1 Patshalar 22 bob
1 Sonnan keyin, Dawıt Gattan shıg'ıp, Adullam u'n'girine jasırındı. Ag'aları ha'm a'kesinin' u'y-ishi bunı esitip, Dawıttın' janına keldi.
2 Qıyın jag'dayda qalg'an, qarızg'a batqan ha'm o'mirden tu'n'ilgen adamlardın' ha'mmesi Dawıttın' janına jıynaldı. Sanı to'rt ju'zge shamalasqan bul adamlarg'a Dawıt jetekshilik qıldı.
3 Dawıt sol jerden Moabtag'ı Mispe qalasına barıp, Moab patshasınan: «Qudaydın' mag'an ne qılajag'ın bilip alg'anımsha, ata-anamnın' sizin' qasın'ızda qalıwına ruxsat berin'», – dep o'tinish etti.
4 Solay etip, Dawıt ata-anasın Moab patshasının' janına alıp keldi. Dawıt bas panalap ju'rgeninde, ata-anası Moab patshasının' janında jasadı.
5 Biraq payg'ambar Gad Dawıtqa: «Bul jerde qalma, Yahuda jerine ket», – dedi. Sonnan keyin, Dawıt sol jerden ketip, Xeret tog'ayına bardı.
6 Sol arada Shaul Dawıt ha'm onın' janındag'ı adamlardın' qay jerde ekenin bildi. Sol waqıtta patsha nayzasın qolına alıp, Gibada tamarisk* tereginin' astında otırg'an edi. A'skerleri de onın' a'tirapın qorshap turg'an edi.
7 Sonda Shaul olarg'a bılay dedi: «Ha'y benyaminliler, meni tın'lan'lar! İshaydın' ulı ha'r birin'izge egislik jerlerdi ha'm ju'zimzarlardı beredi deysiz be? Ha'r birin'izdi mın'bası yamasa ju'zbası etip qoyadı deysiz be?
8 Sol sebepli ha'mmen'iz mag'an qarsı til biriktirdin'iz be? Ulımnın' İshaydın' ulı menen kelisim du'zgenin mag'an hesh kim xabarlamadı. Aran'ızdan mag'an janı ashıytug'ın birde bir adam shıqpadı. Bu'gingidey mag'an duzaq qurıw ushın, ulımnın' qulım Dawıttı qayrag'anın mag'an bildirgen adam da bolmadı».
9 Sol waqıtta Shauldın' a'skerlerinin' janında turg'an edomlı Doeg: «İshaydın' ulı Dawıttın' Nob qalasına Axitubtın' ulı Aximelextin' janına barg'anın ko'rdim.
10 Aximelex Dawıt ushın Jaratqan İyeden soradı. Og'an azıq-awqat ta, filist Goliyattın' qılıshın da berdi», – dedi.
11 Patsha Shaul Axitubtın' ulı ruwxaniy Aximelexti ha'm onın' a'kesinin' a'wladınan bolg'an Nobta jasaytug'ın barlıq ruwxaniylerdi shaqırıp keliw ushın adamların jiberdi. Olardın' ha'mmesi patshag'a keldi.
12 Shaul Aximelexke: – Ha'y Axitub ulı, meni tın'la! – dedi. – La'bba'y, taqsır, – dep juwap berdi Aximelex.
13 Shaul og'an: – Nege sen İshaydın' ulı menen birge mag'an qarsı til biriktirdin'? Sen og'an nan menen qılısh berdin' ha'm onın' ushın Qudaydan soradın'. Dawıt mag'an qarsı qozg'alan' ko'terip, duzaq qurdı. Bul bugin anıq ko'rinip tur, – dedi.
14 Aximelex Shaulg'a bılay dep juwap berdi: – Pu'tkil xızmetshilerin'iz arasında Dawıttay isenimli adam bar ma? Dawıt sizin' ku'yew balan'ız, saqshıların'ızdın' basshısı ha'm xojalıg'ın'ızdag'ı hu'rmetli adamlardın' biri.
15 Meni Dawıt ushın Qudaydan sorawdı sol ku'ni basladı deysiz be? A'lbette, yaq! Taqsır, qulın'ız bolg'an meni ha'm menin' a'kemnin' xojalıg'ın ayıplaman'ız. Sebebi men bul is haqqında hesh na'rse bilmeytug'ın edim.
16 Biraq Shaul og'an: – Ha'y Aximelex, o'zin' de, a'ken'nin' pu'tkil xojalıg'ı da so'zsiz o'lesizler, – dedi.
17 Son'ınan Shaul janında turg'an saqshılarına: «Qa'nekey, Dawıttı qollag'an Jaratqan İyenin' ruwxaniylerin o'ltirin'ler. Olar Dawıttın' qashıp ketkenin bilse de, mag'an xabar bermedi», – dedi. Degen menen, patshanın' xızmetshileri qol ko'terip, Jaratqan İyenin' ruwxaniylerin o'ltirgisi kelmedi.
18 Sonda patsha Doegke: «Sen barıp, ruwxaniylerdi o'ltir», – dep buyırdı. Sol ku'ni edomlı Doeg barıp, zıg'ır efod kiygen seksen bes ruwxaniydi o'ltirdi.
19 Son'ınan ol erkek, hayal, bala yamasa na'reste demesten, ruwxaniyler qalası Nobtın' xalqın qılıshtan o'tkizdi. Ja'ne de, sıyırlardı, esheklerdi ha'm qoylardı da shawıp tasladı.
20 Tek Axitub ulı ruwxaniy Aximelextin' ullarının' biri Abiyatar g'ana qutılıp, Dawıttın' janına qashıp ketti.
21 Abiyatar Shauldın' Jaratqan İyenin' ruwxaniylerin o'ltirgeni tuwralı Dawıtqa aytıp berdi.
22 Dawıt Abiyatarg'a bılay dedi: «Sol ku'ni ol jerde edomlı Doegti ko'rgenimde, onın' Shaulg'a so'zsiz jetkizip baratug'ının bilgen edim. A'ken'nin' xojalıg'ındag'ı ha'r bir jannın' o'limine men sebepshimen.
23 Janımda qal, qorqpa. Seni o'ltirmekshi bolg'anlar meni de o'ltirmekshi. Janımda qalsan', qa'wipsiz bolasan'», – dedi.
