2 Korinfliler 2 bob
1 Solay etip, sizlerdi ja'ne qapa qılmayın dep, sizlerge barmawg'a kewlimde qarar ettim.
2 O'ytkeni eger men sizlerdi ja'ne qapa qılsam, onda meni kim quwantadı? O'zim qapa qılg'an sizlerden basqa, kim kewlimdi ko'teredi? A'lbette, hesh kim!
3 Sonlıqtan men barg'anımda, quwantıwı kerek bolg'an adamlar meni qapa qılmawı ushın, sol xattı jazıp jibergen edim. Sebebi menin' quwanıshım sizlerdin' ha'mmen'izdin' quwanıshın'ız ekenine isengen edim.
4 Men sol xattı teren' qayg'ırıp, ju'regim ezilip, ko'z jaslarımdı to'gip otırıp jazdım. Bundag'ı maqsetim – sizlerdi qapa qılıw emes, al sizlerge degen sheksiz su'yispenshiligimdi bildiriw edi.
5 Eger aran'ızda bir adam basqalardı qapa qılg'an bolsa, ol tek meni emes, al qanday da bir da'rejede sizlerdin' ha'mmen'izdi qapa qılg'an boladı. Men bunı asırıp aytıp atırg'an joqpan.
6 Bul adamg'a sizlerdegi ko'pshilik ta'repinen berilgen jaza jeterli boladı.
7 Solay etip, ol ha'dden tıs qayg'ırmawı ushın onı keshirip, jubanısh bergenin'iz maqulıraq boladı.
8 Sonlıqtan og'an degen su'yispenshiligin'izdi da'lillewin'izdi o'tinish etemen.
9 Ha'r bir iste so'zime qulaq asatug'ının'ızdı yamasa aspaytug'ının'ızdı sınap biliw ushın, men sizlerge sol xattı jazg'an edim.
10 Sizler onı keshirsen'iz, onı men de keshiremen. Eger men onı keshirgen bolsam, onı sizler ushın Masix aldında keshirdim.
11 Solay etip, shaytannın' awhaldan paydalanıp, pa'nt beriwine jol qoymayıq. O'ytkeni bizler onın' jawız jobalarınan xabarsız emespiz.
12 Men Masixtın' Xosh Xabarın ja'riyalaw ushın Troasqa barg'anımda, İyemiz mag'an ko'p mu'mkinshilik bergen edi.
13 Degen menen, tuwısqanımız Titustı sol jerde ushırata almag'anım sebepli, ruwxım tınıshsızlandı. Sonlıqtan sol jerdegiler menen xoshlasıp, Makedoniyag'a kettim.
14 Qudayg'a shu'kirler bolsın! Ol bizlerdi ba'rqulla Masixtın' jen'isinin' saltanatlı ju'risinde jetelep ju'redi ha'm bizler arqalı ha'mme jerde Masix haqqında bilimdi xosh iyis sıyaqlı tarqatadı.
15 Sebebi bizler qutqarılıp atırg'anlar arasında da, nabıt bolıp atırg'anlar arasında da, Masixtın' Qudayg'a bag'ıshlag'an xosh iyisimiz.
16 Bizler Xosh Xabardı ja'riyalag'an waqtımızda, nabıt bolıp atırg'anlar ushın o'limge aparatug'ın o'lim iyisimiz. Al qutqarılıp atırg'anlar ushın o'mir beretug'ın o'mir iyisimiz. Bunday xızmetke ılayıqlı hesh kim joq!
17 O'ytkeni o'z paydası ushın Qudaydın' so'zin satıp beretug'ın ko'p adamlar bar. Biraq, bizler onday adamlar emespiz. Bizler Quday ta'repinen jiberilgen ha'm Masixqa tiyisli bolg'an adamlar sıpatında Xosh Xabardı Quday aldında haq kewil menen ja'riyalaymız.
