1 Korinfliler 16 bob

Mu'ta'jlikte jasap atırg'an iseniwshilerge ja'rdem beriw haqqında (1-4), Paveldin' jobaları (5-12), Paveldin' son'g'ı aqıl-na'siyatları (13-18), Paveldin' son'g'ı aqıl-na'siyatları (19-24).

¹ Endi iseniwshilerge beriletug'ın aqshalay ja'rdemge kelsek, sizler de bunı Galatiyadag'ı iseniwshi ja'ma'a'tlerge tapsırg'anımday islen'ler.

² Ha'r ekshembi ku'ni ha'r birin'iz o'z jag'dayına qarap, aqshanı bo'lek jıynap qoysın. Sonda men sizlerge barg'anımda, aqshanı jıynap ju'riwdin' za'ru'rligi bolmaydı.

³ Sizlerge barg'anımda, bergen sadaqaların'ızdı aparıwg'a kimlerdi ılayıqlı ko'rsen'iz, men sol adamlarg'a xatlar berip, Erusalimge jiberemen.

⁴ Eger menin' de ketiwim kerek bolsa, olar menin' menen birge ketedi.

⁵ Men sizlerge Makedoniya arqalı baraman. Sebebi men usı u'lke arqalı ju'rmekshimen.

⁶ Qasın'ızda bir qansha waqıt qalıwım, ha'tte, sizler menen qıstı da birge o'tkiziwim mu'mkin. Sonnan keyin, men qay jerge ketejaq bolsam da, sizler mag'an ja'rdem etersiz.

⁷ Men bul saparı sizlerdi jol-jo'nekey ko'rip ketiwdi qa'lemeymen. Eger İyemiz ruxsat etse, sizler menen birge bir qansha waqıt qalıwdan u'mit etemen.

⁸ Biraq, men Efeste Eliwinshi ku'ni bayramına deyin qalajaqpan.

⁹ O'ytkeni bul jerde o'nimli miynet etiwim ushın mag'an ken' jol ashıldı. Degen menen, mag'an qarsı shıg'ıp atırg'anlar da ko'p.

¹⁰ Timofey sizlerge barg'anda, aran'ızda qa'wipsiz ju'riwi ushın ko'z qulaq bolın'lar. Sebebi ol da men sıyaqlı İyemizge xızmet etedi.

¹¹ Sonlıqtan onı hesh kim pa's ko'rmesin. Menin' qasıma keliwi ushın onı aman-esen shıg'arıp salın'lar. O'ytkeni men tuwısqanlarımız benen birge onın' keliwin ku'tip otırman.

¹² Tuwısqanımız Apolosqa kelsek, tuwısqanlarımız benen birge sizlerge barıwın onnan ko'p o'tingen edim. Biraq, ol ha'zir sizlerge barıwdı hesh qa'lemey atır. Qolaylı jag'day tuwılg'anda, ol sizlerge baradı.

¹³ Sergek bolın'lar, isenimde bekkem turın'lar, ma'rt ha'm jigerli bolın'lar.

¹⁴ Ha'r bir na'rseni su'yispenshilik penen islen'ler.

¹⁵ Axaya u'lkesinde birinshi bolıp isengen ha'm o'zlerin iseniwshilerdin' xızmetine bag'ıshlag'an Stepannın' xojalıg'ın bilesizler. Sizlerden o'tinish, tuwısqanlarım:

¹⁶ sizler de usınday adamlarg'a ha'm olar menen birge miynet etetug'ın adamlardın' ha'mmesine boysının'lar.

¹⁷ Men Stepannın', Fortunatustın' ha'm Axayktın' kelgenine quwanıshlıman. Olar sizlerdin' ornın'ızdı basıp, sizlerdin' joqlıg'ın'ızdı umıttırdı.

¹⁸ Olar menin' ruwxımdı da, sizlerdin' ruwxın'ızdı da ko'terdi. Bunday adamlardın' qa'dirin bilin'ler.

¹⁹ Aziya u'lkesindegi ja'ma'a'tler sizlerge sa'lem aytıp atır. Akila menen Priskila ha'm olardın' u'yindegi iseniwshiler ja'ma'a'ti İyemiz benen qatnasta bolg'an sizlerge ko'p-ko'p sa'lem aytıp atır.

²⁰ Usı jerdegi barlıq tuwısqanlar da sizlerge sa'lem aytıp atır. Bir-birin'izdi muxaddes posa menen su'yip sa'lemlesin'ler.

²¹ Men, Pavel, bul sa'lemnamanı o'z qolım menen jazıp atırman.

²² İyemizdi su'ymeytug'ın adamg'a na'let bolsın! O İyemiz, kele-go'r!

²³ İyemiz İysanın' miyrimi sizlerge yar bolsın!

²⁴ Men sizlerdin' ha'mmen'izdi Masix İysanın' su'yispenshiligi menen su'yemen. Awmiyin.