Biyler 21 bob
1 İzraillılar Mispada: «Hesh birimiz benyaminlilerge qız bermeymiz», – dep ant ishken edi.
2 Xalıq Beyt-Elge keldi ha'm sol jerde Jaratqan İyenin' aldında keshke deyin otırıp, dad salıp, zar jılastı.
3 Olar: «İzraildın' Qudayı Jaratqan İye! Nege İzrailda bulay boldı? Ne ushın İzraildın' bir urıwı joq bolıp ketti?» – dedi.
4 Kelesi ku'ni xalıq azanda erte turdı da, qurbanlıq orın islep, jandırılatug'ın qurbanlıqlar ha'm tatıwlıq qurbanlıqların usındı.
5 Sonda izraillılar: «Jaratqan İyenin' aldındag'ı jıyınımızg'a İzrail urıwlarınan qaysı urıw kelmey qaldı?» – dep soradı. Sebebi olar Mispag'a, Jaratqan İyenin' aldındag'ı jıyıng'a kelmegenlerdin' so'zsiz o'ltiriletug'ının aytıp, qatan' ant ishken edi.
6 İzraillılar benyaminli tuwısqanları ushın qayg'ırısıp, bılay dedi: «İzrail bu'gin bir urıwınan ayırıldı.
7 Aman qalg'an benyaminlilerge hayal bolatug'ın qızlardı qayaqtan tabamız? Sebebi bizler qızlarımızdı olarg'a hayallıqqa bermeymiz dep, Jaratqan İyenin' aldında ant ishken edik».
8 Son'ınan olar: «Mispag'a, Jaratqan İyenin' aldına İzrail urıwlarınan kim kelmedi?» – dep soradı. Solay etip, ordadag'ı jıyıng'a Yabesh-Giladtan hesh kimnin' kelmegeni ma'lim boldı.
9 O'ytkeni kelgenler ko'zden o'tkerilgende, Yabesh-Giladtan hesh kim joq edi.
10 Sonlıqtan jıynalg'anlar Yabesh-Giladqa on eki mın' ma'rt a'skerdi jiberip, olarg'a bılay dedi: «Barın'lar, Yabesh-Gilad xalqın, sonday-aq hayal ha'm balaların da qılıshtan o'tkerin'ler.
11 Orınlaytug'ın isin'iz mınadan ibarat: ha'r bir erkekti ha'm erkek qolı tiygen ha'r bir hayaldı o'ltirin'ler».
12 Olar Yabesh-Gilad xalqı arasınan erkek qolı tiymegen to'rt ju'z qız tawıp, olardı Kenaan jerindegi Shilodag'ı ordag'a alıp keldi.
13 Son'ınan barlıq jıynalg'anlar Rimmon u'n'girindegi benyaminlilerge adam jiberip, tınıshlıq ja'riyaladı.
14 Sonda benyaminliler qaytıp keldi. Jıynalg'anlar Yabesh-Gilad xalqınan tiri qaldırılg'an qızlardı olarg'a hayallıqqa berdi. Biraq qızlardın' sanı olardın' ha'mmesi ushın jetkiliksiz bolıp shıqtı.
15 İzrail xalqı benyaminlilerdin' jag'dayına qayg'ırdı. O'ytkeni Jaratqan İye İzrail urıwlarının' birligin buzg'an edi.
16 Jıyındag'ı aqsaqallar: «Benyaminlilerdin' barlıq hayalları o'ltirilgenlikten, qalg'an erkeklerdi u'ylendiriw ma'selesin qalay sheshemiz?» – dedi.
17 Aqsaqallar dawam etip: «İzraildan bir urıw joq bolıp ketpewi ushın, tiri qalg'an benyaminlilerdin' miyrasxorları bolıwı kerek.
18 Bizler olarg'a qızlarımızdı hayallıqqa bere almaymız. Sebebi: „Benyaminlilerge qız bergen ha'r bir izraillı na'letlensin“, – dep ant ishken edik», – dedi.
19 Son'ınan olar: «Minekey, Shiloda ha'r jılı Jaratqan İyege arnap bayram o'tkiziledi», – dedi. Shilo Beyt-Eldin' arqa ta'repinde, Beyt-Elden Shexemge ketetug'ın joldın' shıg'ısında, Lebonanın' qublasında jaylasqan edi.
20 Solay etip, olar benyaminlilerge bılay dep u'yretti: «Barıp, ju'zim bag'ı ishinde jasırınıp turın'lar.
21 Dıqqat penen qarap turın'lar. Shilonın' qızları oyıng'a shıqqanda, da'rhal ju'zim bag'ınan shıg'ıp, ha'r birin'iz bir qızdan uslap alın'lar da, Benyamin jerine alıp qashın'lar.
22 Qızlardın' a'keleri yamasa a'jag'aları bizlerge shag'ım jasap kelse, bizler olarg'a: „Benyaminlilerdi bizler ushın keshirin'ler. O'ytkeni tutqıng'a alg'an qızlarımız ha'mmesine jetpedi. Al sizler qızların'ızdı o'z qa'lewin'iz benen bermegenin'iz ushın, ayıplı sanalmaysızlar“, – dep aytamız».
23 Benyaminli jigitler usılay isledi. Qızlar oyıng'a tu'skende, ha'r bir jigit bir qızdan alıp qashtı. Olar o'zlerinin' jerlerine qaytıp barıp, qalalar saldı ha'm sol jerde jasay basladı.
24 Son'ınan İzrail xalqı sol jerden tarqap, ha'r biri o'z urıwına, tiyresine ha'm u'lesine tiygen jerlerine qayttı.
25 Ol da'wirde İzrailda patsha joq bolıp, ha'r kim o'zine durıs bolıp ko'ringen isti isleytug'ın edi.
