Rimliler 4 bob
1 Al endi bizlerdin', yag'nıy yahudiylerdin' tu'p babası İbrayım haqqında ne deymiz? Ol nege eristi?
2 Eger ol islegen sawap isleri sebepli aqlang'an bolsa, maqtanıwg'a haqısı bolar edi. Biraq, Qudaydın' aldında maqtana almaydı.
3 O'ytkeni Muxaddes Jazıwda bılay delingen: «İbrayım Qudayg'a isendi ha'm sol sebepten Quday onı aqlang'an dep sanadı».
4 Miynet etkenge to'lengen haqı sıy emes, al is haqı bolıp esaplanadı.
5 Biraq kim de kim o'zinin' sawap islerine emes, al qudaysız adamdı da aqlaytug'ın Qudayg'a isense, ol isenimi sebepli aqlang'an bolıp esaplanadı.
6 Minekey, sawap islerine qaramay, Quday ta'repinen aqlang'an dep esaplang'an adamnın' baxıtlı ekeni haqqında Dawıt ta bılay degen:
7 «Nahaq isleri keshirilip, Gu'naları juwılg'an adamlar qanday baxıtlı!
8 Quday gu'nasın esapqa almaytug'ın adam qanday baxıtlı!»
9 Bul baxıt tek su'nnetliler ushın berilgen be? Ya bolmasa, su'nnetsizler ushın da ma? Bizler: «İbrayım o'z isenimi sebepli aqlang'an dep sanaldı», – degen edik.
10 Ol qashan aqlang'an dep sanaldı? Su'nnetlengennen keyin be yamasa su'nnetlenbesten burın ba? Su'nnetlengennen keyin emes, al su'nnetlenbesten burın.
11 Su'nnetlenbesinen burın isenimi menen aqlang'anının' belgisi retinde İbrayım su'nnetlew ra'simin qabıl etti. Solay etip, ol su'nnetsiz bolg'an basqa millet adamlarının' da aqlang'an bolıp esaplanıwı ushın, isenetug'ın usınday adamlardın' ha'mmesinin' ruwxıy babası boldı.
12 Babamız İbrayım su'nnetli yahudiylerdin' de ruwxıy babası. Bul olardın' tek su'nnetlengeni sebepli emes, al İbrayımda su'nnetlenbesinen aldın bolg'an isenim menen jasag'anı sebepli boldı.
13 Sebebi Muxaddes Nızamdı orınlag'anı arqalı emes, al isenimi arqalı aqlanıwı ushın, Quday İbrayımg'a ha'm onın' urpaqlarına du'nyanın' miyrasxorları bolatug'ının wa'de etti.
14 Eger adamlar Muxaddes Nızamdı orınlawı arqalı miyrasxor bolatug'ın bolsa, onda isenim biykar ha'm wa'de de bos bolar edi.
15 O'ytkeni Muxaddes Nızam Qudaydın' g'a'zebin keltiredi. Biraq Muxaddes Nızam bolmag'an jerde nızamdı buzıw da joq.
16 Usılay etip, Qudaydın' wa'desi tek isenim sebepli beriledi. Ol tek Muxaddes Nızamg'a iye bolg'an yahudiy iseniwshilerine g'ana emes, al İbrayımnın' isenimine iye bolg'an basqa millet iseniwshilerine de, yag'nıy İbrayımnın' pu'tkil urpag'ına Qudaydın' miyrimi boyınsha beriledi.
17 Muxaddes Jazıwda Qudaydın' İbrayımg'a: «Seni ko'p milletlerdin' babası qılaman» , – dep aytqanınday, İbrayım o'zi isenetug'ın Qudaydın', yag'nıy o'lilerdi tiriltetug'ın ha'm joqtan bar payda qılatug'ın Qudaydın' aldında ha'mmemizdin' babamız.
18 Hesh u'miti qalmag'an waqıtta da İbrayım u'mitin u'zbey, Qudayg'a isendi. Sonlıqtan «Senin' urpag'ın' esap-sansız boladı» , – dep Qudaydın' og'an aytqanınday, ol ko'p milletlerdin' babası boldı.
19 Jası ju'zge shamalasıp, denesinde ku'sh qalmag'anın ha'm hayalı Saranın' da qursag'ına bala pitpeytug'ının ol bilse de, isenimin azaytpadı.
20 İsenimsizlik etip, Qudaydın' wa'desi tuwralı ekilenbedi. Kerisinshe, isenimi ku'sheyip, Qudaydı alg'ısladı.
21 Qudaydın' O'z wa'desin orınlaytug'ın ku'shke iye ekenine ol tolıq isendi.
22 A'ne, usı isenimi sebepli, İbrayım aqlang'an dep sanaldı.
23 «Aqlang'an dep sanaldı», – degen so'zler tek İbrayımg'a emes,
24 al bizlerge de tiyisli etip jazılg'an. Bizler de İyemiz İysanı o'limnen tiriltken Qudayg'a degen isenimimiz benen aqlang'an bolıp esaplanamız.
25 İyemiz İysa gu'nalarımız ushın o'limge tapsırılıp, Qudaydın' aldında bizlerdin' aqlanıwımız ushın qayta tirildi.
