Ayan 2 bob
1 – Efes ja'ma'a'tinin' jetekshisine jaz. On' qolına jeti juldız uslag'an, jeti altın shıra qoyg'ıshtın' ortasında ju'retug'ın bılay deydi:
2 «Senin' islerin'di, awır miynetin'di ha'm sabırlılıg'ın'dı bilemen. Jaman adamlardın' jamanlıq islewine jol qoymaytug'ının'dı da bilemen. Elshi emes bolıp turıp, o'zlerin elshi dep atag'anlardı sınadın' ha'm olardın' o'tirikshi ekenin bilip aldın'.
3 Awa, sen sabırlısan'. Menin' atım ushın qıyınshılıqlarg'a shıdam berdin' ha'm sharshamadın'.
4 Biraq, sag'an bir qarsılıg'ım bar: sen birinshi isengen waqtın'dag'ı su'yispenshiligin'di joyttın'.
5 Solay etip, ne na'rsede aljasqanın'dı esin'e tu'sir! Ta'wbe qılıp, da'slepki islerin'di dawam et. Eger ta'wbe qılmasan', sag'an kelip, shıra qoyg'ıshın'dı ornınan alıp taslayman.
6 Degen menen, sende bir unamlı qa'siyet bar: sen Nikolas uyımının' islerin jek ko'resen'. Olardı Men de jek ko'remen.
7 Qulag'ı bar Muxaddes Ruwxtın' ja'ma'a'tlerge aytıp atırg'an so'zlerin esitsin. Jen'ip shıqqang'a Qudaydın' ja'nnetindegi o'mir tereginin' miywesin jew huqıqın beremen».
8 – Smirna ja'ma'a'tinin' jetekshisine jaz. O'lip, o'limnen qayta tirilgen, birinshi ha'm son'g'ı bolg'an bılay deydi:
9 «Senin' qayg'ı-ha'siretin'di ha'm ka'mbag'allıg'ın'dı bilemen. Biraq, sen baysan'. O'zlerin yahudiylermiz deytug'ınlardın' seni masqaralap aytqan so'zlerin de bilemen. Biraq olar yahudiy emes, al shaytan jıyını.
10 Basın'a tu'setug'ın qıyınshılıqlardan qorqpa! Mine, shaytan sizlerdi sınaw ushın aran'ızdag'ı bazıların'ızdı qamaqqa taslaydı. On ku'n azap shegesizler. O'liwge tuwra kelse de, Mag'an sadıq qal, sonda Men sag'an o'mir tajın beremen.
11 Qulag'ı bar Muxaddes Ruwxtın' ja'ma'a'tlerge aytıp atırg'an so'zlerin esitsin. Jen'ip shıqqan ekinshi o'limnen hesh qanday za'lel ko'rmeydi».
12 – Pergam ja'ma'a'tinin' jetekshisine jaz. Eki ju'zli o'tkir qılıshqa iye bolg'an bılay deydi:
13 «Shaytannın' taxtı turg'an jerde jasaytug'ının'dı bilemen. Atıma sadıq ekenin'di de bilemen. Ha'tte, sadıq gu'wam Antipa aran'ızda, shaytan otırg'an jerde o'ltirilgen ku'nlerde de sen Mag'an degen isenimin'nen qaytpadın'.
14 Biraq, sag'an biraz qarsılıg'ım bar: aran'ızda Bilam ta'liymatın tutıwshılar bar. Butqa soyılg'an qurbanlıq go'shin jewge ha'm buzıqshılıq qılıwg'a u'yretiw ushın, Bilam Balakqa İzrail xalqın joldan urıwdı u'gitlegen edi.
15 Sol sıyaqlı, sizlerdin' aran'ızda Nikolas uyımının' ta'liymatın tutıwshılar da bar.
16 Bul ushın ta'wbe qıl! Bolmasa, tez janın'a kelip, olarg'a qarsı awzımdag'ı qılısh penen urısaman.
17 Qulag'ı bar Muxaddes Ruwxtın' ja'ma'a'tlerge aytıp atırg'an so'zlerin esitsin. Jen'ip shıqqang'a sırlı manna ha'm bir aq tas ta beremen. Bul tastın' u'stine jan'a at jazılg'an. Attı tastı alg'an adamnan basqa hesh kim bilmeydi».
18 – Tiatira ja'ma'a'tinin' jetekshisinе jaz. Ko'zleri lawlap jang'an otqa, ayaqları jıltırag'an qolag'a uqsag'an Qudaydın' Ulı bılay deydi:
19 «Senin' islerin'di, su'yispenshiligin'di, isenimin'di, xızmetin'di ha'm sabırlılıg'ın'dı bilemen. Son'g'ı islerin'nin' birinshi isengen waqtın'dag'ı islerin'nen ko'birek ekenin de bilemen.
20 Degen menen, sag'an bir qarsılıg'ım bar: o'zin payg'ambar dep atag'an İzabel atlı hayalg'a jol qoyıp atırsan'. Bul hayal xızmetshilerimdi joldan urıp, buzıqshılıq islewge ha'm butlarg'a soyılg'an qurbanlıq go'shin jewge u'yretpekte.
21 Ta'wbe etiwi ushın og'an ma'wlet bergen edim. Biraq ol buzıqshılıg'ı ushın ta'wbe etiwdi qa'lemeydi.
22 Mine, Men onı kesellik to'segine qulataman. Onın' menen buzıqshılıq isleytug'ınlardı da onın' menen birgelikte islegen jaman isleri ushın ta'wbe etpese, u'lken qayg'ı-ha'siretke duwshar etemen.
23 Onın' izine ergenlerdi de o'limge duwshar etemen. Sonda pu'tkil ja'ma'a'tler Menin' kewil ha'm ju'reklerdi sınawshı ekenimdi bilip aladı. Ha'r birin'izge islerin'izge qaray qaytaraman.
24 Biraq, Tiatiradag'ı basqalarg'a, yag'nıy sol hayaldın' ta'liymatın tutpay, „shaytannın' ta'liymatının' teren' sırların“ u'yrenbegen sizlerge aytatug'ınım mınaw: „
25 „Men kelemen degenshe, o'zlerin'izde bar bolg'anlarg'a bekkem bolın'lar“. Sizlerge bunnan basqa awırmanlıq salmayman.
26 Jen'ip shıg'ıp, Menin' buyırg'anlarımdı aqırına deyin orınlag'ang'a milletler u'stinen biylik beremen.
27 7 „Ol olardı temir tayaq penen basqarıp, Ilay ıdıs sıyaqlı sındırıp taslaydı“ *. A'kemnen Men alg'an usınday biylikti ol da aladı.
28 Jen'ip shıqqang'a tan' juldızın da beremen.
29 Qulag'ı bar Muxaddes Ruwxtın' ja'ma'a'tlerge aytıp atırg'an so'zlerin esitsin».
