Rimliler 8 bob
1 Solay etip, Masix İysag'a tiyisli bolg'anlarg'a qarsı endi hesh qanday hu'kim joq.
2 Sebebi Masix İysa arqalı o'mir beretug'ın Muxaddes Ruwxtın' nızamı meni gu'nanın' ha'm o'limnin' nızamınan azat qıldı.
3 Adamnın' gu'nakar ta'biyatı ku'shsiz bolg'anlıqtan, adam Muxaddes Nızamdı tolıq orınlay almadı. Sonlıqtan Muxaddes Nızam adamdı qutqara almadı, biraq onı Qudaydın' O'zi qutqardı: Quday O'z Ulın adam denesinde bul du'nyag'a jiberip, Onı gu'nalar ushın to'lenetug'ın qurbanlıq qılıp bag'ıshladı ha'm bizlerdin' gu'nalarımız ju'klengen O'z Ulının' denesin hu'kim etti.
4 Solay etip, Quday bunı gu'nakar ta'biyatımızdın' emes, al Muxaddes Ruwxtın' jetelewi menen ju'retug'ın bizlerdin' o'mirimizde Muxaddes Nızamnın' a'dil talapları orınlansın dep isledi.
5 O'ytkeni gu'nakar ta'biyatının' jetelewi menen ju'retug'ınlar o'z gu'nakar ta'biyatının' qa'leytug'ın na'rselerin oylaydı, al Muxaddes Ruwxtın' jetelewi menen ju'retug'ınlar Muxaddes Ruwxtın' qa'leytug'ın na'rselerin oylaydı.
6 Gu'nakar ta'biyat basqaratug'ın oy-pikirler o'limge, al Muxaddes Ruwx basqaratug'ın oy-pikirler o'mirge ha'm tınıshlıqqa eristiredi.
7 Sebebi gu'nakar ta'biyat basqaratug'ın oy-pikirge iye adam – Qudayg'a dushpan. Ol Qudaydın' Nızamına boysınbaydı ha'm boysına almaydı da.
8 Kim de kim gu'nakar ta'biyatının' jetelewi menen ju'rse, ol Qudayg'a unay almaydı.
9 Biraq, ishin'izde Qudaydın' Ruwxı jasap atırg'an bolsa, onda sizlerdi gu'nakar ta'biyatın'ız emes, al Muxaddes Ruwx basqarıp atırg'an boladı. Kim de kim Masixtın' Ruwxına iye bolmasa, ol Masixqa tiyisli emes.
10 Al eger ishin'izde Masix jasap atırg'an bolsa, denen'iz gu'na sebepli o'letug'ın bolsa da, ruwxın'ız aqlang'anın'ız sebepli tiri boladı.
11 İysanı o'limnen qayta tiriltken Qudaydın' Ruwxı ishin'izde jasap atırg'an bolsa, onda Masix İysanı o'limnen qayta tiriltken Quday ishin'izde jasap atırg'an O'z Ruwxı arqalı o'letug'ın denen'izdi de tiriltedi.
12 olay etip, tuwısqanlarım, bizler gu'nakar ta'biyatımızg'a boysınıp, onın' jetelewi menen ju'riwge parızlı emespiz.
13 O'ytkeni eger gu'nakar ta'biyatın'ızdın' jetelewi menen ju'rsen'iz, o'lesiz. Al gu'nakar ta'biyatın'ızdın' jaman islerinen Muxaddes Ruwxtın' ku'shi menen tolıq waz keshsen'iz, jasaysız.
14 Qudaydın' Ruwxı menen basqarılatug'ınlardın' ha'mmesi – Qudaydın' balaları.
15 Sebebi sizler o'zlerin'izdi ja'ne qul etip, qorqınısh beretug'ın ruwxtı emes, al Qudaydın' balası qılg'an Muxaddes Ruwxtı qabıl ettin'iz. Usı Ruwx arqalı Qudaydı: «A'ke, A'kejanım!» dep shaqırasız
16 Muxaddes Ruwxtın' O'zi bizlerdin' ruwxımız benen birlikte Qudaydın' balaları ekenligimiz haqqında gu'walıq beredi.
17 Eger bizler Qudaydın' balaları bolsaq, onda miyrasqa iye bolamız. Masix penen birge ullılanıw ushın, Onın' menen birge azap sheksek, onda bizler Masix penen birge miyrasqa sherik bolg'an Qudaydın' miyrasxorlarımız.
