Rimliler 7 bob
1 Ha'y, Muxaddes Nızamdı biliwshi tuwısqanlarım, men sizlerge qarata aytıp atırman: Muxaddes Nızamnın' adam u'stinen tek tiri waqtında g'ana biylik ju'rgizetug'ının bilmeysizler me?
2 Mısalı: ku'yewi bar hayal ku'yewinin' ko'zinin' tirisinde og'an nızam boyınsha baylang'an boladı. Biraq, ku'yewi qaytıs bolsa, hayal neke nızamınan azat boladı.
3 Solay etip, hayal ku'yewinin' ko'zinin' tirisinde basqa bir erkek penen jasasa, neke hadallıg'ın buzg'an bolıp esaplanadı. Biraq, ku'yewi o'lse, hayal nızam boyınsha azat boladı. Ol basqa bir erkekke turmısqa shıqsa da, neke hadallıg'ın buzg'an bolmaydı.
4 Sol sıyaqlı, tuwısqanlarım, sizler de Basqag'a, yag'nıy o'limnen qayta tirilgen Masixqa tiyisli bolıwın'ız ushın, Masixtın' denesinin' atanaq ag'ashta o'lgeni arqalı Muxaddes Nızam aldında o'lgensiz. Bul ha'mmemizdin' Qudayg'a xızmet etip, jemis beriwimiz ushın boldı.
5 O'ytkeni burın bizler gu'nakar ta'biyatımızg'a boysınıp jasag'anımızda, Muxaddes Nızam sebepli payda bolg'an gu'nakar qa'lewler denemizdin' mu'shelerinde ha'reket etetug'ın edi. Sonın' na'tiyjesinde, bizler o'limge jetelewshi jemisler beretug'ın edik.
6 Endi bolsa, bizler burın o'zlerimizdi baylap qoyg'an Muxaddes Nızam ushın o'lip, Muxaddes Nızamnan azat boldıq. Solay etip, jazılg'an Muxaddes Nızam boyınsha basqarılatug'ın eski jol menen emes, al Muxaddes Ruwx basqaratug'ın jan'a jol menen Qudayg'a xızmet etpektemiz.
7 Olay bolsa, ne deyik? Muxaddes Nızam jaman bolg'anı ma? Hesh qashan! Biraq, eger Muxaddes Nızam bolmag'anda, men gu'nanın' ne ekenin bilmegen bolar edim. Eger Muxaddes Nızam: «Basqa birewdin' na'rsesin ku'seme», – demegende, men ku'sewdin' gu'na ekenin bilmegen bolar edim.
8 Degen menen, gu'na usı buyrıqtan paydalanıp, mende ha'r tu'rli ku'sewlerdi payda etti. Sebebi Muxaddes Nızam bolmasa, gu'na o'li boladı.
9 Men bir waqıtları Muxaddes Nızamdı bilmey jasag'anımda tiri edim. Biraq, Qudaydın' buyrıqların bilgenimnen son', mende gu'na tirilip, ha'reket ete basladı,
10 al men o'ldim. Solay etip, o'mirge iye bolıw ushın berilgen bul buyrıqlar menin' o'limime sebepshi boldı.
11 O'ytkeni gu'na buyrıqtan paydalanıp, meni aldadı ha'm usı buyrıq arqalı meni o'ltirdi.
12 Solay bolsa da, Muxaddes Nızam – muxaddes, Qudaydın' buyrıqları da muxaddes, haq ha'm jaqsı.
13 Solay eken, jaqsı na'rse mag'an o'lim alıp keldi me? Hesh qashan! Gu'na mag'an jaqsı na'rse arqalı o'lim alıp keldi. Bul gu'nanın' gu'na bolıp ashıq biliniwi ushın boldı. Solay etip, buyrıq arqalı gu'nanın' qanshelli jaman ekeni belgili boladı.
14 Bizler Muxaddes Nızamnın' Qudaydan kelgenin bilemiz. Al men gu'nag'a qul bolıp satılg'an, o'tkinshi denege iye adamman.
15 Men ne islep atırg'anımdı o'zim tu'sinbeymen. Sebebi men qa'legen na'rsemdi emes, al jek ko'retug'ın na'rsemdi isleymen.
16 Eger men qa'lemegen na'rsemdi islep atırg'anımda isimnin' jaman ekenin moyınlasam, onda Muxaddes Nızamnın' jaqsı ekenin maqullag'an bolaman.
17 Olay bolsa, bul isti menin' o'zim emes, al ishimde jasaytug'ın gu'na islep atırg'an boladı.
18 Menin' ishimde, yag'nıy gu'nakar ta'biyatımda hesh bir jaqsı na'rsenin' joq ekenin bilemen. İshimde jaqsılıq islewge qa'lew bolsa da, ku'shim jetpeydi.
19 O'ytkeni o'zim islewdi qa'leytug'ın jaqsı isti emes, al kerisinshe, islewdi qa'lemeytug'ın jaman isti isleymen.
20 Eger men o'zim qa'lemeytug'ın na'rseni islesem, onda onı menin' o'zim emes, al ishimde jasaytug'ın gu'na islegen boladı.
21 Solay etip, men o'zimde mınaday nızamnın' bar ekenin bildim: men jaqsı na'rseni islewdi qa'legenimde, ishimdegi jamanlıq ha'reket etiwge tayar turadı.
22 Men ruwxım menen Qudaydın' Nızamın quwanıshlı tu'rde maqullayman.
23 Biraq, denemnin' mu'shelerinde basqa bir nızamdı bayqayman. Ol menin' sana-sezimimnin' nızamına qarsı urısıp, meni denemnin' mu'shelerindegi gu'na nızamına tutqın etedi.
24 Wah, sorlı basım! O'limge jetelewshi bul deneden meni kim qutqaradı?
25 İyemiz İysa Masix arqalı tek jalg'ız Quday g'ana qutqaradı! Qudayg'a shu'kirler bolsın! Solay etip, men o'z sana-sezimim menen Qudaydın' Nızamına, al gu'nakar ta'biyatım menen gu'nanın' nızamına xızmet etip atırman.
