1 Patshalar 12 bob

Samueldin' son'g'ı so'zi(1-25).

¹ Bunnan keyin, Samuel İzrail xalqına bılay dedi: – Men aytqanların'ızdın' ha'mmesine qulaq asıp, sizlerge bir patsha tayınlap berdim.

² Endi sizlerdi basqaratug'ın patshan'ız bar. Al men qartaydım, shashlarım da ag'ardı. Ullarım da sizler menen birge. Jaslıg'ımnan baslap, usı ku'nge shekem sizlerge biylik ettim.

³ Mine, men aldın'ızda turıppan. Aytın'lar, qaysı birin'izdin' o'gizin'izdi aldım? Kimnin' eshegin tartıp aldım? Kimdi aldadım? Kimge zulımlıq qıldım? Kimnen para alıp, onın' ayıpların ko'rmeslikke aldım? Jaratqan İyenin' ha'm Onın' maylag'an patshasının' aldında gu'walıq berin'ler. Sizlerden bir na'rse alg'an bolsam, qaytarıp bereyin.

⁴ Xalıq og'an: – Bizlerdi aldamadın', bizlerge zulımlıq ta qılmadın', hesh kimnin' qolınan hesh na'rse almadın', – dedi.

⁵ Samuel olarg'a: – Mennen birde bir nuqsan tappag'anın'ızg'a Jaratqan İye de, Ol maylag'an patsha da gu'wa, – dedi. – Awa, gu'wa, – dedi xalıq.

⁶ Samuel so'zin bılay dep dawam etti: – Muwsa menen Xarondı tayınlap, ata-babaların'ızdı Mısır elinen alıp shıqqan Jaratqan İye boladı.

⁷ Endi usı jerde turın'lar. Jaratqan İyenin' sizlerdi ha'm ata-babaların'ızdı qutqarıw ushın islegen barlıq jaqsı islerin Onın' aldında sizlerge da'lillep bereyin.

⁸ Yaqıp Mısırg'a ketkennen keyin, atababaların'ız Jaratqan İyege jalbarıng'anda, Ol Muwsa menen Xarondı jiberdi. Olar ata-babaların'ızdı Mısırdan alıp shıg'ıp, usı jerge ornalastırdı.

⁹ Biraq ata-babaların'ız o'zlerinin' Qudayı Jaratqan İyeni umıttı. Sonlıqtan Jaratqan İye olardı Xasor patshasının' sa'rka'rdası Siseranın', filistlerdin' ha'm Moab patshasının' qolına tapsırdı. Olar ata-babaların'ızg'a qarsı urıstı.

¹⁰ Atababaların'ız Jaratqan İyege: «Bizler gu'na isledik. Seni taslap, Baal ha'm Ashtarta butlarına xızmet ettik. Endi bizlerdi dushpanlarımızdın' qolınan qutqar, Sag'an xızmet etemiz», – dep jalbarındı.

¹¹ Sonda Jaratqan İye Erubbaaldı, Bedandı, İftaxtı ha'm Samueldi, yag'nıy meni jiberip, qa'wipsiz jasawın'ız ushın, a'tirapın'ızdı qorshag'an dushpanların'ızdın' qolınan sizlerdi qutqardı.

¹² Biraq sizler Ammon patshası Naxashtın' o'zlerin'izge qarsı atlang'anın ko'rgenin'izde, patshan'ızdın' Qudayın'ız Jaratqan İye ekenine qaramastan: «Yaq, bizlerdi patsha basqarsın», – dedin'le.

¹³ Mine, o'zlerin'iz tan'lap, tilep alg'an patshan'ız! Awa, Jaratqan İye sizlerge patsha berdi.

¹⁴ Eger Jaratqan İyeden qorqıp, Og'an xızmet qılsan'ız, Onın' so'zlerin tın'lap, buyrıqlarına qarsı shıqpasan'ız, sizler de, sizlerdi basqaratug'ın patshan'ız da Qudayın'ız Jaratqan İyege ersen'iz, ha'mmesi jaqsı boladı.

¹⁵ Eger Jaratqan İyenin' so'zine qulaq aspay, Onın' buyrıqlarına qarsı shıqsan'ız, Jaratqan İye ata-babaların'ızdı jazalag'anı sıyaqlı, sizlerdi de jazalaydı.

¹⁶ Endi ornın'ızda turıp, Jaratqan İyenin' ko'z aldın'ızda isleytug'ın ullı isin ko'rin'ler.

¹⁷ Ha'zir biyday orımı waqtı emes pe? Men Jaratqan İyege jalbarınaman ha'm Ol aspandı gu'rkiretip, jawın jawdıradı. Sonda sizler patsha qoyıwdı sorap, Jaratqan İyenin' na'zerinde qanday jamanlıq islegenin'izdi jaqsı tu'sinip alasız.

¹⁸ Samuel Jaratqan İyege jalbarındı ha'm Jaratqan İye sol ku'ni aspandı gu'rkiretip, jawın jawdırdı. Xalıq Jaratqan İyeden de, Samuelden de qattı qorqtı.

¹⁹ Olar Samuelge: – Nabıt bolmawımız ushın, bizler, yag'nıy o'z qulların' ushın Qudayın' Jaratqan İyege jalbarın. O'ytkeni bizler patsha sorap, o'z gu'nalarımız u'stine gu'na jamadıq, – dedi.

²⁰ Sonda Samuel xalıqqa bılay dedi: – Qorqpan'lar, sizler bul u'lken jamanlıqtı isledin'ler. Biraq endi Jaratqan İyeden ju'z burmay, Og'an erin'ler ha'm shın ju'rekten xızmet etin'ler.

²¹ Hesh kimdi qutqara almaytug'ın jaramsız butlardın' izine ermen'ler. Sebebi olar paydasız.

²² O'zinin' ullı atı ushın Jaratqan İye O'z xalqınan ju'z burmaydı. Sebebi Ol sizlerdi O'z xalqı qılıwdı maqul taptı.

²³ Mag'an kelsek, sizler ushın Jaratqan İyege jalbarınıwdan waz keshiw arqalı, Og'an qarsı gu'na islewden awlaq bolg'ayman! Men sizlerge tek jaqsı ha'm tuwrı joldı ko'rsetemen.

²⁴ Jalg'ız Qudaydan qorqın'lar, Og'an shın ju'rekten sadıqlıq penen xızmet etin'ler. Onın' sizler ushın qanday ullı islerdi islegenin este tutın'lar!

²⁵ Biraq jawızlıq islewdi dawam ete bersen'iz, o'zlerin'iz de, patshan'ız da qırılıp ketesizler.