1 Patshalar 2 bob
1 Xanna bılay dep duwa etti: «Ju'regim Jaratqan İye menen shadlanar, Onın' O'zi mag'an ku'sh berdi. Dushpanlarım aldında tilim uzayıp, Onın' qutqarg'anına quwanaman.
2 Hesh kim joq Jaratqan İyedey muxaddes, Awa, Sen sıyaqlı hesh kim joq, Jaratqan İye! Qorg'awshı jartas da joq Qudayımız sıyaqlı!
3 Artıq menmensip so'ylegendi toqtatın', Awzın'ızdan ta'kabbir so'zler shıqpasın. Sebebi Jaratqan İye ha'mmesin biliwshi Quday-g'o, Ha'r bir isti ta'rezige tartıwshı da Ol.
4 Ku'shlilerdin' oq jayları sınar, Ku'shsizler ku'shke tolar.
5 Toqlar nan ushın jallanıp, Ashlar toyar, Na'silsizler jetewin tuwıp, Ko'p ullı hayallar biyperzent qalar.
6 Jaratqan İye o'ltiredi de, tiriltedi de, O'liler ma'kanına tu'siredi de, shıg'arıp aladı da.
7 Ol kimisin jarlı qılıp, kimisin bayıtar, Kimisin qulatıp, kimisin joqarılatar.
8 Jarlını topıraqtan ko'terip alıp, Biysharanı taslandı arasınan alıp shıg'ar. Otırg'ızıp aqsu'yekler menen, Hu'rmet taxtın berer. O'ytkeni jer tiykarı Jaratqan İye qolında, Sol tiykar u'stine Ol du'nyanı ornatqan.
9 Jaratqan İye sadıq qullarının' adımların qorg'ar, Al jamanlar qaran'g'ılıqta joq bolar, Sebebi o'z ku'shi menen jen'iske erispes insan.
10 Jaratqan İyege qarsı turg'anlar shıl-pa'rshe bolar, Jaratqan İye olarg'a qarsı ko'klerdi gu'rkireter, Pu'tkil du'nyanı Ol hu'kim qılar, O'z patshasın ku'shke toltırıp, Maylag'an adamın dan'qqa eristirer».
11 Son'ınan Elqana Ramag'a, u'yine qaytıp ketti. Al kishkene Samuel bolsa, ruwxaniy Eliydin' qolında Jaratqan İyege xızmet ete basladı.
12 Eliydin' ulları jaramas adamlar edi. Olar Jaratqan İyeni mensinbedi ha'm xalıq aldındag'ı ruwxaniylik wazıypasına hu'rmetsizlik etti.
13 Birew qurbanlıq shalıp, go'sh qaynatıp atırg'anda, ruwxaniylerdin' xızmetshisi qolına u'sh tisli shanıshqını alıp keletug'ın edi.
14 Ol shanıshqını shu'len qazang'a, qazang'a, tabag'a yamasa tabaqqa tıg'ıp, og'an ilingennin' ha'mmesin ruwxaniy ushın alatug'ın edi. Olar Shilog'a kelgen izraillılardın' ha'mmesine usılay isleytug'ın edi.
15 Ha'tte, qurbanlıqtın' mayları tu'tetip jandırıw ushın ajıratıp alınbastan burın ruwxaniydin' xızmetshisi kelip, qurbanlıq shalg'an adamg'a: «Ruwxaniyge quwırıw ushın shiyki go'sh ber. Ol sennen pisken go'sh emes, al shiyki go'sh aladı», – deytug'ın edi.
16 Eger qurbanlıq shalg'an adam: «Da'slep maydı tu'tetip jandırayıq, son'ınan qa'legenin'di alarsan'», – dese, xızmetshi og'an: «Yaq, ha'zir beresen', bolmasa tartıp alaman», – deytug'ın edi.
17 Jaratqan İyenin' na'zerinde jigitlerdin' islegen gu'nası ju'da' awır edi. O'ytkeni olar Jaratqan İyege arnalg'an qurbanlıqlarg'a hu'rmetsizlik etti.
18 Sol arada jas Samuel zıg'ır efod kiyip, Jaratqan İyenin' aldında xızmet etip ju'rdi.
19 Anası ha'r jılı ku'yewi menen birge jıllıq qurbanlıq beriw ushın kelgende, tikken kishkene shapanın ulına a'kelip beretug'ın edi.
20 Sonda Eliy Elqanag'a ha'm onın' hayalına pa'tiyasın berip: «Tilep alıp, Jaratqan İyege arnag'an balan'nın' ornına Jaratqan İye sag'an bul hayaldan basqa balalar bersin», – deytug'ın edi. Son'ınan olar u'yine qaytatug'ın edi.
