1 Patshalar 28 bob
1 Sol ku'nleri filistler İzrail menen urısıw ushın a'skerlerin topladı. Axish Dawıtqa: – Bilip qoy, sen adamların' menen birge menin' janımda urısasan', – dedi.
2 Dawıt og'an: – Sol waqıtta siz de qulın'ızdın' neler qılatug'ının ko'resiz, – dep juwap berdi. Axish og'an: – Yaqshı, onda men seni bir o'mirge o'zimnin' jeke saqshım etip tayınlayman, – dedi.
3 Samuel o'lgende, pu'tkil İzrail xalqı og'an joqlaw aytıp jılap, onı o'z qalası Ramag'a jerlegen edi. Al Shaul bolsa, a'rwaqlardı ha'm ruwxlardı shaqıratug'ınlardı elden quwıp jibergen edi.
4 Filistler toplanıp, Shunemge keldi ha'm sol jerge orda qurdı. Shaul da pu'tkil izraillılardı toplap, Gilboa tawına orda qurdı.
5 Shaul filist a'skerlerin ko'rgende qorqıp ketip, ju'regin qorqınısh biylep aldı.
6 Ol Jaratqan İyeden sorasa da, Jaratqan İye og'an tu's arqalı da, Urim arqalı da, payg'ambarlar arqalı da juwap bermedi.
7 Sonlıqtan Shaul xızmetshilerine: – Mag'an a'rwaq shaqıratug'ın bir hayaldı tawıp kelin'. Og'an barıp, ma'sla'ha't sorayın, – dep buyırdı. Xızmetshileri og'an: – En-Dorda a'rwaq shaqıratug'ın bir hayal bar, – dedi.
8 Shaul kiyimin almastırıp, sırtqı ko'rinisin o'zgertti de, janına eki adamdı alıp, tu'nde sol hayalg'a keldi. Shaul hayalg'a: – O'tinemen, men ushın a'rwaqlardan sorap, men aytqan adamnın' a'rwag'ın shaqırıp ber, – dedi.
9 Biraq hayal: – Shauldın' neler islegenin, a'rwaqlardı ha'm ruwxlardı shaqıratug'ınlardı elden quwıp jibergenin bilesen'. Solay eken, nege meni o'ltiriw ushın duzaq qoyıp atırsan'? – dedi.
10 Shaul og'an: – Tiri Jaratqan İye haqı ant ishemen, bul isten sag'an hesh qanday zıyan kelmeydi, – dedi.
11 Sonda hayal Shauldan: – Sag'an kimdi shaqırıp bereyin? – dep soradı. Shaul og'an: – Mag'an Samueldi shaqırıp ber, – dedi.
12 Hayal Samueldi ko'rgende, dawısının' barınsha baqırıp jiberip, Shaulg'a: – Siz Shaulsız-g'o, nege meni aldadın'ız? – dedi.
13 Patsha og'an: – Qorqpa, ne ko'rip tursan'? – dedi. Hayal og'an: – Jerdin' astınan shıg'ıp kiyatırg'an bir a'rwaqtı ko'rip turman, – dep juwap berdi.
14 Shaul hayaldan: – Onın' ko'rinisi qanday? – dep soradı. Hayal og'an: – U'stine shapan kiygen bir g'arrı adam joqarıg'a shıg'ıp kiyatır, – dedi. Sonda Shaul onın' Samuel ekenin bildi de, et-betinen jerge jıg'ılıp, ta'jim etti.
15 Samuel Shaulg'a: – Nege meni shaqırıp, tınıshımdı aldın'? – dedi. Shaul og'an: – Men ju'da' qıynalıp atırman. Filistler mag'an qarsı urıspaqta. Quday da meni taslap ketti. Ol mag'an payg'ambarlar arqalı da, tu'slerim arqalı da juwap bermey qoydı. Sonlıqtan ne islewim kerekligin bildiriwin' ushın, seni shaqırtqan edim, – dedi.
16 Samuel og'an bılay dep juwap berdi: – Jaratqan İye seni taslap ketip, sag'an dushpan bolg'an bolsa, endi nege mennen sorap tursan'?
17 Jaratqan İye men arqalı aytqanların ju'zege asırdı. Ol patshalıqtı sennen tartıp alıp, onı janın'dag'ı adamg'a, yag'nıy Dawıtqa berdi.
18 O'ytkeni sen Jaratqan İyenin' buyrıg'ına boysınbadın', Onın' jalınlı g'a'zebin amaleklerge shashpadın'. Sonlıqtan Jaratqan İye bu'gin bul na'rselerdi senin' basın'a saldı.
19 Jaratqan İye seni de, İzrail xalqın da filistlerge ta'slim etedi. Erten' sen ha'm senin' ulların' menin' janımda bolasızlar. Jaratqan İye İzrail ordasın da filistlerge ta'slim etedi.
20 Shaul birden gu'rs etip jerge quladı. Ol Samueldin' so'zlerinen qattı qorqıp ketip, ku'shi de qalmag'an edi. Sebebi ol bir ku'n ha'm bir tu'n boyı duz tatpag'an edi.
21 Hayal Shaulg'a jaqınlap keldi de, onın' qattı qorqıp ketkenin ko'rip bılay dedi: – Minekey, shorın'ız bolg'an men ga'pin'izge qulaq astım. Janımdı qa'terge qoyıp, tilegin'izdi orınladım.
22 Endi o'tinemen, siz de shorın'ız bolg'an menin' so'zlerimdi tın'lan'. Sizge azg'antay awqat alıp keliwge ruxsat berin'. Jolın'ızdı dawam etiwge da'rman bolıw ushın, awqatlanıp alın'ız.
23 Biraq Shaul: – Jemeymen, – dep bas tarttı. Degen menen, xızmetshileri de, hayal da zorlay bergennen keyin, Shaul olardın' aytqanın isledi. Ol jatqan jerinen turıp, to'sekke otırdı.
24 Hayaldın' qorasında bag'ıp otırg'an bir jas baspag'ı bar edi. Hayal onı da'rriw soydı, qamır iylep, ashıtqısız nan pisirdi.
25 Son'ınan olardı Shaul ha'm onın' xızmetshilerinin' aldına qoydı. Olar iship-jep bolıp, sol ku'ni tu'nde ketip qaldı.
