Jaratılıs 46 bob
1 Solay etip, İzrail o'zinin' barlıq mal-mu'lkin alıp, jolg'a shıqtı. Beer-Shebag'a jetip kelgende, a'kesi Isaqtın' Qudayına arnap qurbanlıqlar shaldı.
2 Quday tu'nde İzrailg'a ayan berip: – Yaqıp, Yaqıp! – dedi. – La'bba'y, – dedi ol.
3 Quday og'an bılay dedi: – Men Qudayman, a'ken'nin' Qudayıman. Sen Mısırg'a barıwdan qorqpa. Men ol jerde senin' urpaqların'nan ullı xalıq jarataman.
4 Men senin' menen birge Mısırg'a baraman ha'm urpaqların'dı usı jerge so'zsiz qaytarıp alıp kelemen. Qaytıs bolg'anın'da, Yusup o'z qolları menen ko'zlerin'di jabadı.
5 Son'ınan Yaqıp Beer-Shebadan jolg'a shıqtı. İzraildın' ulları a'kesi Yaqıptı, balaların ha'm hayalların faraon jibergen arbalarg'a mingizip, alıp ketti.
6 Olar malların ha'm Qanan jerinde jıynag'an pu'tkil mal-mu'lkin alıp, Mısırg'a keldi. Yaqıp penen onın' pu'tkil urpaqları birge edi.
7 Yaqıp o'zi menen birge ulların, qızların, aqlıqların, yag'nıy pu'tkil urpaqların alıp, Mısırg'a ko'ship keldi.
8 İzraildın', yag'nıy Yaqıptın' Mısırg'a alıp kelgen ullarının' ha'm urpaqlarının' atları to'mendegishe: Yaqıptın' tun'g'ıshı – Ruben.
9 Rubennin' ulları: Xanox, Pallu, Xesron ha'm Karmiy.
10 Shimonnın' ulları: Emuel, Yamin, Ohad, Yaxin, Soxar ha'm qananlı hayalınan tuwılg'an Shaul.
11 Lebiydin' ulları: Gershon, Qohat, Merariy.
12 Yahudanın' ulları: Er, Onan, Shela, Peres ha'm Zerax. Biraq Er menen Onan Qananda qaytıs bolg'an edi. Perestin' ulları: Xesron ha'm Xamul.
13 İssaxardın' ulları: Tola, Puwa, İob ha'm Shimron.
14 Zebulonnın' ulları: Sered, Elon ha'm Yaxleel.
15 Bular Leanın' Yaqıpqa tuwıp bergen ulları ha'm olardın' urpaqları. Lea olardı ha'm qızı Dinanı Paddan-Aramda tuwg'an edi. Yaqıptın' Lea arqalı tarag'an urpaqları barlıg'ı bolıp otız u'sh edi.
16 Gadtın' ulları: Sifyon, Xaggiy, Shuniy, Esbon, Eriy, Arodiy ha'm Areliy.
17 Asherdin' ulları: İmna, İshwa, İshwiy, Beria ha'm olardın' qarındası Serax. Beriyanın' ulları: Xeber ha'm Malkiel.
18 Bular Labannın' qızı Leag'a bergen shorısı Zilpanın' Yaqıpqa tuwıp bergen ulları ha'm olardın' urpaqları. Olar barlıg'ı on altı edi.
19 Yaqıptın' hayalı Rahilanın' ulları Yusup ha'm Benyamin edi.
20 Mısırda Yusup Menashshe ha'm Efrayım degen eki ullı boldı. Yusupke olardı On qalasının' ruwxaniyi bolg'an Potiferanın' qızı Asenat tuwıp berdi.
21 Benyaminnin' ulları: Bela, Bexer, Ashbel, Gera, Naaman, Exiy, Rosh, Muppim, Xuppim ha'm Ard.
22 Bular Rahilanın' Yaqıpqa tuwıp bergen ulları ha'm olardın' urpaqları. Olar ha'mmesi bolıp on to'rt edi.
23 Dannın' ulı: Xushim.
24 Naftaliydin' ulları: Yaxsiel, Guniy, Eser ha'm Shillem.
25 Bular Labannın' qızı Rahilag'a bergen shorısı Bilhanın' Yaqıpqa tuwıp bergen ulları ha'm olardın' urpaqları. Olar ha'mmesi jetew edi.
26 Yaqıptın' ullarının' hayalların qospag'anda, Yaqıptın' urpag'ınan bolg'an ha'm onın' menen birge Mısırg'a kelgenlerdin' sanı ha'mmesi bolıp alpıs altı adam edi.
27 Yusuptin' Mısırda tuwılg'an eki ulı menen birlikte Mısırg'a ko'shken Yaqıptın' xojalıg'ı ha'mmesi bolıp jetpis adam edi.
28 Yaqıp Goshen jerinde ko'risetug'ının aytıw ushın Yusupke aldın ala Yahudanı jiberdi. Olar Goshen jerine jetip kelgende,
29 Yusup o'zinin' arbasın jegip, a'kesi İzraildı ko'riw ushın, Goshenge bardı. Yusup a'kesin ko're sala, onı moynınan qushaqlap, uzaq jıladı.
30 İzrail Yusupke: – Tiri ekenin'di o'z ko'zim menen ko'rdim, endi o'lsem de, a'rmanım joq, – dedi.
31 Yusup tuwısqanlarına ha'm a'kesinin' u'y-ishindegi adamlarg'a bılay dedi: – Men faraong'a barıp bılay deymen: «Qanan jerinde jasag'an tuwısqanlarım ha'm a'kemnin' u'y-ishindegi adamlar mag'an keldi.
32 Olar shopanlar bolıp, sharwashılıq penen shug'ıllanadı. Sonlıqtan olar su'riwlerin, padaların ha'm barlıq mal-mu'lkin o'zleri menen birge alıp kelgen».
33 Eger faraon sizlerdi shaqırıp: «Ka'sip-ka'rin'iz ne?» – dep sorasa,
34 sizler: «Ata-babalarımız sıyaqlı, bizler de bala waqtımızdan beri sharwashılıq penen shug'ıllanamız», – dep aytın'lar. Sonda sizlerge Goshen jerine ornalasıwın'ızg'a ruxsat etiledi. Sebebi mısırlılar shopanlardan jerkenedi.
