Evreyler 13 bob
1 Bir-birin'izdi tuwısqanlarsha su'yiwdi dawam etin'ler.
2 Miymandoslıqtı umıtpan'lar. O'ytkeni ayırımlar usılay islep, o'zleri bilmey, perishtelerdi qonaq qılg'an.
3 Qamaqta bolg'anlardı o'zlerin'iz olar menen birge tutqın bolg'anday este tutın'lar. Ja'ne de, azap shegip atırg'anlardı da o'zlerin'iz azap shegip atırg'anday yadın'ızdan shıg'arman'lar.
4 4Ha'mmen'iz nekege hu'rmet penen qaran'lar. Neken'izdin' to'segi gu'na menen bılg'anbasın. Sebebi Quday buzıqshılıq islegenlerdi ha'm neke hadallıg'ın buzg'anlardı hu'kim etedi.
5 Aqshanı su'yiwden awlaq bolıp jasan'lar. O'zlerin'izde barg'a qanaat etin'ler. O'ytkeni Quday bılay degen: «Seni hesh qashan taslap ketpeymen, Hesh qashan qaldırmayman».
6 Sonlıqtan bizler batırlıq penen bılay deymiz: «Jaratqan İyem mag'an ja'rdem beredi, men qorqpayman, Adam mag'an ne isley aladı?»
7 Sizlerge Qudaydın' so'zin aytqan jetekshilerin'izdi eske tu'sirin'ler. Olardın' qalay jasag'anına ha'm o'mirinin' aqırı qanday bolg'anına qarap, olardın' iseniminen o'rnek alın'lar.
8 İysa Masix keshe, bu'gin ha'm ma'n'gilikke birdey.
9 Ha'r tu'rli jat ta'liymatlarg'a berilip, azg'ırılman'lar. Kewildin' awqatqa baylanıslı qag'ıydalardı orınlaw menen emes, al Qudaydın' miyrimi menen bekkemlengeni jaqsı. Bunday qag'ıydalardı orınlawshılar hesh qanday payda ko'rmedi.
10 Bizlerdin' qurbanlıq shalınatug'ın ornımız bar. Onın' u'stinde İysa Masix bizler ushın qurban boldı. Muxaddes shatırda xızmet etetug'ın yahudiy ruwxaniylerinin' sol qurbanlıqtan payda ko'riwge haqısı joq.
11 Yahudiy bas ruwxaniyi gu'na ushın qurbanlıqqa berilgen mallardın' qanın En' muxaddes bo'lmege aparadı. Al shalıng'an mallardın' denesi elattın' sırtında o'rtep jiberiledi.
12 Sol sıyaqlı İysa da O'z qanı menen adamlardı muxaddes qılıw ushın, qala da'rwazasının' sırtında azap shekti.
13 Olay bolsa, bizler de Onın' ko'rgen xorlıg'ın bo'lisiwimiz ushın, elattın' sırtına shıg'ıp, Og'an barayıq.
14 Sebebi bul jerde bizlerdin' ma'n'gilik qalamız joq. Bizler keleshekte aspannan tu'setug'ın qalanı a'rman etemiz.
15 Sonlıqtan İysa arqalı Qudayg'a u'zliksiz maqtawlarımızdı qurbanlıq sıpatında usınayıq. Yag'nıy, Onın' atına degen alg'ıslarımız awzımızdan tu'spesin.
16 Jaqsılıq islewdi ha'm o'zlerin'izde bolg'an na'rseni basqalar menen bo'lisiwdi umıtpan'lar. O'ytkeni bunday qurbanlıqlar Qudayg'a unaydı.
17 Jetekshilerin'izdin' so'zlerin tın'lan'lar ha'm olarg'a boysının'lar. Sebebi olar sizler ushın Qudayg'a esap beretug'ın adamlar bolg'anlıqtan, janların'ızdı qarawıllaydı. Olar bul xızmetin quwanısh penen, nalımay atqarıw ushın, olarg'a qulaq asın'lar. Bolmasa, o'zlerin'iz zıyan ko'resizler.
18 Bizler ushın duwa etin'ler. Bizler o'zlerimizdin' pa'k hu'jdang'a iye ekenimizge ha'm ha'r ta'repleme hadal o'mir su'riwdi qa'leytug'ınımızg'a isenemiz+.
19 A'sirese janın'ızg'a tez qaytıp barıwım ushın duwa etiwin'izdi o'tinish etemen.
20 O'z qanın to'gip, ma'n'gilik kelisimdi bekitiwi arqalı qoylardın' ullı Shopanı bolg'an İyemiz İysanı tınıshlıq beriwshi Quday o'limnen tiriltti.
21 Usı Quday Onın' erkin orınlawın'ız ushın, sizlerge ha'r bir jaqsı na'rseni jetkizsin. O'zine unaytug'ın na'rseni Ol İysa Masix arqalı bizlerde a'melge asırsın. Masixqa ma'n'gige dan'q bolsın! Awmiyin.
22 Tuwısqanlarım, sizlerge o'tinish etemen, usı na'siyat so'zlerimdi qabıl etin'ler. O'ytkeni men sizlerge qısqasha jazdım.
23 Tuwısqanımız Timofeydin' azat etilgenin biliwin'izdi qa'leymen. Ol jaqın arada janıma kelse, onın' menen birlikte sizlerdi ko'riwge baraman.
24 Jetekshilerin'izdin' ha'mmesine ha'm pu'tkil iseniwshilerge sa'lem aytın'lar. İtaliyadan kelgenler sizlerge sa'lem aytıp atır.
25 Qudaydın' miyrimi ha'mmen'izge yar bolsın!
