Jaratılıs 35 bob
1 Quday Yaqıpqa: «Qa'nekey, endi Beyt-Elge bar da, sol jerge ornalas. A'jag'an' Esawdan qashıp baratırg'anın'da sag'an ko'ringen Qudayg'a arnap, sol jerde qurbanlıq orın qur», – dedi.
2 Sonda Yaqıp xojalıg'ına ha'm janındag'ılardın' ha'mmesine bılay dedi: – O'zlerin'izdegi jat qudaylardın' mu'sinlerin ılaqtırıp taslan'lar. O'zlerin'izdi pa'klep, kiyimlerin'izdi almastırın'lar.
3 Ju'rin'ler, bul jerden ketip, Beyt-Elge barayıq. Qıyın ku'nlerimde mag'an juwap bergen ha'm ju'rgen jollarımda menin' menen birge bolg'an Qudayg'a arnap, men sol jerde qurbanlıq orın qurayın.
4 Sonda olar o'zlerindegi jat qudaylardın' mu'sinlerin ha'm qulaqlarındag'ı sırg'aların Yaqıpqa berdi. Yaqıp olardı Shexemge jaqın jerdegi bir terebinftin' tu'bine ko'mip tasladı.
5 Son'ınan olar jolg'a tu'sti. Quday a'tiraptag'ı qalalardın' turg'ınlarına qorqınısh jibergenlikten, hesh kim olardın' izine tu'spedi
6 Solay etip, Yaqıp janındag'ı barlıq adamlar menen birge Qanan jerindegi Luzg'a, yag'nıy Beyt-Elge jetip keldi.
7 Yaqıp ol jerde qurbanlıq orın qurıp, sol jerdi El-Beyt-El dep atadı. O'ytkeni Yaqıp a'jag'asınan qashıp baratırg'anda, Quday sol jerde o'zine ko'ringen edi.
8 Sol arada Rebekkanı emizip baqqan Debora degen hayal qaytıs boldı. Ol Beyt-Eldin' qublasındag'ı bir emen ag'ashının' tu'bine jerlenip, sol emen ag'ashı «Joqlaw Emeni» dep ataldı.
9 Yaqıp Paddan-Aramnan qaytıp kelgennen keyin, Quday og'an ja'ne ko'rinip, onı bılay dep jarılqadı:
10 «Senin' atın' – Yaqıp. Biraq bunnan bılay, senin' atın' Yaqıp emes, al İzrail boladı», – dep, onı İzrail dep atadı.
11 Quday og'an ja'ne: «Men – Qu'direti ku'shli Qudayman. O'sip-o'nip, ko'bey. Sennen bir xalıq, ha'tte, ko'plegen xalıqlar payda bolıp, senin' urpag'ın'nan patshalar kelip shıg'adı.
12 Men İbrayımg'a ha'm Isaqqa bergen bul jerdi sag'an ha'm sennen keyingi urpaqların'a beremen», – dedi.
13 Son'ınan Quday Yaqıp penen so'ylesken jerden joqarı ko'terilip ketti
14 Yaqıp Quday o'zi menen so'ylesken jerde tastan estelik ornatıp, onın' u'stine sharap ha'm za'ytu'n mayın quydı.
15 Ol Quday o'zi menen so'ylesken jerdi Beyt-El dep atadı.
16 Olar Beyt-Elden shıg'ıp, Efratag'a jetiwge az qalg'anda, Rahilanın' tolg'ag'ı tutıp, ol qıyınshılıq penen bosandı.
17 Ol azap shegip tuwıp atırg'anda, kindik sheshesi og'an: – Qorqpa, sen ja'ne bir ul tuwdın', – dedi.
18 Rahila o'lip baratırıp, son'g'ı demin shıg'ararda, ulın Benoniy dep atadı. Biraq a'kesi onın' atın Benyamin dep qoydı.
19 Solay etip, Rahila qaytıs bolıp, Efratag'a, yag'nıy Beytlehemge baratug'ın jol boyına jerlendi.
20 Yaqıp onın' qa'biri u'stine qulpı tas ornattı. Rahilanın' qa'birinin' qulpı tası bu'gingi ku'nge shekem bar.
21 onnan keyin, İzrail ja'ne ko'ship, Eder minarasının' arg'ı jag'ına shatırın tikti.
22 İzrail sol elde jasap atırg'anda, ulı Ruben a'kesinin' toqalı bolg'an Bilha menen jattı. A'kesi bul tuwralı esitti.Yaqıptın' on eki ulı bar edi.
23 Onın' Leadan tuwılg'an ulları: tun'g'ıshı Ruben, keyin Shimon, Lebiy, Yahuda, İssaxar ha'm Zebulon.
24 Onın' Rahiladan tuwılg'an ulları: Yusup ha'm Benyamin.
25 Rahilanın' shorısı Bilhadan tuwılg'an ulları: Dan ha'm Naftaliy
26 Leanın' shorısı Zilpadan tuwılg'an ulları: Gad ha'm Asher. Bular Yaqıptın' Paddan-Aramda tuwılg'an ulları
27 Yaqıp a'kesi Isaqtın' u'yine, Mamrege keldi. Mamre Kiryat-Arbanın', yag'nıy Xebronnın' janında bolıp, ol jerde İbrayım ha'm Isaq kelgindi bolıp jasag'an edi.
28 Isaq bir ju'z seksen jıl jasadı.
29 Ol mazmunlı o'mir su'rip, qartayıp, demi tawısılıp, qaytıs boldı ha'm o'z ata-babalarına qosıldı. Ulları Esaw menen Yaqıp onı jerledi.
