Jaratılıs 40 bob
1 Bir qansha waqıttan son', Mısır patshasının' sharap quyıwshısı ha'm nanbayı o'z xojayınına, yag'nıy Mısır patshasına qarsı ayıp isledi.
2 Faraon o'zinin' usı eki xızmetkerine, yag'nıy bas sharap quyıwshısı menen bas nanbayına ashıwlanıp,
3 olardı saqshılardın' basshısının' u'yine, Yusup otırg'an qamaqxanag'a qamatıp tasladı.
4 Saqshılardın' basshısı Yusupti olardın' xızmetine bekitti. Solay etip, olar bir qansha waqıt qamaqxanada qaldı.
5 Bir ku'ni tu'nde faraonnın' qamaqta bolg'an sharap quyıwshısı menen nanbayı ekewi de tu's ko'rdi. Ha'r tu'stin' o'zinshe ma'nisi bar edi.
6 Erten'ine azanda Yusup olardın' janına kelgende, ekewinin' de en'sesi tu'sip otırg'anın ko'rdi.
7 Yusup xojayınının' u'yinde o'zi menen birge qamalıp jatırg'an faraonnın' xızmetkerlerinen: – Bu'gin nege qapa ko'rinesiz? – dep soradı.
8 Olar: – Bizler tu's ko'rgen edik, biraq olardı jorıp beretug'ın hesh kim joq, – dedi. Yusup olarg'a: – Tu's jorıw Qudaydan emes pe? Tu'slerin'izdi mag'an aytıp berin'ler, – dedi.
9 Sonda bas sharap quyıwshı tu'sin Yusupke aytıp: – Men tu'simde bir ju'zim ag'ashın ko'rdim.
10 Ag'ashtın' u'sh shaqası bar eken. Olar bo'rte sala gu'llep, solqım-solqım ju'zim pisti.
11 Menin' qolımda faraonnın' kesesi bar eken. Men ju'zimlerdi alıp, faraonnın' kesesine sıqtım da, keseni onın' qolına berdim, – dedi.
12 Yusup og'an bılay dedi: – Bul tu's mınanı an'latadı: u'sh shaqa – u'sh ku'n.
13 U'sh ku'n ishinde faraon senin' ta'g'dirin'di sheshedi ha'm sen burıng'ı xızmetin'e qaytasan'. Og'an burıng'ıday sharap usınatug'ın bolasan'.
14 Biraq isin' ju'riskennen keyin, meni esin'e al. Mag'an jaqsılıq islep, faraong'a men tuwralı ayt ha'm meni bul qamaqxanadan shıg'arıp al.
15 Sebebi men evreylerdin' jerinen urlap a'kelingenmen. Bul jerde de qamaqqa taslag'anday hesh na'rse islemedim, – dedi.
16 Bas nanbay Yusuptin' tu'sti jaqsı jorıg'anın ko'rip, og'an bılay dedi: – Men de tu's ko'rdim. Tu'simde basımda u'sh sebet nan bar eken.
17 En' u'stindegi sebette faraong'a arnap pisirilgen ha'r tu'rli nan o'nimleri bar eken. Biraq quslar basımdag'ı sebetten olardı shoqıp jep atır eken, – dedi.
18 Yusup og'an bılay dedi: – Bul tu's mınanı an'latadı: u'sh sebet – u'sh ku'n.
19 U'sh ku'n ishinde faraon ta'g'dirin'di sheship, seni darg'a astıradı ha'm quslar kelip, denen'di shoqıydı.
20 U'shinshi ku'ni faraon o'zinin' tuwılg'an ku'ninde barlıq xızmetkerlerine zıyapat berdi. Sonda ol o'z xızmetkerlerinin' aldında bas sharap quyıwshısı menen bas nanbayının' ta'g'dirin sheshti.
21 Bas sharap quyıwshını o'z xızmetine qaytardı. Solay etip, bas sharap quyıwshı ja'ne faraong'a kesesin usınatug'ın boldı.
22 Biraq bas nanbaydı, Yusup jorıg'anday, darg'a astırdı.
23 Bas sharap quyıwshı Yusupti eske almadı, onı umıtıp jiberdi.
