.
29 Rasında da, Quday tek yahudiylerdin' Qudayı ma? Ol basqa milletlerdin' de Qudayı emes pe? A'lbette, Ol basqa milletlerdin' de Qudayı.
30 Sebebi su'nnetli yahudiylerdi de, su'nnetsiz bolg'an basqa milletlerdi de tek isenim menen aqlaytug'ın Quday – jalg'ız.
31 Solay etip, bizler: «Adamlar tek isenim menen aqlanadı», – dep, Muxaddes Nızamdı biykarlaymız ba? Yaq, kerisinshe, Onı tastıyıqlaymız.
