1 Besinshi perishte ka'rnayın shertti. Sonda men aspannan jerge tu'sken bir juldızdı ko'rdim. Og'an teren' tun'g'ıyıqtın' awzın ashatug'ın gilt berildi.
2 Juldız teren' tun'g'ıyıqtın' awzın ashqanda, tun'g'ıyıqtan u'lken peshtin' tu'tinindey tu'tin shıqtı. Bul tu'tinnen quyash ha'm hawa qaran'g'ılanıp ketti.
3 Tu'tinnin' ishinen jerge shegirtkeler jawdı. Olarg'a jerdegi shayanlardın' ku'shine uqsag'an bir ku'sh berilgen edi.
4 Shegirtkelerge jerdegi ko'k sho'plerge, o'simliklerge ha'm tereklerge zıyan keltirmew, tek man'laylarında Qudaydın' mo'ri joq adamlarg'a g'ana azap beriw buyırıldı.
5 Olarg'a bul adamlardı o'ltirmey, tek bes ay dawamında azap beriwge ruxsat etildi. Olar bergen azap adamdı shayan shaqqanday qıynaydı.
6 Sol ku'nleri adamlar o'lim izleydi, biraq taba almaydı. O'liwdi an'saydı, biraq o'lim olardan qashıp ketedi.
7 Shegirtkelerdin' ko'rinisi sawashqa tayarlang'an atlar sıyaqlı bolıp, baslarında altın tajlarg'a uqsag'an tajları bar edi. Ju'zleri bolsa, adamnın' ju'zine uqsag'an edi.
8 Shashları hayaldın' shashınday, tisleri arıslannın' tisindey edi.
9 Ko'kireklerinde temir sawıtlarg'a uqsag'an sawıtlar bolıp, qanatlarının' sesti sawashqa shawıp baratırg'an sansız atlı arbalardın' sesti sıyaqlı edi.
10 Shegirtkelerdin' shayandikindey quyrıqları ha'm iyneleri bar edi. Quyrıqları adamlarg'a bes ay boyı azap beretug'ın ku'shke iye edi.
11 Olardın' u'stinen teren' tun'g'ıyıqtın' perishtesi patshalıq etetug'ın edi. Bul perishtenin' evreyshe atı Abbadon, al grekshe atı Apollion edi.
12 Birinshi ha'siret o'tti, mine, bunnan son' ja'ne eki ha'siret kelmekte.
13 Altınshı perishte ka'rnayın shertti. Sonda men Qudaydın' aldındag'ı altınnan islengen qurbanlıq shalınatug'ın orınnın' to'rt mu'yeshindegi shaqlardan shıqqan bir dawıstı esittim.
14 Dawıs qolında ka'rnayı bar altınshı perishtege: «Ullı Evfrat da'ryasının' janında baylawlı turg'an to'rt perishteni bosatıp jiber», – dedi.
15 Sonda anıq sol saat, sol ku'n, sol ay ha'm sol jıl ushın tayar turg'an to'rt perishte adamlardın' u'shten birin o'ltiriw ushın bosatılıp jiberildi.
16 Olardın' atlı a'skerlerinin' sanı eki ju'z million ekenligin esittim.
17 Ayanımda ko'rgen atlar menen atlılardın' ko'rinisi mınaday: atlılardın' ottay qızıl, qara ko'kshil ha'm ku'kirt ren'li sawıtları bar edi. Atlardın' basları arıslannın' basına uqsag'an bolıp, awızlarınan ot, tu'tin ha'm ku'kirt shıg'ıp turg'an edi.
18 Adamzattın' u'shten biri usı u'sh ba'leden: bulardın' awzınan shıqqan ot, tu'tin ha'm ku'kirtten o'ldi.
19 O'ytkeni atlardın' ku'shi awızlarında ha'm quyrıqlarında edi. Quyrıqları bası bar jılanlar sıyaqlı bolıp, adamlardı olar menen azaplaytug'ın edi.
20 Usı ba'lelerden o'lmey qalg'an adamlar o'z qolları menen islegen jaman isleri ushın ta'wbe etpedi. Olar ya ko're, ya esite, ya ju're almaytug'ın altın, gu'mis, qola, tas ha'm ag'ashtan islengen butlarg'a ha'm jinlerge tabınıwdan waz keshpedi.
21 Ja'ne de adam o'ltiriw, sıyqırshılıq islew, jınısıy buzıqshılıq qılıw ha'm urlıq islewdi qoyıp, ta'wbe etpedi.
