1 Korinfliler 13 bob
1 Eger men adamlardın' ha'm perishtelerdin' tillerinde so'ylesem de, biraq su'yispenshiligim bolmasa, onda menin' shın'g'ırlag'an mıstan ha'm dan'g'ırlag'an da'pten parqım bolmay qaladı.
2 Eger men payg'ambarshılıq qu'diretine iye bolsam, pu'tkil sırlardı bilsem ha'm ha'r tu'rli bilimge iye bolsam, ha'tte, tawlardı ko'shiretug'ın ku'shli isenimim bolsa da, biraq su'yispenshiligim bolmasa, onda men hesh na'rse emespen.
3 Eger men pu'tkil mal-mu'lkimdi jarlılarg'a u'lestirip bersem, ha'tte, o'zimdi qurban etip, denemdi otqa jag'ıwg'a tapsırsam da, biraq su'yispenshiligim bolmasa, bunnan mag'an hesh qanday payda joq.
4 Su'yispenshilik sabırlı ha'm miyrimli. Su'yispenshilik qızg'anbaydı, maqtanbaydı, menmenlik qılmaydı.
5 Su'yispenshilik qopallıq islemeydi, o'z paydasın go'zlemeydi, tez ashıwlanbaydı, kek saqlamaydı.
6 Su'yispenshilik nahaqlıqqa quwanbaydı, al haqıyqatlıqqa quwanadı.
7 Su'yispenshilik ha'mme na'rseni ko'teredi, ha'mme waqıtta isenedi, ha'mme waqıtta u'mit etedi, ha'mmesine shıdaydı.
8 Su'yispenshilik hesh qashan tawsılıp qalmaydı. Biraq, payg'ambarshılıqlar joq boladı, basqa tillerde so'ylew sıyı toqtap qaladı, bilim de joq boladı.
9 O'ytkeni bizlerdin' bilimimiz de, payg'ambarshılıqlarımız da ele tolıq emes.
10 Biraq, minsiz bolg'an tolıq na'rse kelgende, tolıq emes na'rse joq boladı.
11 Men bala bolg'an waqtımda bala sıyaqlı so'yleytug'ın, bala sıyaqlı pikir ju'rgizetug'ın ha'm bala sıyaqlı tu'sinetug'ın edim. Al eresek adam bolg'anımda, men balag'a ta'n qa'siyetlerdi tasladım.
12 Ha'zir bizler ha'mmesin gu'n'girt aynada ko'rgendey gu'milji ko'rip turmız. Biraq aqırg'ı waqıt kelgende, ju'zbe-ju'z ko'remiz. Ha'zir men tolıq bilimge iye emespen, biraq aqırg'ı waqıt kelgende, Quday meni tolıq bilgendey, men de Onı tolıq biletug'ın bolaman.
13 Solay etip, mına u'sh na'rse ma'n'gige qaladı: isenim, u'mit ha'm su'yispenshilik. Biraq, bulardın' en' baslısı – su'yispenshilik.
