Rimliler 5 bob
1 Solay etip, isenim menen aqlang'anımız sebepli, İyemiz İysa Masix arqalı Quday menen jarastıq.
2 İysa Masix arqalı Qudaydın' miyrimine isenimimiz benen iye bolıp jasamaqtamız. Ja'ne de, Qudaydın' ullılıg'ına erisiwden u'mit etip, quwanamız.
3 Bizler tek bul sebepli emes, al qıyınshılıqlar sebepli de quwanamız. Sebebi qıyınshılıqlardan sabırlılıq,
4 sabırlılıqtan jaqsı minez-qulıq, jaqsı minez-qulıqtan u'mit payda bolatug'ının bilemiz.
5 Sol u'mit bizlerdi uyatqa qaldırmaydı. O'ytkeni Quday bizlerge bergen Muxaddes Ruwxı arqalı ju'reklerimizdi O'z su'yispenshiligine toltırdı.
6 Awa, o'zlerimizdi aqlawg'a ele ku'shsiz bolg'anımızda Masix belgilengen waqıtta qudaysız bolg'an bizler ushın o'ldi.
7 Hesh kim haq adam ushın janın o'limge qıymaydı. Ha'tte, o'zine qa'wender bolg'an adam ushın da janın o'limge qıyıwdı qa'leytug'ın adamlar az.
8 Biraq, bizler ele gu'nakar bolg'an waqtımızda Masix bizler ushın o'ldi. Bizlerge degen su'yispenshiligin Quday usılay da'lilledi.
9 Sonlıqtan endi Masixtın' qanı arqalı aqlang'anımız sebepli, Ol arqalı Qudaydın' g'a'zebinen qutqarılatug'ınımız da anıq.
10 Sebebi bizler Qudaydın' dushpanı bolsaq ta, Onın' Ulının' o'limi arqalı Quday menen jarastıq. Endi Quday menen jarasıp, Onın' Ulının' o'miri arqalı qutqarılatug'ınımız da anıq.
11 Ja'ne de, bunın' menen sheklenip qoymay, bizlerdi endi Quday menen jarastırg'an İyemiz İysa Masix arqalı Quday menen qatnasta bolıp quwanamız.
12 Du'nyag'a bir adam arqalı, yag'nıy Adam-ata arqalı gu'na keldi, al gu'na sebepli o'lim keldi. Solay etip, hesh bir adam o'limnen qashıp qutıla almaytug'ın boldı. O'ytkeni ha'mme gu'na islegen edi.
13 Muxaddes Nızam berilmesten burın da du'nyada adamlar gu'na isleytug'ın edi. Biraq, Muxaddes Nızam bolmag'an waqıtta gu'na gu'na dep esaplanbadı.
14 Degen menen, Adam-atadan Muwsag'a deyin jasag'anlar Adam-ata islegen sol gu'nanı islemegen bolsa da, o'lim olardın' u'stinen hu'kimdarlıq etti. Al Adam-ata keliwi tiyis Adamnın', yag'nıy Masixtın' tımsalı.
15 Biraq, olar arasında u'lken ayırmashılıq bar. Qudaydın' sıyı Adam-atanın' gu'nasına uqsamaydı. Sebebi bir adamnın' gu'nası sebepli ko'p adamlar o'lgen bolsa da, Qudaydın' miyrimi ha'm basqa bir adamnın', yag'nıy İysa Masixtın' miyrimi menen berilgen sıydı ko'p adamlar mol-molaqay etip aldı.
16 Qudaydın' sıyının' na'tiyjesi menen bir adamnın' gu'nasının' na'tiyjesi birdey emes. Adam-atanın' gu'nasının' aqıbeti hu'kim etiliwge alıp keldi, biraq Qudaydın' sıyı sebepli, ko'p gu'nalarımızg'a qaramastan, bizlerge aqlanıw keldi.
17 Bir adamnın' gu'nası sebepli, sol adam arqalı pu'tkil adamzat u'stinen o'lim biylik etken bolsa, endi tek bir adam, yag'nıy İysa Masix arqalı Qudaydın' mol miyrimin alıp aqlang'anlar u'stinen o'mir biylik etedi.
18 Solay etip, bir adamnın' gu'nası sebepli pu'tkil adamzat hu'kim etilgen bolsa, bir adamnın' haq isi sebepli pu'tkil adamzat aqlanıp, o'mirge eristi.
19 Bir adamnın' boysınbag'anı sebepli ko'p adamlar gu'nakar bolıp qalg'anınday, bir adamnın' boysıng'anı sebepli ko'p adamlar aqlanadı.
20 Adamlar o'zlerinin' qanshelli gu'nakar ekenin biliw ushın Muxaddes Nızam berildi. Biraq, gu'na ko'beygen sayın, Qudaydın' miyrimi onnan da artıp bardı.
21 Solay etip, gu'na o'lim arqalı biylik etkendey, Qudaydın' miyrimi de aqlawı arqalı biylik etip, İyemiz İysa Masix sebepli ma'n'gilik o'mirge eristiredi.
