1 Salonikalılar 4 bob

Qudayg'a unaytug'ın o'mir (1-12),İysanın' qayta keliwi (13-18).

¹ Endi bolsa, tuwısqanlar, Qudayg'a unaw ushın qalay jasaw kerekligin sizler bizlerden u'yrendin'iz. Ha'zir usılay jasap atırsız da. Bul iste ja'ne de alg'a ilgerilewin'izdi İyemiz İysanın' atı menen sizlerden o'tinish etip soraymız.

² O'ytkeni İyemiz İysanın' biyligi menen sizlerge qanday jol-jorıqlardı bergenimizdi o'zlerin'iz bilesizler.

³ Qudaydın' erki – sizlerdin' muxaddes bolıwın'ızdan ibarat. Yag'nıy, Ol sizlerdin' jınısıy buzıqshılıqtan awlaq ju'riwin'izdi,

⁴ ha'r birin'izdin' o'z denesin qa'dirlep, muxaddes qılıp saqlawın

⁵ ha'm Qudaydı bilmeytug'ın butqa tabınıwshılar sıyaqlı buzıq qa'lewlerge berilmewin qa'leydi.

⁶ Hesh kim usınday iste tuwısqanına qıyanet etip, haramılıq islemesin. Burın sizlerge aytqanımız ha'm eskertkenimizdey, İyemiz bunday barlıq isler ushın adamlardı jazalaydı.

⁷ Sebebi Quday bizlerdi haram bolıp jasaw ushın emes, al muxaddes bolıp jasaw ushın shaqırdı.

⁸ Solay etip, bul jol-jorıqtı qabıl almag'an adam adamdı emes, al Muxaddes Ruwxın sizlerge bergen Qudaydı qabıl almag'an boladı.

⁹ Biraq tuwısqanlıq su'yispenshilik haqqında birewdin' sizlerge bir na'rse jazıwına ha'jet joq. O'ytkeni bir-birin'izdi su'yiwdi sizler Qudaydan u'yrendin'ler.

¹⁰ Sizler haqıyqattan da pu'tkil Makedoniyadag'ı tuwısqanlardın' ha'mmesin su'yesizler. Tuwısqanlar, bul iste ja'ne de alg'a ilgerilewin'izdi sizlerden o'tinish etemiz.

¹¹ Ja'ne de, sizlerge jol-jorıq bergenimizdey, tınısh o'mir su'riwdi, o'z isin'izge kewil bo'liwdi ha'm qolların'ız benen miynet etiwdi maqset etip qoyın'lar.

¹² Solay etip, sizler ja'ma'a'tten tıs adamlardın' aldında hu'rmet-izzetli o'mir su'resizler ha'm hesh kimnen g'a'rezli bolmaysızlar.

¹³ Tuwısqanlar! U'mitsiz jasaytug'ın basqa adamlar sıyaqlı qayg'ırmawın'ız ushın, bul du'nyadan ko'z jumg'anlar haqqında sizlerdin' xabarsız qalıwın'ızdı qa'lemeymiz.

¹⁴ Sebebi bizler İysanın' o'lip, qayta tirilgenine isenemiz. Sol sıyaqlı, İysag'a isenip, bul du'nyadan ko'z jumg'anlardı Quday Onın' menen birge qayta alıp keletug'ınına da isenemiz.

¹⁵ İyemizdin' so'zine tiykarlanıp, sizlerge mınanı bildiremiz: ha'zir tiri bolıp jasap atırg'an bizler, yag'nıy İyemiz kelemen degenshe tiri ju'retug'ınlar bul du'nyadan ko'z jumg'anlardan hesh artıq emespiz.

¹⁶ O'ytkeni İyemizdin' O'zi buyırg'an ba'lent dawıs, bas perishtenin' sesti ha'm Qudaydın' ka'rnayı menen aspannan kelgende, da'slep Masixqa isengen o'liler tiriledi.

¹⁷ Onnan son', jasap atırg'an bizler, yag'nıy tiri qalg'anlar olar menen birlikte İyemizdi hawada ku'tip alıw ushın, bultlar ishine alınıp ko'terilemiz. Solay etip, ha'mme waqıt İyemiz benen birge bolamız.

¹⁸ Mine, usı so'zler menen bir-birin'izdi jubatın'lar.