Biyler 3 bob
1 Kenaandag'ı urıslardın' hesh birine qatnaspag'an barlıq izraillılardı sınaw ushın ha'm hesh sawash ta'jiriybesi bolmag'an jan'a a'wladlardın' sawash ta'limin u'yreniwi ushın,
2 Jaratqan İye qaldırg'an milletler mınalar edi:
3 filist xalqının' bes hu'kimdarı, barlıq kenaanlılar, sidonlılar ha'm Baal-Xermon tawınan Lebo-Xamatqa deyin sozılg'an Lebanon tawlarında jasaytug'ın xiwler.
4 Jaratqan İye İzrail xalqın sınaw ushın ha'm Muwsa arqalı ata-babalarına bergen buyrıqların olardın' orınlaytug'ının yamasa orınlamaytug'ının ko'riw ushın, bul milletlerdi olardın' elinde qaldırg'an edi.
5 Solay etip, izraillılar kenaan, xett, amor, periz, xiw ha'm ebus xalıqlarının' arasında jasadı.
6 Olar menen qız alısıp, qız beristi ha'm olardın' qudaylarına tabındı.
7 İzrail xalqı Jaratqan İyenin' na'zerinde jaman bolg'an islerdi isledi. Olar Qudayı Jaratqan İyeni umıtıp, Baal ha'm Ashera butlarına tabındı.
8 Sonlıqtan Jaratqan İyenin' İzrailg'a qa'ha'ri kelip, olardı Aram-Naharayım patshası Kushan-Rishatayımg'a ta'slim qıldı. Olar segiz jıl KushanRishatayımnın' qol astında boldı.
9 Biraq izraillılar Jaratqan İyege nala etkende, Jaratqan İye olarg'a bir qutqarıwshı jiberdi. Olardı qutqarg'an Kalebtin' kishkene inisi Kenazdın' ulı Otniel edi.
10 Jaratqan İyenin' Ruwxı Otnieldin' u'stine tu'sip, ol İzraildı basqardı. Otniel urısqa shıqqanda, Jaratqan İye Aram patshası Kushan-Rishatayımdı og'an ta'slim qıldı ha'm Otniel Kushan-Rishatayımnan u'stin keldi.
11 Solay etip, el Kenaz ulı Otnieldin' o'limine deyin qırıq jıl tınıshlıqta jasadı.
12 Sonnan keyin, izraillılar Jaratqan İyenin' na'zerinde jawız bolg'an islerdi ja'ne isley basladı. Sonın' ushın Jaratqan İye Moab patshası Eglondı izraillılarg'a qarsı turatug'ınday etip ku'shke toltırdı.
13 Patsha Eglon ammon ha'm amalek xalıqların o'zine biriktirip alıp, İzrailg'a hu'jim jasadı. Olar İzraildı jen'iliske ushıratıp, Palma qalasın basıp aldı.
14 Solay etip, izraillılar on segiz jıl Moab patshası Eglonnın' qol astında qaldı.
15 Biraq izraillılar Jaratqan İyege nala etkende, Jaratqan İye olar ushın Ehud atlı bir qutqarıwshını jiberdi. Benyamin urıwınan bolg'an Geranın' ulı Ehud solaqay edi. Bir ku'ni izraillılar Ehud arqalı Moab patshası Eglong'a salıqların jiberdi.
16 Ehud o'zine uzınlıg'ı eki qarıs keletug'ın, eki ju'zi bar bir qanjar islep aldı ha'm qanjardı kiyiminin' astına, on' sanına baylap qoydı.
17 Ehud salıqtı Moab patshası Eglong'a aparıp berdi. Eglon ju'da' semiz adam edi.
18 Ehud salıqtı bergennen son', salıqtı ko'terip aparg'an adamlardı qaytarıp jiberdi.
19 Al o'zi bolsa, Gilgaldın' qasındag'ı tas butlardın' janınan keynine qaytıp keldi de, patshag'a: – Taqsır, menin' sizge aytatug'ın bir sırım bar, – dedi. Patsha og'an: – U'ndeme, – dedi de, qasındag'ı adamlardın' ha'mmesin sırtqa shıg'arıp jiberdi.
20 Ehud joqarıdag'ı salqın bo'lmesinde jalg'ız qalg'an patshag'a jaqınlap, og'an: – Sizge Qudaydan bir xabar alıp keldim, – degende, patsha taxtınan turdı.
21 Ehud shep qolı menen on' sanındag'ı qanjardı aldı da, patshanın' qarnına tıqtı.
22 Qanjar patshanın' qarnına sabı menen qosıla kirip ketti. Ehud qanjardı suwırıp almag'anlıqtan, qanjar patshanın' maylı qarnında qalıp qoydı.
23 Ehud aywang'a shıqtı da, joqarıdag'ı bo'lmenin' qapıların jawıp, qulıplap ketti.
24 Ol shıg'ıp ketkennen keyin, patshanın' xızmetshileri kelip, joqarıdag'ı bo'lmenin' qapısının' ilik turg'anın ko'rdi de, bir-birine: «Patshamız salqın bo'lmede da'ret sındırıp atırg'an shıg'ar», – desti.
25 Olar ko'p waqıt ku'tse de, patsha bo'lmenin' qapısın ashpadı. Sonlıqtan olar giltti alıp, qapını ashıp qarasa, mırzasının' o'ligi jerde jatır eken.
26 Olar patshanı ku'tip turg'anda, Ehud tas butlardın' janınan o'tip, Seirag'a qashıp ketti.
27 Ehud sol jerge jetip bardı da, Efrayımnın' tawlı u'lkesine shıg'ıp, ka'rnay shertti. İzraillılar onın' menen birge tawlardan to'menge tu'sti. Ehud olardın' aldında jol baslap ju'rdi.
28 Ehud olarg'a: – İzimnen ju'rin'ler, sebebi Jaratqan İye dushpanın'ız bolg'an moablılardı sizlerge ta'slim etti, – dedi. Ehudtın' izinen kiyatırg'an izraillılar Moabqa o'tetug'ın İordan o'tkellerin iyelep, hesh kimdi o'tkermedi.
29 Olar moablılardın' on mın'g'a shamalas qarıwlı ha'm ku'shli adamın o'ltirdi. Moablılardın' hesh biri aman qalmadı.
30 Sol ku'ni moablılar izraillılardın' qol astına o'tti. El seksen jıl paraxatshılıqta jasadı.
31 Ehudtan son', Anat ulı Shamgar biy boldı. Shamgar filistlerdin' altı ju'z adamın o'giz aydaytug'ın tayaq penen o'ltirip, ol da izraillılardı qutqardı.
