1 Korinfliler 10 bob
1 Tuwısqanlarım! Sizlerdin' mınadan xabarsız qalıwın'ızdı qa'lemeymen: Quday bizlerdin', yag'nıy yahudiylerdin' atababalarının' ha'mmesin bulttın' jetelewi menen ju'rgizip, olardın' barlıg'ın ten'izden keship o'tkizdi.
2 Olardın' ha'mmesi bult astında ha'm ten'izde suwg'a shomıldırıw ra'siminen o'tkendey bolıp, Muwsanın' izine eriwshiler boldı.
3 Ha'mmesi Quday ka'ramatlı jol menen bergen birdey awqattı jedi.
4 Ja'ne de, olardın' ha'mmesi Quday ka'ramatlı jol menen bergen birdey suwdı ishti. Sebebi olar o'zleri menen birge bolg'an ka'ramatlı jartastan suw ishken edi. Bul jar tas – Masix edi.
5 Degen menen, olardın' ko'bisine Qudaydın' kewli tolmag'anlıqtan, su'yekleri sho'lde qaldı.
6 İzraillılar sıyaqlı jaman na'rselerdi qa'lemesin dep, bul waqıyalar bizlerge sabaq bolıwı ushın ju'z berdi.
7 Olardın' ayırımları sıyaqlı butparaz bolman'lar. O'ytkeni Muxaddes Jazıwda bılay dep aytılg'an: «Xalıq iship-jew ushın otırdı, son'ınan orınlarınan turıp, butparazlıq oyınına tu'sti» .
8 Olardın' ayırımları sıyaqlı buzıqshılıq islemeyik. Usılay islep, bir ku'nnin' ishinde jigirma u'sh mın' adam nabıt boldı.
9 Olardın' bazıları sıyaqlı İyemizdi sınamayıq. Usılay islegenlerdi jılan shag'ıp o'ltirgen edi.
10 Olardın' ayırımları sıyaqlı nalıman'lar. Usılay islegenlerdi nabıt qılıwshı perishte o'ltirgen edi.
11 Olardın' basınan keshken bul waqıyalar basqalarg'a sabaq bolıwı ushın ju'z berdi ha'm son'g'ı zamanlarda jasap atırg'an bizlerge eskertiw bolıwı ushın jazıldı.
12 Sonlıqtan isenimde bekkem turman dep esaplaytug'ın adam usınday gu'nalardı islewden saq bolsın!
13 Sizlerdin' basın'ızg'a ha'mme adamlardın' basına tu'setug'ın sınaqlardan basqa sınaqlar tu'sken joq. Quday sadıq, Ol ku'shin'izden artıq sınaqlarg'a tu'siwin'izge jol qoymaydı. Sınaqlarg'a shıdawın'ız ushın, Ol sınaqlar menen birlikte olardan shıg'ıw jolın da beredi.
14 Sonlıqtan su'yikli tuwısqanlarım, butparazlıqtan qashın'lar!
15 Men sizlerge aqıllı adamlarg'a so'ylegendey, so'ylep atırman. So'zlerimdi o'zlerin'iz aqılg'a salıp ko'rin'ler.
16 İyemizdi eslew keshesinde bizler shu'kirlik bildirip ishetug'ın jarılqaw kesesi arqalı Masixtın' qanına sherikles bolmaymız ba? Sındırıp jegen nanımız arqalı da Masixtın' denesine sherikles bolmaymız ba?
17 Nan bir bolg'anlıqtan, bizler ko'p bolsaq ta, bir denemiz. Sebebi ha'mmemiz bir nandı bo'lisemiz.
18 Endi men ne demekshimen? Butqa shalıng'an qurbanlıq ayrıqsha ma? Buttın' qanday da bir a'hmiyeti bar ma?
19 Yaq, olay emes! Menin' aytatug'ınım mınaw: butqa tabınıwshılar qurbanlıqların Qudayg'a emes, al jinlerge beredi. Men sizlerdin' jinlerge sherikles bolıwın'ızdı qa'lemeymen.
20 Sizler ha'm İyemizdin' kesesinen, ha'm jinlerdin' kesesinen ishe almaysızlar. Ja'ne de, ha'm İyemizdin' dasturxanına, ha'm jinlerdin' dasturxanına sherik bola almaysızlar.
21 İyemizdi qızg'andırıwg'a qalay batılımız baradı? Bizler ne, Onnan ku'shlimiz be?
22 Sizler: «Ne islesem de erklimen» deysizler, biraq ha'mme na'rse de paydalı emes. «Ne islesem de erklimen», – deysizler, biraq ha'mme na'rse de isenimdi jetilistirmeydi.
23 Ha'r bir adam o'zinin' emes, al basqalardın' paydasın go'zlesin.
24 Hu'jdanın'ızdın' tınısh bolıwı ushın, bazarda satılatug'ın ha'r qanday go'shtin' qanday go'sh ekenin soramastan jen'ler.
25 O'ytkeni: «Jer ju'zi ha'm jer ju'zindegi pu'tkil barlıq İyemizge tiyisli» .
26 Eger iseniwshi emes bir adam seni awqatqa shaqırsa ha'm sen de barıwdı qa'lesen', hu'jdanın'nın' tınısh bolıwı ushın, aldın'a qoyılg'an ha'r bir na'rseni soramastan je.
27 Biraq, birew sag'an: «Bul butqa berilgen qurbanlıqtın' go'shi» dese, aytqan adamnın' hu'rmeti ushın ha'm onın' hu'jdanı ushın awqattı jeme.
28 Men hu'jdan dep, senin' emes, al basqa adamnın' hu'jdanın na'zerde tutıp atırman. Sebebi nege menin' azatlıg'ımdı basqa birewdin' hu'jdanı hu'kim etiwi kerek?
29 Eger men awqattı shu'kirlik penen qabıl etsem, men nege shu'kirlik etip jegen awqatım sebepli ayıplanıwım kerek+?
30 Eger men awqattı shu'kirlik penen qabıl etsem, men nege shu'kirlik etip jegen awqatım sebepli ayıplanıwım kerek?
31 Solay etip, jesen'iz de, ishsen'iz de, ne na'rseni islesen'iz de, ha'mme na'rseni Qudaydın' dan'qqa bo'leniwi ushın islen'ler.
32 Yahudiylerdin' de, greklerdin' de, Qudaydın' ja'ma'a'tlerinin' de azg'ırılıwına sebep bolman'lar.
33 Men de o'zimnin' paydamdı emes, al ko'plerdin' qutqarılıwı ushın olardın' paydasın go'zlep, ha'r bir iste ha'r bir adamnın' kewlinen shıg'ıwg'a tırısıp atırman.
