1 Korinfliler 5 bob
1 Sizlerdin' aran'ızda buzıqshılıq islenip atırg'anı haqqında anıq xabarlar bar. Ha'tte, Qudayg'a isenbeytug'ınlar arasında da ushıraspaytug'ın buzıqshılıq islenipti: aran'ızdag'ı birin'iz a'kesinin' hayalı, yag'nıy o'gey anası menen jasaytug'ın qusaydı.
2 Usılay bolsa da, sizler menmenlikke berilip ketipsizler. Bunın' ornına qayg'ırıp, usınday is qılg'andı aran'ızdan quwıp shıg'arıwın'ız kerek emes pe edi?
3 Menin' o'zim aran'ızda bolmasam da, ruwxım sizler menen birge. Sonlıqtan o'zim aran'ızda bolg'anday, usınday isti islegendi hu'kim etiwge qarar qıldım
4 Sizler İyemiz İysanın' atı menen jıynalg'anın'ızda, İyemiz İysanın' qu'direti menen menin' ruwxım da sizler menen birge boladı.
5 Sonda bul adamnın' gu'nakar ta'biyatı nabıt bolıp, ruwxı İyemiz İysa Masix kelgen ku'ni qutqarılıwı ushın onı ja'ma'a'tten quwıp shıg'arıp, shaytang'a tapsırın'.
6 Sizlerdin' maqtang'anın'ız durıs emes. Azg'antay ashıtqı pu'tkil qamırdı ashıtatug'ının bilmeysizler me?
7 Sonlıqtan sizler eski ashıtqıdan tazalanıp, jan'a qamır bolın'lar. Sizler negizinde ashıtqısız qamırsızlar. O'ytkeni Qutqarılıw bayramının' Qozısı bolg'an Masix bizler ushın qurbanlıqqa berildi.
8 Sonlıqtan eski ashıtqı menen, yag'nıy jawızlıq ha'm jamanlıq penen emes, al pa'klik ha'm haqıyqatlıq penen, yag'nıy ashıtqısız nan menen bayramlayıq.
9 Men o'z xatımda buzıqshılıq isleytug'ınlar menen qatnas jasaman', dep sizlerge jazg'an edim.
10 Degen menen, men ulıwma bul du'nyadag'ı buzıq, na'psiqaw, tonawshı yamasa butparaz adamlardı na'zerde tutqan joqpan. Eger olay bolg'anda, sizler bul du'nyadan shıg'ıp ketiwge ma'jbu'r bolar edin'ler!
11 Biraq, o'zin iseniwshi tuwısqanın'ızban dep atap turıp, buzıq, na'psiqaw, butparaz, jalaxor, ma'sku'nem yamasa tonawshı bolg'an adam menen qatnas jasamawın'ızdı, ha'tte, sonday adam menen birge awqat ta jemewin'izdi jazg'an edim.
12 İseniwshiler ja'ma'a'tinin' sırtındag'ı adamlardı hu'kim qılıw menin' jumısım emes. Sizler iseniwshiler ja'ma'a'tinin' ishindegi adamlardı hu'kim qılıwın'ız kerek.
13 Al iseniwshiler ja'ma'a'tinin' sırtındag'ı adamlardı Qudaydın' O'zi hu'kim qıladı. Muxaddes Jazıwda aytılg'anday: «Jaman adamdı aran'ızdan quwıp shıg'arın'lar».
