Titus 2 bob
1 Al sag'an kelsek, sen durıs ta'liymat boyınsha ta'lim ber.
2 U'lken jastag'ı er adamlarg'a saldamlı ha'm hu'rmetke miyasar bolıwdı, o'zlerin tutıp biliwdi, isenimde, su'yispenshilikte ha'm sabırlılıqta bekkem bolıwdı u'yret.
3 Sol sıyaqlı, u'lken jastag'ı hayallarg'a da hu'rmetke ılayıqlı o'mir su'riwdi, o'sekshi ha'm araqtın' qulı bolmawdı, al jaqsılıqtı u'yretiwshi bolıwı kerekligin u'yret.
4 Sonda u'lken jastag'ı hayallar jas hayallarg'a aqıl-na'siyat bere aladı.
5 Qudaydın' so'zine til tiymewi ushın, olar jas hayallarg'a ku'yewlerin ha'm balaların su'yiwdi, o'zlerin tutıp biliwdi, pa'k, xojalıqqa janku'yer, miyrimli bolıwdı ha'm ku'yewlerine boysınıwdı u'yrete aladı.
6 Jas er adamlarg'a da o'zlerin tıyıp biliwdi na'siyat et.
7 aqsı isler islep, olarg'a ha'r bir na'rsede o'rnek bol. Ta'lim bergenin'de hadal ha'm saldamlı bolıp,
8 hesh kim ayıplay almaytug'ın durıs so'zlerdi so'yle. Solay etip, sag'an qarsı shıqqanlar bizler tuwralı hesh jaman na'rse ayta almag'anlıqtan uyalıp qaladı.
9 Qullarg'a xojayınlarına ha'r bir na'rsede boysınıp, olardın' kewlinen shıg'ıwdı, qaytarıp so'ylemey.
10 ha'm urlıq islemey, tolıq sadıqlıq ko'rsetiwdi u'yret. Sonda olar Qutqarıwshımız Qudaydın' ta'liymatına ha'r ta'repleme jaqsı at keltiredi.
11 O'ytkeni Qudaydın' qutqaratug'ın miyrimi pu'tkil adamlarg'a ashıq ko'rindi.
12 Bul miyrim bizlerge qudaysızlıqtan ha'm du'nyanın' jaman ha'weslerinen waz keship, ha'zirgi da'wirde o'zlerimizdi tıyıp biliwdi, haq bolıwdı ha'm Qudaydın' jolına ılayıqlı o'mir su'riwdi u'yretedi.
13 Ja'ne de, ol bizlerge ha'zirshe, mu'ba'rek u'mitimizdin', yag'nıy ullı Qudayımız ha'm Qutqarıwshımız bolg'an İysa Masixtın' saltanat penen keliwin ku'ttiredi.
14 İysa Masix ha'r bir gu'namızdın' to'lemin o'tep qutqarıw ushın ha'm bizlerdi tazalap, O'zine tiyisli ha'm jaqsılıq islewge intalı bir xalıq jaratıw ushın, O'zin bizler ushın qurban etti.
15 Usılardı tolıq biylik penen u'yretip, jigerlendir ha'm keyi. O'zin'di hesh kimge kemsitpe.
