1 Patshalar 5 bob

Kelisim sandıg'ı filistler qolında(1-12).

¹ Filistler Qudaydın' sandıg'ın qolg'a kirgizgennen son', onı EbenEzerdegi sawash maydanınan Ashdodqa alıp keldi.

² Olar Qudaydın' sandıg'ın Dagonnın'* butxanasına aparıp, onı Dagonnın' mu'sininin' janına qoydı.

³ Erten'ine azanda erte turg'an ashdodlılar Dagonnın' Jaratqan İyenin' sandıg'ının' aldında et-betinen jıg'ılıp jatırg'anın ko'rdi. Olar Dagondı aldı da, onı o'z ornına qoydı.

⁴ Biraq olar erten'ine azanda turg'anda, Dagonnın' ja'ne Jaratqan İyenin' sandıg'ının' aldında et-betinen jıg'ılıp jatırg'anın ko'rdi. Bul rette onın' bası ha'm eki qolı julınıp, bosag'ada jatırg'an edi. Onın' tek gewdesi g'ana pu'tin qalg'an edi.

⁵ Sonlıqtan Dagonnın' ruwxaniyleri de, Ashdodtag'ı Dagonnın' butxanasına kelgenlerdin' ha'mmesi de usı ku'nge shekem ol jatqan bosag'anı baspaydı.

⁶ Jaratqan İye ashdodlılardı ha'm do'geregindegi xalıqtı awır jazaladı. Olardı shıyqan menen jazalap, qıyınshılıqqa duwshar etti.

⁷ Bolıp atırg'an waqıyalardı ko'rgen Ashdod xalqı: «İzraildın' Qudayının' sandıg'ı bizlerde qalmasın, sebebi Ol bizlerdi de, qudayımız Dagondı da awır jazalap atır», – dedi.

⁸ Sonlıqtan olar adam jiberip, pu'tkil filist hu'kimdarların shaqırttı ha'm olardan: – İzraildın' Qudayının' sandıg'ın ne qılayıq? – dep soradı. Olar: – Sandıq Gatqa aparılsın, – dedi. Solay etip, olar İzraildın' Qudayının' sandıg'ın Gatqa apardı.

⁹ Biraq sandıq Gatqa aparılg'annan son', Jaratqan İye sol qalanı da jazaladı. Qalanı ku'shli qorqınısh biylep aldı. Jaratqan İye pu'tkil qala xalqın, u'lkeninen kishkenesine shekem jazaladı. Olarg'a da shıyqanlar shıg'a basladı.

¹⁰ Sol sebepli olar Qudaydın' sandıg'ın Ekrong'a jiberdi. Sandıq qalag'a kirer-kirmesten, ekronlılar: «Bizlerdi ha'm xalqımızdı joq qılıw ushın, İzraildın' Qudayının' sandıg'ın bizlerge alıp keldin'ler!» – dep baqırıstı.

¹¹ Olar pu'tkil filist hu'kimdarların toplap: «İzraildın' Qudayının' sandıg'ın bul jerden alıp ketin'ler. Bizlerdi de, xalq.ımızdı da joq qılmawı ushın, ol o'z jerine qaytarılsın», – dedi. Sebebi pu'tkil qalanı o'lim qorqınıshı biylep alg'an edi. Qudaydın' olarg'a bergen jazası ju'da' awır edi.

¹² Tiri qalg'anlarg'a shıyqanlar shıqtı. Qala xalqının' dadı aspang'a jetti.