Biyler 8 bob
1 Efrayım urıwının' adamları Gideong'a: – Midyanlılar menen urısıwg'a ketkenin'de, bizlerdi shaqırmadın'. Bizlerge ne ushın bunday qıldın'? – dep onı qattı ayıpladı.
2 Gideon olarg'a bılay dep juwap berdi: – Sizlerdin' islegen isin'izdin' qasında meniki ne bolıptı? Efrayımnın' teriminen qalg'an ju'zimler Abiezerdin' pu'tkil ju'zim o'nimlerinen jaqsıraq emes pe?
3 Quday Midyan basshıları bolg'an Oreb ha'm Zeebti sizlerge ta'slim qıldı. Sizlerge ten' keletug'ınday, men ne isley aldım? Gideonnın' bul so'zleri olardın' g'a'zebin qaytardı.
4 Gideon ha'm onın' janındag'ı u'sh ju'z adam İordan da'ryasına kelip, da'ryanı kesip o'tti. Olar sharshasa da, midyanlılardı quwıwdı dawam etti.
5 Ol Sukkotqa kelgende, qala xalqına: – Menin' izimnen kiyatırg'an adamlarıma nan berin'ler, olar haldan tayg'an. Men Midyan patshaları Zebax ha'm Salmunnanın' izinen quwıp baratırman, – dedi.
6 Sukkot basshıları og'an: – Senin' a'skerlerin'e nan bergendey, sen Zebax ha'm Salmunnanı tutqıng'a alıp pa edin'? – dedi.
7 Gideon olarg'a: – Boladı, usı so'zin'iz ushın, Jaratqan İye Zebax penen Salmunnanı mag'an ta'slim etkende, men denelerin'izdi sho'l tikenleri ha'm shen'gelleri menen tilkim-tilkim qılaman, – dedi.
8 Gideon ol jerden Penu-Elge ketti ha'm onın' xalqınan da tap solay dep iltimas qıldı. Biraq Penu-El xalqı da Sukkot xalqının' bergen juwabın berdi.
9 Gideon olarg'a: – Saw-salamat izime qaytqanımda, bul minaranı qulataman, – dedi.
10 Sol waqıtta Zebax penen Salmunna on bes mın'g'a shamalas aman qalg'an shıg'ıs xalıqlarının' a'skerleri menen birlikte Qarqorda edi. Qurallang'an bir ju'z jigirma mın' a'sker o'lgen edi.
11 Gideon Nobax ha'm İogbohanın' shıg'ıs ta'repindegi ka'rwan jolı menen barıp, an'sız turg'an dushpan ordasına hu'jim jasadı.
12 Zebax penen Salmunna qashıp ketti, al Gideon olardın' izinen quwdı. Ol Midyannın' eki patshası bolg'an usı Zebax penen Salmunnanı qolg'a alıp, olardın' barlıq a'skerlerin albıratıp tasladı.
13 İoash ulı Gideon urıstan Xeres to'beshigi boylap qayttı.
14 Jolda Gideon Sukkottın' bir jas jigitin uslap alıp, onı sorawg'a tuttı. Jas jigit og'an Sukkottın' jetpis jeti basshısı menen aqsaqallarının' atların jazıp berdi.
15 Gideon Sukkot xalqına barıp, olarg'a bılay dedi: – Sizler mag'an: «Senin' haldan tayg'an adamların'a nan beretug'ınday, sen Zebax penen Salmunnanı tutqıng'a alıp pa edin'?» – dep meni masqaralag'an edin'iz. Minekey, Zebax penen Salmunna!
16 Son'ınan Gideon qala aqsaqalların toplap, Sukkot xalqın sho'l tikenleri ha'm shen'gelleri menen jazaladı.
17 Keyin Penu-El minarasın qulatıp, qala xalqın o'ltirdi.
18 Son'ınan Gideon Zebax penen Salmunnadan: – Taborda o'ltirgenlerin'iz qanday adamlar edi? – dep soradı. Olar Gideong'a: – Olar sag'an usag'an edi, ha'mmesi patsha ullarına megzes edi, – dep juwap berdi.
