1 Patshalar 6 bob

Kelisim sandıg'ının' İzrailg'a qaytarılıwı(1-21).

¹ Jaratqan İyenin' sandıg'ı filistler elinde jeti ay bolg'annan son',

² filistler ruwxaniylerdi ha'm palkerlerdi shaqırtıp, olarg'a: – Jaratqan İyenin' sandıg'ın ne qılsaq eken? Onı o'z ornına qalay qaytarıwımız kerekligin bizlerge aytın'lar, – dedi.

³ Olar: – Eger sizler İzraildın' Qudayının' sandıg'ın izge qaytarmaqshı bolsan'ız, onı bos jibermey, og'an qosa ayıbın'ızdı juwıw ushın sıy berip jiberin'ler. Sonda shıpa tabasızlar ha'm Onın' sizlerdi ne ushın jazalap atırg'anın bilip alasızlar, – dedi

⁴ Sonda filistler: – Ayıbımızdı juwıw ushın Og'an qanday qurbanlıq jibereyik? – dep soradı. Ruwxaniyler ha'm palkerler bılay dep juwap berdi: – Sizler jiberetug'ın qurbanlıqlar filist hu'kimdarlarının' sanına qaray bes shıyqannın' ha'm bes tıshqannın' altın mu'sinlerinen ibarat. O'ytkeni sizler de, hu'kimdarların'ız da birdey jazag'a tartılg'ansız.

⁵ Bunın' ushın shıyqanlardın' ha'm jerin'izdi wayran etken tıshqanlardın' mu'sinlerin islen' ha'm İzraildın' Qudayın ullılan'. Mu'mkin, sonda Ol sizlerdi, qudayların'ızdı ha'm jerin'izdi jazalawdı toqtatar.

⁶ Ne ushın mısırlılar ha'm faraon sıyaqlı qaysarlıq qılasızlar? Quday mısırlılardın' janına tiygende, olar İzrail xalqın bosatıp jibermedi me?

⁷ Endi jan'a bir arba isletin'ler de, birinshi ret to'llegen ha'm hesh qashan arbag.'a jegilmegen eki qashardı alıp, olardı arbag'a jegin'ler. Qasharlardın' buzawların ayırıp alıp, qorag'a aparın'lar.

⁸ Jaratqan İyenin' sandıg'ın arbanın' u'stine qoyın'lar. Ayıbın'ızdı juwıw ushın Og'an jiberip atırg'an altın zatların'ızdı qutıg'a salıp, sandıqtın' janına jaylastırın'lar. Son'ınan arbanı aydap jiberin'ler, kete bersin.

⁹ Biraq izinen gu'zetip barın'lar. Eger arba o'z eline, Beyt-Shemeshke qaray betlese, onda bul ullı apatshılıqtı bizlerge Jaratqan İyenin' O'zi jibergen boladı. Eger arba basqa ta'repke jol alsa, onda bul apatshılıqtın' Onnan jiberilmegenin, al og'an tosattan duwshar bolg'anımızdı bilip alamız.

¹⁰ Adamlar aytılg'anday isledi. Olar birinshi ret to'llegen eki qashardı arbag'a jekti, al buzawların qorag'a qamap tasladı.

¹¹ Jaratqan İyenin' sandıg'ı menen birge ishine shıyqanlardın' ha'm tıshqanlardın' altın mu'sinleri salıng'an qutını arbag'a saldı.

¹² Sonda qasharlar tuwrı Beyt-Shemeshke qaray jol aldı. Olar on'g'a da, solg'a da burılmastan, mo'n'irewi menen alg'a ilgeriledi. Al filist hu'kimdarları bolsa, Beyt-Shemeshtin' shegarasına deyin olarg'a erip keldi.

¹³ Sol waqıtta Beyt-Shemesh xalqı oypatlıqta biyday orıp atırg'an edi. Olar basların ko'terip qarap, sandıqtı ko'rgende, quwanıp ketti.

¹⁴ Arba beytshemeshli Eshuanın' atızına kirip, sol jerdegi u'lken bir tastın' janında toqtadı. Lebiyliler Jaratqan İyenin' sandıg'ın ha'm altın zatlar salıng'an qutını arbadan tu'sirip, u'lken tastın' u'stine qoydı.

¹⁵ Beyt-shemeshliler arbanın' ag'ashların otın etip jardı da, qasharlardı Jaratqan İyege arnap jandırılatug'ın qurbanlıq etip berdi. Sol ku'ni beyt-shemeshliler Jaratqan İyege arnap jandırılatug'ın qurbanlıqlar berip, basqa qurbanlıqlar da shaldı.

¹⁶ Filistlerdin' bes hu'kimdarı bolıp o'tkenlerdi ko'rgennen son', sol ku'ni Ekrong'a qaytıp ketti.

¹⁷ Filistler ayıbın juwıw ushın sıy retinde Ashdod, Gaza, Ashkelon, Gat ha'm Ekron qalaları ushın Jaratqan İyege bir-birden shıyqanlardın' altın mu'sinlerin jibergen edi.

¹⁸ Al altınnan islengen tıshqan mu'sinleri bolsa, bes filist hu'kimdarlarına qaraslı bolg'an qorg'an qalalar menen qosa do'geregindegi awıllardın' sanına tuwrı keletug'ın edi. U'stine Jaratqan İyenin' sandıg'ı qoyılg'an sol u'lken tas bu'ginge deyin beyt-shemeshli Eshuanın' atızında gu'walıq bolıp tur.

¹⁹ Jaratqan İyenin' sandıg'ının' ishine u'n'ilgeni ushın, Jaratqan İye beyt-shemeshlilerden bazıların jazalap, jetpis adamdı joq qıldı. Xalıq Jaratqan İyenin' o'zlerine bergen bul awır jazası sebepli aza tuttı.

²⁰ Beyt-Shemesh xalqı: «Bul muxaddes Qudaydın', Jaratqan İyenin' aldında kim tura aladı? Sandıq bizlerden kimge aparılıwı tiyis?» – dep soradı.

²¹ Olar Kiryat-Yarimde jasawshılarg'a xabarshılar jiberip: «Filistler Jaratqan İyenin' sandıg'ın qaytarıp jiberipti, kelip, onı alıp ketin'ler», – dedi.