Ayan 12 bob
1 Aspanda bir ullı ka'ramatlı belgi payda boldı: quyashqa orang'an, ayaqlarının' astında ay, basında on eki juldızlı tajı bar bir hayal ko'rindi.
2 Hayal ha'mledar edi, ol bosanbaqshı bolıp, tolg'aq tutıp baqırmaqta edi.
3 Son'ınan aspanda basqa bir ka'ramatlı belgi payda boldı: jeti baslı, on shaqlı, baslarında jeti tajı bar, u'lken qızıl aydarha ko'rindi.
4 Aydarha quyrıg'ı menen aspandag'ı juldızlardın' u'shten birin sıpırıp, jerge ılaqtırdı. Son'ınan ol tuwılıwdan-aq balanı jutıp jiberiw ushın, tuwayın dep atırg'an hayaldın' aldında turıp aldı.
5 Hayal ul tuwdı. Bul bala barlıq milletlerdi temir tayaq penen basqaradı. Bala da'rhal Qudayg'a, Qudaydın' taxtına alıp kelindi.
6 Al hayal sho'lge qashıp ketti. Ol jerde hayaldın' bir mın' eki ju'z alpıs ku'n bag'ılıwı ushın, Quday ta'repinen tayarlang'an bir orın bar edi.
7 Aspanda sawash baslandı. Bas perishte Mixail ha'm onın' perishteleri aydarhag'a qarsı urıstı. Aydarha da o'z perishteleri menen olarg'a qarsı urıssa da,
8 ku'shi jetpey jen'ilip qalıp, aspandag'ı orınlarınan ayırıldı.
9 U'lken aydarha, a'za'zu'l yamasa shaytan dep atalg'an, pu'tkil du'nyanı joldan azg'ırg'an eski jılan perishteleri menen birlikte jerge ılaqtırıldı.
10 Sonda men aspanda ba'lent bir dawıstın' bılay degenin esittim: «Qudayımızdın' qutqarıwı, qu'direti, patshalıg'ı Ha'm Masixının' hu'kimdarlıg'ı endi ornadı. O'ytkeni tuwısqanlarımızdın' ayıplawshısı, Olardı Qudayımızdın' aldında ku'ni-tu'ni Ayıplag'an shaytan jerge ılaqtırıldı.
11 Tuwısqanlarımız Qozının' qanı menen Ha'm o'zleri aytqan gu'walıqları menen onı jen'di. Bul ushın olar o'z janların o'limge qıydı.
12 Sonlıqtan, ha'y, aspan ha'm onda jasawshılar shadlanın'lar! Al jer ha'm ten'iz sizler ha'siret shegesizler! Sebebi shaytan qa'ha'rli tu'rde u'stilerin'izge tu'sti. Ol o'z waqtının' az qalg'anın biledi».
13 Aydarha o'zinin' jerge ılaqtırılg'anın ko'rgende, ul bala tuwg'an hayaldın' izinen quwa ketti.
14 Hayaldın' jılannan sho'ldegi o'zi ushın arnalg'an jerge ushıp ketiwi ushın, og'an u'lken bir bu'rkittin' eki qanatı berildi. Hayal ol jerde u'sh yarım jıl bag'ılıwı lazım edi.
15 Sonda jılan hayaldı sel menen ıg'ızıp jiberiw ushın, awzınan onın' izinen da'ryaday suw ag'ızdı.
16 Biraq jer awzın ashtı da, aydarhanın' awzınan ag'ızg'an suwın jutıp jiberip, hayalg'a ja'rdem etti.
17 Sonda aydarha hayalg'a qarsı qa'ha'rlendi. Ol hayal na'silinen bolg'an basqalar menen, yag'nıy Qudaydın' buyrıqların orınlap, İysa Masixtın' gu'walıg'ına sadıq qalg'anlar menen urısıwg'a atlandı.
18 Aydarha ten'iz jag'asında turıp aldı.