18 Menin' oyımsha, ha'zirgi qıyınshılıqlar keleshekte bizlerge beriletug'ın ullılıqqa salıstırg'anda hesh na'rse emes.
19 Sonın' menen birge, pu'tkil jaratılıs Qudaydın' O'z balaların ashıq ko'rsetetug'ın ku'ndi intizarlıq penen ku'tpekte.
20 O'ytkeni pu'tkil jaratılıs bul o'tkinshi o'mirge tutqın etilgen. Bul olardın' o'zlerinin' erki menen emes, al tutqın qılg'an Qudaydın' erki menen bolg'an.
21 Olar o'zlerinin' bul nabıt qılıwshı qullıqtan qutqarılatug'ınınan ha'm Qudaydın' balalarının' ullı azatlıqqa erisetug'ınınan u'mit etedi.
22 Bizlerge ma'lim, pu'tkil jaratılıs ha'zirge deyin birlikte tolg'aq azabın shekkendey azap shegip, nala etpekte.
23 Tek jaratılıs emes, al Qudaydın' birinshi sıyı bolg'an Muxaddes Ruwxtı alg'an bizler de perzent bolıp asırap alınıwdı, yag'nıy denemizdin' qutqarılıwın intizarlıq penen ku'tip, ishimizden nala etpektemiz.
24 ebebi bizler qutqarılg'anımız sebepli u'mitke iyemiz. Eger bizler o'zlerimiz u'mit etetug'ın na'rseni ko'rip turg'an bolsaq, onda ol u'mit emes. Ko'zge ko'rinip turg'an na'rseni kim u'mit etedi?
25 Biraq, ele ko'rmegenimizge u'mit etsek, onı sabırlılıq penen ku'temiz.
26 Sonın' menen birge, Muxaddes Ruwx ta ha'lsiz bolg'an bizlerge ja'rdem beredi. O'ytkeni bizler qalay duwa etiw kerekligin bilmeymiz. Biraq, Muxaddes Ruwxtın' O'zi so'z benen aytıp jetkize almaytug'ın nala shegip, bizler ushın Qudaydan o'tinish etedi.
27 Adamlardın' kewillerinde ne bar ekenin biliwshi Quday Muxaddes Ruwxtın' oy-pikirlerin biledi. Sebebi Muxaddes Ruwx iseniwshiler ushın Qudaydın' erki boyınsha o'tinish etedi.
28 Quday O'zin su'yetug'ınlarg'a, yag'nıy Onın' qa'lewi boyınsha tan'lang'anlarg'a ha'mme na'rseni jaqsılıq qılıp xızmet ettiretug'ının bilemiz.
29 O'ytkeni Quday O'zi burınnan tan'lag'an adamlarının' Ulına uqsawı ushın olardı aldın ala belgiledi. Solay etip, Quday O'z Ulının' ko'p tuwısqanlar arasında tun'g'ısh bolıwı ushın usılay isledi.
30 Quday O'zi aldın ala belgilegen adamların shaqırdı, shaqırg'an adamların aqladı, al aqlag'an adamların ullılıqqa eristirdi.
31 Olay bolsa, bug'an ne deymiz? Eger Quday bizlerdi jaqlasa, bizlerge kim qarsı tura aladı?
32 Quday, ha'tte, O'z Ulın da ayamay, Onı bizlerdin' ha'mmemiz ushın qurbanlıq qılıp bag'ıshlag'an bolsa, Onın' menen birlikte bizlerge ha'mme na'rseni bermes pe eken?
33 Qudaydın' tan'lap alg'an adamları bolg'an bizlerdi kim ayıplay aladı? Qudaydın' O'zi bizlerdi aqlaydı-g'o.
34 Kim bizlerdi hu'kim ete aladı? Hesh kim! Sebebi o'lip, o'limnen qayta tirilgen Masix İysa Qudaydın' on' jag'ında turıp, bizler ushın o'tinbekte.
35 Masixtın' su'yispenshiliginen bizlerdi kim ayıra aladı? Hesh kim. Qıyınshılıq ta, qayg'ı da, quwdalaw da, ashlıq ta, jalan'ashlıq ta, qa'wip te, qılısh ta ayıra almaydı.
36 Muxaddes Jazıwda aytılg'anday: «Bizler Senin' ushın ha'r ku'ni o'ltirilmektemiz, Bizlerdi shalınatug'ın qoylar dep esaplaydı».
37 Biraq, bulardın' ha'mmesinin' u'stinen bizlerdi su'yetug'ın Masix sebepli u'lken jen'iske erisemiz.
38 O'ytkeni men isenemen: o'lim de, o'mir de, perishteler de, ha'kimshilikler de, ha'zirgi ha'm keleshek zaman da, ku'shler de,
39 ba'lentlik te, teren'lik te, ulıwma, jaratılg'an hesh bir na'rse Qudaydın' bizlerge İyemiz Masix İysa arqalı bergen su'yispenshiliginen bizlerdi ayıra almaydı.