21 Jaratqan İyenin' miyrimine erisken Xanna ha'miledar bolıp, ja'ne u'sh ul, eki qız tuwdı. Al kishkene Samuel Jaratqan İye aldında o'sip bardı.
22 Eliy ju'da' qartayıp qalg'an edi. Ol ullarının' izraillılarg'a islegen barlıq isleri ha'm Ushırasıw shatırının' aldında xızmet isleytug'ın hayallar menen jatqanı haqqında esitti.
23 3Sonda Eliy ullarına bılay dedi: «Ne ushın bunday islerdi islep atırsızlar? Men sizler islegen jawızlıqlar haqqında ha'mme adamlardan esittim.
24 Bul jaqsı emes, balalarım! Jaratqan İyenin' xalqı arasında tarap ketken bul xabar – jaqsı xabar emes.
25 Eger adam adamg'a qarsı gu'na islese, Quday ayıpker ushın ta'welleshi boladı. Biraq Jaratqan İyege qarsı gu'na islegen adam ushın kim ta'welleshi boladı?» Degen menen, olar a'kesinin' so'zlerine qulaq aspadı. O'ytkeni Jaratqan İye olardı o'ltiriwdi sheship qoyg'an edi.
26 Sol arada o'spirim Samuel o'sip, Jaratqan İyenin' de, xalıqtın' da kewline unap bard.
27 Bir ku'ni Qudaydın' bir adamı Eliyge kelip, bılay dedi: «Jaratqan İye bılay deydi: „Baban' ha'm onın' urpaqları Mısırda faraonnın' xalqına qul bolg'an waqıtta, Men olarg'a O'zimdi ashıp ko'rsetpegen be edim?
28 Qurbanlıq orıng'a barıw ha'm xosh iyisli zatlardı tu'tetip, efod kiyip ju'riw ushın pu'tkil İzrail urıwları arasınan tek senin' baban'dı g'ana O'zime ruwxaniy etip tan'lamadım ba? Ja'ne de, izraillılardın' pu'tkil sıyların da senin' ata-babaların'nın' urpaqlarına bermedim be?
29 Solay eken, Menin' u'yim ushın a'keliwdi buyırg'an qurbanlıq ha'm sadaqalarg'a nege hu'rmetsizlik etesizler? Ne ushın xalqım İzraildın' bergen barlıq qurbanlıqlarının' en' jaqsı jerlerin o'zlerin'iz jep semirip, nege ulların'dı Mennen artıq ko'resen'?“
30 Sonlıqtan İzraildın' Qudayı Jaratqan İye bılay deydi: „Senin' xojalıg'ın' ha'm senin' baban'nın' urpaqları Mag'an ma'n'gige xızmet etedi, – degen edim“. Biraq endi Jaratqan İye bılay deydi: „Endi bulay islewden awlaqpan. Sebebi Meni hu'rmetlegendi Men de hu'rmetleymen, al Meni hu'rmet etpegenler masqara boladı.
31 Mine, senin' ha'm baban'nın' urpag'ının' ku'shin qurtatug'ın ku'nlerim kiyatır. Solay etip, tuqımın'da hesh kim uzaq o'mir su'rmeydi.
32 Menin' İzrailg'a isleytug'ın jaqsılıg'ıma qaramastan, sen Menin' u'yimde qıyınshılıq ko'resen'. Endigiden bılay, tuqımın'da hesh kim uzaq o'mir su'rmeydi.
33 Ko'zlerin'di soqır qılıp, ju'regin'di qayg'ıg'a toltırıw ushın, Menin' qurbanlıq ornımda senin' tuqımın'nan tek bir adamdı qaldıraman. Biraq basqa urpaqların'nın' ha'mmesi jaslay du'nyadan o'tedi.
34 ki ulın' Xofniy menen Pinexastın' bir ku'nde o'liwi senin' ushın bir nıshan boladı.
35 Men O'zime qa'lewlerimdi ha'm maqsetlerimdi orınlaytug'ın sadıq bir ruwxaniy qoyajaqpan. Ol Menin' maylag'an patshamnın' aldında ba'rqulla xızmet etiwi ushın, onın' urpag'ın ma'n'gige usı xızmetke qoyaman.
36 Sonda senin' urıwın'nan aman qalg'an ha'r bir adam bir bo'lek gu'mis yamasa bir tislem nan ushın bas iyip kelip, nan tawıp jewi ushın, o'zin qanday da bir diniy xızmetke qoyıwdı soraydı“».
