1 Korinfliler 6 bob
1 Sizlerdin' aran'ızdag'ı birin'izdin' birewge dawı bolsa, iseniwshiler aldında emes, al sudtag'ı isenbeytug'ın adamlar aldında dawlasıwg'a qalay batılı baradı?
2 Keleshekte biz iseniwshilerdin'* du'nyanı hu'kim etetug'ının bilmeysizler me? Eger sizler du'nyanı hu'kim etetug'ın bolsan'ız, kishkene dawlardı sheshiw qolın'ızdan kelmegeni me?
3 Bizler, ha'tte, perishtelerdi de hu'kim etemiz. Solay eken, turmıs islerin hu'kim ete alıwımız da so'zsiz-g'o.
4 Solay bolsa da, turmıs islerine baylanıslı dawlar payda bolg'anda, sizler iseniwshiler ja'ma'a'tinde hesh qanday abırayg'a iye bolmag'an sudtag'ı isenbeytug'ın adamlardı to'reshi qılasızlar ma?
5 Bulardı sizlerdi uyaltıw ushın aytıp atırman. İseniwshi tuwısqanlarının' arasındag'ı dawlardı sheshetug'ın aran'ızda birde bir aqıllı adam joq bolg'anı ma?
6 Biraq tuwısqan tuwısqang'a qarsı dawlasadı, onın' u'stine isenbeytug'ınlar aldında dawlasadı!
7 Negizinde, bir-birin'izge qarsı dawın'ızdın' bolıwının' o'zi sizler ushın qattı uyat na'rse. Onnan go're, nahaqlıqqa shıdag'anın'ız jaqsıraq bolmas pa edi? Tonalg'anın'ız jaqsıraq bolmas pa edi?
8 Sizler onın' ornına o'zlerin'iz nahaqlıq islep, birewdi tonap atırsız. Ol da bolsa, o'zin'izdin' tuwısqanın'ız.
9 Nahaqlardın' Qudaydın' Patshalıg'ın miyras etip almaytug'ının bilmeysizler me? Aldanban'lar! Buzıqshılıq islewshiler, butparazlar, neke hadallıg'ın buzıwshılar, erkek penen jınısıy qatnas jasaytug'ın erkekler,
10 urılar, na'psiqawlar, ma'sku'nemler, jalaxorlar ha'm tonawshılar Qudaydın' Patshalıg'ın miyras etip almaydı.
11 Aran'ızdag'ı ayırımların'ız usınday adamlar edi. Biraq, sizler İyemiz İysa Masixtın' atı menen ha'm Qudayımızdın' Ruwxı menen tazalandın'ız, muxaddes boldın'ız ha'm aqlandın'ız.
12 Sizler: «Ne islesem de eriklimen» deysizler, biraq ha'mme na'rse de paydalı emes. Durıs, «Men ne islesem de eriklimen», biraq hesh bir na'rse de meni qul qılmawı kerek.
13 «Awqat qarın ushın, al qarın awqat ushın jaratılg'an», – deysizler. Degen menen, Quday ekewin de joq qıladı. Biraq, dene buzıqshılıq ushın emes, al İyemiz ushın jaratılg'an. İyemiz de denemizge g'amxorlıq qıladı.
14 Quday İyemizdi o'limnen tiriltti. Sol sıyaqlı, Ol bizlerdin' denemizdi de O'z qu'direti menen tiriltedi.
15 enelerin'izdin' Masixtın' mu'sheleri ekenligin bilmeysizler me? Masixtın' mu'shelerin alıp, buzıq hayaldın' mu'sheleri qılıwg'a bola ma? Hesh qashan!
16 Buzıq hayal menen qosılg'an adam onın' menen bir dene bolatug'ının bilmeysizler me? Sebebi Muxaddes Jazıwda: «Ekewi bir dene boladı», – delingen-g'o.
17 Biraq, İyemiz benen qosılg'an adam Onın' menen bir ruwx boladı.
18 Buzıqshılıqtan awlaq bolın'lar! Adamnın' isleytug'ın basqa barlıq gu'naları denesinin' sırtında islenedi. Al buzıqshılıq islegen adam o'z denesine qarsı gu'na isleydi.
19 Denen'izdin' o'zlerin'iz Qudaydan alg'an ha'm sizlerde jasap atırg'an Muxaddes Ruwxtın' ibadatxanası ekenligin bilmeysizler me? Sizler o'zin'izge tiyisli emessiz.
20 O'ytkeni Quday biybaha to'lem to'lep, sizlerdi satıp aldı. Sonlıqtan da, o'z denen'iz benen Qudaydı alg'ıslan'lar.