19 Gideon olarg'a: – Olar menin' tuwısqanlarım, anamnın' ulları edi. Tiri Jaratqan İye haqı ant ishemen, eger sizler olardı aman qaldırg'anın'ızda, men de sizlerdi o'ltirmes edim, – dedi.
20 Sonnan keyin, Gideon tun'g'ısh ulı Eterge: – Qa'ne, olardı o'ltir, – dedi. Degen menen, ele jas bolg'an Eter qorqıp, qılıshın ko'termedi.
21 Sonda Zebax penen Salmunna Gideong'a: – Bizlerdi o'zin' o'ltir. Erkektin' isin tek erkek isley aladı, – dedi. Solay etip, Gideon barıp, Zebax penen Salmunnanı o'ltirdi ha'm tu'yelerinin' moynındag'ı yarım ay ko'rinisindegi bezeniw buyımların aldı.
22 İzraillılar Gideong'a: – Sen, ulın' ha'm aqlıg'ın' bizlerge basshılıq etin'. Sebebi bizlerdi midyanlılardın' qolınan sen qutqardın', – dedi.
23 Biraq Gideon olarg'a: – Men de, ulım da sizlerge basshılıq qılmaymız. Sizlerge Jaratqan İye basshılıq qıladı, – dep juwap berdi.
24 Son'ınan Gideon dawam etip: – Sizlerden bir tilegim bar: mag'an ha'r birin'iz oljaların'ızdan bir altın sırg'adan berin'ler, – dedi. Dushpanlar ismayıllılar bolg'anlıqtan, altın sırg'a tag'atug'ın edi.
25 İzraillılar: – Jan dep beremiz, – dep, jerge bir jayıw jaydı da, oljalarınan bir sırg'adan jayıwdın' u'stine tasladı.
26 Ay ko'rinisindegi bezeniw buyımların, tu'ymelerdi, Midyan patshalarının' shım qızıl shapanların ha'm tu'yelerdin' moynındag'ı altın shınjırlardı esaplamag'anda, Gideonnın' alg'an altın sırg'alarının' awırlıg'ı bir mın' jeti ju'z shekel shıqtı.
27 Gideon olardan bir efod isletip, onı o'z qalası bolg'an Ofrag'a jaylastırdı. Pu'tkil izraillılar usı efodqa tabınıp, Jaratqan İyege opasızlıq qıldı. Solay etip, bul but Gideon ha'm onın' shan'arag'ı ushın bir duzaq boldı.
28 İzraillılardan jen'ilgen midyanlılar olarg'a bir ma'rte de qarsı ko'terilmedi. El Gideon da'wirinde qırıq jıl paraxatshılıqta jasadı.
29 İoash ulı Erubbaal qaytıp kelip, o'z u'yinde jasawdı dawam etti.
30 Onın' jetpis ulı bar edi, sebebi onın' hayalları ko'p boldı.
31 Gideonnın' Shexemde bir toqalı bar edi. Sol toqalı da bir ul tuwıp berip, onın' atın Abimelex qoydı.
32 İoash ulı Gideon mazmunlı uzaq o'mir su'rip, qaytıs boldı. Ol Abiezer urpaqlarının' Ofra qalasındag'ı a'kesi İoashtın' qa'birine jerlendi.
33 Gideon o'lgennen keyin, izraillılar Jaratqan İyege ja'ne opasızlıq qılıp, Baal mu'sinlerine tabındı. Olar Baal-Beritti o'zlerine quday etip qoydı.
34 O'zlerin a'tirapındag'ı dushpanlarınan qutqarg'an Qudayı Jaratqan İyeni umıttı.
35 Ja'ne de, olar İzrailg'a sonsha jaqsılıqlar qılg'an Erubbaaldın', yag'nıy Gideonnın' shan'arag'ına da jaqsı qatnasta bolmadı.
