1 Patshalar 4 bob
1 Samueldin' so'zi pu'tkil İzrailg'a jayıldı.Sol ku'nleri izraillılar filistler menen urısıw ushın jolg'a shıqtı. İzraillılar Eben-Ezerge, filistler Afekke ordaların qurdı.
2 2Filistler izraillılarg'a qarsı sawash maydanına tu'sti. Sawash ha'wij alg'anda, filistler izraillılardı jen'iliske ushırattı. Sawashta izraillılardın' to'rt mın'g'a shamalas adamı qaza taptı.
3 A'skerler ordag'a qaytıp kelgende, İzrail aqsaqalları: «Ne ushın bu'gin Jaratqan İye bizlerdin' filistlerden jen'iliwimizge jol qoydı? Jaratqan İyenin' Kelisim sandıg'ın Shilodan usı jerge alıp keleyik. Ol aramızda bolıp, bizlerdi dushpanlarımızdın' qolınan qutqarsın», – dedi.
4 Solay etip, xalıq Shilog'a adamlardı jiberdi. Olar barıp, kerublardın' ortasındag'ı taxtta otırg'an A'lemnin' Jaratqan İyesinin' Kelisim sandıg'ın alıp keldi. Eliydin' eki ulı Xofniy menen Pinexas ta Qudaydın' Kelisim sandıg'ının' janında edi.
5 Jaratqan İyenin' Kelisim sandıg'ı ordag'a a'kelingende, pu'tkil izraillılardın' qattı baqırısqan dawıslarınan jer la'rzege keldi.
6 Filistler baqırıslardı esitip: «Evreyler ordasında nege bunshelli baqırıs bolıp atır eken?» – desti. Olar Jaratqan İyenin' sandıg'ının' ordag'a a'kelingenin bilgende,
7 qorqıp ketip bılay dedi: «Olardın' qudayları ordag'a kelipti. Qurıp qaldıq! Burın hesh qashan bunday na'rse bolıp ko'rmegen edi.
8 Qurıp qaldıq! Bul ku'shli qudaylardın' qolınan bizlerdi kim qutqaradı? Olar sho'lde mısırlılardı tu'rli ba'lelerge ushıratqan qudaylar-g'o.
9 Bekkem bolın'lar, filistler! Ma'rt bolın'lar! Bolmasa, evreylerdin' sizlerge qul bolg'anı sıyaqlı, sizler de olarg'a qul bolasızlar. Ma'rt bolıp, sawashqa tu'sin'ler».
10 Solay etip, filistler sawashqa tu'sip, izraillılardı jen'di. İzraillılardın' ha'r biri o'z shatırına qaray qashtı. Qırg'ıng'a ushırag'anı sonshelli, izraillılar otız mın' piyada a'skerinen ayırıldı.
11 Qudaydın' sandıg'ı qolg'a tu'sti, al Eliydin' eki ulı Xofniy ha'm Pinexas qazalandı.
12 Benyamin urıwınan bir adam sawash maydanınan qashıp shıg'ıp, sol ku'nnin' o'zinde Shilog'a jetip keldi. Ol qayg'ıdan kiyimlerin jırtıp, basına topıraq shashqan edi.
13 Sol adam jetip kelgende, Qudaydın' sandıg'ın oylap, ju'regi ezilgen Eliy jol shetindegi otırg'ıshta jolg'a qarap otırg'an edi. Adam qalag'a kirip, bolg'an waqıyanı aytıp bergende, qaladag'ılardın' ha'mmesi dad salıp baqırıstı.
14 Eliy dad salıp baqırısqandı esitip: «Nege shawqım ko'terilip atır?» – dep soradı. Xabarshı bolg'an waqıyanı aytıp beriw ushın da'rriw Eliydin' janına keldi.
15 Sonda Eliy toqsan segiz jasta bolıp, ko'zleri a'zzilep, ko'rmey qalg'an edi.
16 Xabarshı Eliyge: – Men sawash maydanınan kiyatırman. Ha'zir g'ana sol jerden qashıp shıqtım, – dedi. Eliy onnan: – Balam, ne boldı? – dep soradı.
17 Xabarshı Eliyge: – İzraillılar filistlerdin' aldına tu'sip qashtı. A'skerler u'lken qırg'ıng'a ushıradı. Eki ulın'ız Xofniy menen Pinexas qazalandı, al Qudaydın' sandıg'ı qolg'a tu'sti, – dedi.
18 Xabarshı Qudaydın' sandıg'ı tuwralı aytqanda, Eliy otırg'ıshtan shalqasına tu'sip, qala da'rwazasının' qasına quladı. Ol ju'da' g'arrı ha'm semiz bolg'anlıqtan julını u'zilip, jan tapsırdı. Eliy İzrailg'a qırıq jıl biylik etken edi.
19 Sol waqıtta Eliydin' kelini, Pinexastın' hayalı ju'kli bolıp, tuwatug'ın waqtı shamalasqan edi. Hayal Qudaydın' sandıg'ının' qolg'a tu'skeni, qa'yin atası ha'm ku'yewinin' o'lgeni haqqında esitkende, birden tolg'ag'ı tuttı da, dizerlep otırıp bosandı.
20 Ja'rdem bergen hayallar og'an o'limi aldınan: «Qorqpa, ullı boldın'», – dedi. Biraq ol juwap ta bermedi, dıqqat ta awdarmadı.
21 Qudaydın' sandıg'ının' qolg'a tu'sip, qa'yin atası ha'm ku'yewinin' o'lgenligi sebepli hayal: «Ullılıq İzraildı ta'rk etti», – dep ulına İxabod dep at qoydı.
22 Ol: «Ullılıq İzraildı ta'rk etti. Sebebi Qudaydın' sandıg'ı qolg'a tu'sti», – dedi.
