Ayan 6 bob
1 Son'ınan men Qozının' bekitilgen jeti mo'rdin' birinshisin buzıp ashqanın ko'rdim. Sonda to'rt maqluqtın' birinin' gu'ldirmamanın' gu'rkiregenine uqsag'an dawıs penen: «Kel» degenin esittim.
2 Men qarap, bir aq attı ko'rdim. Attın' u'stindeginin' oq jayı bar edi. Og'an bir taj berildi. Ol jen'impaz bolıp, ja'ne jen'iske erisiwge atlandı.
3 Qozı bekitilgen ekinshi mo'rdi buzıp ashqanda, ekinshi maqluqtın': «Kel» degenin esittim.
4 Sonda ottay qızıl bir at shıqtı. Atqa mingenge adamlardın' bir-birin o'ltiriwi ushın, du'nya ju'zindegi paraxatshılıqtı joq qılıw biyligi berildi. Og'an u'lken bir qılısh ta berildi.
5 Qozı bekitilgen u'shinshi mo'rdi buzıp ashqanda, u'shinshi maqluqtın': «Kel» degenin esittim. Men qarap, bir qara attı ko'rdim. Atqa mingennin' qolında pa'lle ta'rezi bar edi.
6 To'rt maqluqtın' ortasınan shıqqan bir dawıstın': «Bir ku'nlik is haqıg'a bir qadaq biyday yamasa u'sh qadaq arpa beriledi. Biraq, za'ytu'n mayına ha'm sharapqa zıyan tiygizbe!» – degenin esittim.
7 Qozı bekitilgen to'rtinshi mo'rdi buzıp ashqanda, to'rtinshi maqluqtın': «Kel!» degenin esittim.
8 Men qarap, aqshıl sur attı ko'rdim. Atqa mingennin' atı o'lim bolıp, onın' izinen birew erip kiyatır edi. Bul – o'liler ma'kanı edi. Olarg'a qılısh, ashlıq, juqpalı awırıwlar ha'm jerdegi jırtqısh haywanlar menen adamlardı o'ltiriw ushın, du'nyanın' to'rtten bir bo'leginin' u'stinen biylik berildi.
9 Qozı bekitilgen besinshi mo'rdi buzıp ashqanda, qurbanlıq shalınatug'ın orınnın' astında Qudaydın' so'zi ha'm o'zleri aytqan gu'walıqları ushın o'ltirilgenlerdin' janların ko'rdim.
10 Olar ba'lent dawıs penen baqırıp bılay dedi: «Muxaddes ha'm haqıyqıy İyemiz! Sen endi qashan jer ju'zinde jasaytug'ınlardı hu'kim etip, olardan to'gilgen qanımız ushın o'sh alasan'?»
11 Sonda olardın' ha'r birine aq kiyim berilip: «Sizler sıyaqlı o'ltiriletug'ın o'zlerin'izdey xızmetshilerdin' ha'm tuwısqanların'ızdın' sanı tolıq bolg'ang'a shekem az-maz ku'tip turın'lar», – delindi.
12 Qozı bekitilgen altınshı mo'rdi buzıp ashqanda qarasam, jer ku'shli silkinip, quyash qara ju'nnen toqılg'an qaptay, al ay tolıg'ı menen qan sıyaqlı qıp-qızıl bolıp ketti.
13 Al aspandag'ı juldızlar ku'shli samal sebepli shayqalg'an a'njir ag'ashınan to'gilgen pispegen miyweler sıyaqlı jerge tu'sti.
14 Aspan bolsa, oralg'an qag'az sıyaqlı joq bolıp ketti. Ha'r bir taw ha'm ataw ornınan ko'shirildi.
15 Sonda du'nyanın' patshaları, ha'meldarları, a'skerbasıları, bayları, ku'shlileri, barlıq qul ha'm azat adamları u'n'girler menen tawdag'ı jartaslar arasına jasırındı.
16 Olar tawlar ha'm jartaslarg'a jalınıp: «U'stimizge qulap, taxtın' u'stinde Otırg'annan ha'm Qozının' g'a'zebinen bizlerdi jasıra go'rin'!
17 Sebebi olardın' qa'ha'rli g'a'zebinin' ku'ni keldi, bug'an kim shıday aladı», – dedi.
