1 Patshalar 7 bob

Samueldin' İzrailg'a biylik etiwi(2-17).

¹ Solay etip, Kiryat-Yarimnin' xalqı kelip, Jaratqan İyenin' sandıg'ın aldı da, onı to'beshiktegi Abinadabtın' u'yine apardı. Onın' ulı Elazardı Jaratqan İyenin' sandıg'ına qaraw ushın tayınladı.

² Sandıq uzaq waqıt, jigirma jıl dawamında Kiryat-Yarimde qaldı. Sol waqıt ishinde pu'tkil İzrail xalqı qayg'ıg'a batıp, Jaratqan İyege intizar boldı.

³ Samuel pu'tkil İzrail xalqına bılay dedi: «Eger Jaratqan İyege shın ju'rekten ju'z burmaqshı bolsan'ız, onda o'zlerin'izdegi basqa qudaylardın' ha'm Ashtartanın' mu'sinlerin joq qılın'lar. O'zlerin'izdi Jaratqan İyege bag'ıshlap, tek Og'an xızmet etin'ler. Sonda Ol sizlerdi filistlerdin' qolınan qutqaradı».

⁴ Solay etip, izraillılar Baaldın' ha'm Ashtartanın' mu'sinlerin joq qılıp, jalg'ız Jaratqan İyege xızmet ete basladı.

⁵ Sonda Samuel: «Pu'tkil izraillılardı Mispag'a jıynan'lar, men sizler ushın Jaratqan İyege jalbarınaman», – dedi.

⁶ Mispag'a jıynalg'an izraillılar qudıqtan suw alıp, onı Jaratqan İyege arnap to'kti. Olar sol ku'ni oraza tutıp: «Jaratqan İyege qarsı gu'na isledik», – dedi. Samuel Mispada İzrail xalqına biylik etti.

⁷ Filistler İzrail xalqının' Mispag'a toplang'anın esitkende, filist hu'kimdarları izraillılarg'a qarsı hu'jimge atlandı. İzraillılar bunı esitkende, filistlerden qorqtı.

⁸ Olar Samuelge: «Bizlerdi filistlerdin' qolınan qutqarıwı ushın Qudayımız Jaratqan İyege tınbay jalbarın», – dedi.

⁹ Sonda Samuel ele su'tten shıqpag'an bir qozını alıp, onı Jaratqan İyege arnap tolıg'ı menen jandırılatug'ın qurbanlıq etip berdi. Samuel İzrail xalqı ushın Jaratqan İyege jalbarındı. Jaratqan İye de og'an juwap berdi.

¹⁰ Samuel qurbanlıqtı jandırıp atırg'anda, filistler izraillılarg'a hu'jim qılıw ushın jaqınlasıp qalg'an edi. Biraq sol waqıtta Jaratqan İye ku'shli dawıs penen gu'rkirep, filistlerdi qattı albırattı ha'm olar izraillılardın' aldında ku'l-talqan boldı.

¹¹ Mispadan shıqqan izraillılar filistlerdi quwalap, olardı Beyt-Kardın' to'mengi jag'ına shekem o'ltirip bardı.

¹² Samuel bir tas alıp, onı Mispa menen Shennin' arasına ornattı. Ol: «Jaratqan İye bizlerge usı jerge deyin ja'rdem berdi», – dep tasqa Eben-Ezer* dep at qoydı.

¹³ Solay etip, jen'iliske ushırag'an filistler qaytıp İzrail jerine hu'jim jasamaytug'ın boldı. Samueldin' ko'zinin' tirisinde Jaratqan İye filistlerge qarsı turdı.

¹⁴ Ekronnan Gatqa shekemgi filistlerdin' basıp alg'an qalaları izraillılarg'a qaytarıp berildi. İzraillılar olardın' a'tirapındag'ı jerlerdi de filistlerdin' qolınan qutqardı. İzrail ha'm amor xalqı arasında paraxatshılıq ornadı.

¹⁵ Samuel pu'tkil o'miri boyı İzrailg'a biylik etti.

¹⁶ Ol ha'r jılı Beyt-Eldi, Gilgaldı ha'm Mispanı aylanıp shıg'atug'ın, bul qalalarda turıp, pu'tkil İzrailg'a biylik etetug'ın edi.

¹⁷ Son'ınan Ramadag'ı o'z u'yine qaytıp ketetug'ın ha'm sol jerden İzrailg'a biylik etetug'ın edi. Ol sol jerde Jaratqan İyege arnap qurbanlıq ornın qurdı.