Ayan 18 bob
1 Bunnan son', men ku'shli biylikke iye basqa bir perishtenin' aspannan tu'skenin ko'rdim. Onın' saltanatınan du'nya ju'zi jarqırap ketti.
2 Perishte qattı dawıslap bılay dedi: «Quladı! Ullı Babilon quladı! Ol endi jinlerdin' ma'kanı, Ha'r tu'rli jawız ruwxlardın' ordası, Ha'r qıylı haram ha'm jerkenishli quslardın' uyası boldı.
3 O'ytkeni barlıq milletler onın' buzıqshılıg'ının' ku'shli sharabın ishti. Du'nyanın' patshaları onın' menen birge buzıqshılıq isledi. Du'nyanın' sawdagerleri de onın' asıp-tasqan molshılıg'ınan bayıp ketti».
4 Sonda men aspannan basqa bir dawıs esittim. Bul dawıs bılay dedi: «Ha'y, xalqım! Onın' gu'nalarına sherik bolıp, Ol duwshar bolg'an ba'lelerge duwshar bolmawın' ushın, onnan shıg'ıp ket!
5 Sebebi onın' gu'naları u'sti-u'stine jıynalıp, aspang'a jetti, Quday onın' jaman islerin yadında saqladı.
6 Babilon sizlerge ne qılg'an bolsa, og'an sonı qaytarın'lar. İslegen islerin eki ese etip qaytarın'lar, O'zi aralastırıp tayarlag'an sharaptan eki ese toltırıp, og'an berin'ler.
7 Ol qanshama sa'n-saltanatqa ha'm molshılıqqa bo'lengen bolsa, og'an sonshama qayg'ı-ha'siret berin'ler. O'ytkeni ol o'z kewlinde: „Men hayal patsha bolıp, taxtta otırman, jesir emespen. Hesh qashan qayg'ı ko'rmeymen“, – deydi.
8 Sonlıqtan ol o'lim, qayg'ı ha'm ashlıq ba'lelerine bir ku'nnin' ishinde duwshar boladı, ol otta janıp ku'l boladı. Sebebi onı hu'kim qılıwshı Quday İyemiz qu'diretli».
9 Onın' menen birge buzıqshılıq islep, onın' asıp-tasqan molshılıg'ın bo'lisken du'nyanın' patshaları ol janıp atırg'an ottın' tu'tinin ko'rgende, onı azalap jılaydı.
10 Olar onın' shegip atırg'an azabınan qorqıp, uzaqta turıp: «Way-way, ullı qala, ku'shli qala Babilon! Az waqıt ishinde hu'kim etildin'-g'o», – deydi.
11 Du'nyanın' sawdagerleri de ol ushın jılap, aza tutadı. O'ytkeni olardın' buyımların satıp alatug'ın endi hesh kim joq.
12 Olar altın, gu'mis, hasıl taslar, hinji, bahalı gezleme, jipek, qızg'ılt ko'k ha'm qırmızı gezlemelerdi, ha'r tu'rli xosh iyisli ag'ashlardı, pil su'yeginen islengen zatlardı, qımbat bahalı ag'ashlardan islengen na'rselerdi, qola, temir ha'm ma'rmerden islengen ha'r qıylı buyımlardı,
13 da'mli qabıq, mazalı da'm beretug'ın na'rselerdi, xosh iyisli tu'tetkilerdi, a'tir may, a'tir, sharap, za'ytu'n mayı, sapalı un ha'm biyday, iri qara mal ha'm qoylar, atlar ha'm arbalar, qullardı, ja'ne de adam janın satatug'ın ha'm satıp alatug'ın edi.
14 Olar ja'ne: «Janın' su'ygen miyweler qolın'nan ketti. Pu'tkil baylıg'ın' ha'm ko'zdi qamastıratug'ın zatların' joq boldı. Endi olardı hesh qashan taba almaysan'», – deydi.
15 Babilonda usı na'rselerdi satıp, bayıp ketken sawdagerler qalanın' shekken azabınan qorqınıshqa tu'sedi ha'm uzaqta turıp, jılap aza tutadı.
16 Olar bılay deydi: «Way, way, ullı qala! Bahalı gezleme, qızg'ılt ko'k ha'm qırmızı lipaslar kiygen, altın, hasıl taslar ha'm hinjiler menen bezengen ullı qala!
17 Usınday u'lken baylıq az waqıt ishinde joq boldı». Barlıq keme basshıları, keme jolawshıları, kemede isleytug'ınlar ha'm ten'izden ku'n ko'retug'ınlardın' ha'mmesi uzaqta turıp,
18 ol jang'an ottın' tu'tinin ko'rgende: «Usı ullı qalag'a ten' keletug'ın qala bar ma?» – dep dad saldı.
19 Baslarına ku'l shashtı, aza tutıp jılap, bılay dep baqırıstı: «Way, way, ullı qala! Ten'iz kemelerine iye bolg'anlardın' ha'mmesi ol sebepli, onın' qımbat bahalı buyımları sebepli bayıg'an edi. Degen menen, qala az waqıt ishinde wayran boldı.
20 Quwanın'lar Babilonnın' awhalına, Ha'y aspan, muxaddesler, elshiler ha'm payg'ambarlar! Sebebi Quday onı hu'kim etip, sizler ushın o'sh aldı».
21 Son'ınan bir ku'shli perishte u'lken digirman tasına uqsaytug'ın bir tastı ko'terip, ten'izge ılaqtırdı da, bılay dedi: «Ullı qala Babilon! Minekey, ol usınday ku'sh penen ılaqtırılıp, ma'n'gige joq boladı.
22 Endigiden bılay, sende tarlı a'sbap shertiwshilerdin', qosıqshılardın', sırnay ha'm ka'rnay shertiwshilerdin' dawısları hesh qashan esitilmeydi. Sende qaytıp hesh bir o'nerdin' ustası tabılmaydı, digirmannın' dawısı hesh qashan esitilmeydi.
23 Sende bunnan bılay shıra jaqtısı bolmaydı. Kelin-ku'yew sesleri hesh qashan esitilmeydi. O'ytkeni sawdagerlerin' du'nyada ataqlı adamlar bolıp, pu'tkil milletler senin' sıyqırshılıg'ın' menen azg'ırılg'an edi.
24 Ja'ne de, payg'ambarlardın', muxaddeslerdin' ha'm jer ju'zinde o'ltirilgenlerdin' ha'mmesinin' qanı sennen tabılg'an edi».
